"Азаттыктын" штаттан сырткаркы журналисти. Эл аралык AIB сыйлыгынын жеңүүчүсү (2011).
Жакынкы күндөрү жеңиштин 60 жылдыгы белгиленгени турат. Бирок сталиндик депортацияда жапа чеккен жүз миңдеген адамдар үчүн согуш дале бүтө элек, себеби алардын бир катары туулган жайларына кайта албай келатышат.
Тайвандын оппозиция лидери ушул күндөрү Бейжинде кытай жетекчилери менен элдешүү жаатында сүйлөшүү жүргүзүп жатат. Ушуга байланыштуу Тайван президенти Чен Шуибиаң Кытайды сүйлөшүүлөрдү өзү менен жүргүзүүгө чакырды.
Москва соту шаардагы Андрей Сахаров атындагы музейдин директорун жана анын орун басарын диний жана улуттук жек көрүүчүлүктү козуткан деп тапты. Чырлуу көргөзмөгө байланыштуу кабыл алынган бул чечимди Орусиянын славян чиркөөсү колдоп кабыл алды, бирок укук коргоочулар сөз эркиндигине жана абийир эркиндигине сокку урулганын айтышууда.
Кыргызстандагы соңку окуяларда элдин көтөрүлүшүнүн башкы себептеринин бири – аткаминерлердин арасында алдым-жуттумдуктун тамыр жайышы болду. Ошондуктан эл жаңы бийликтин коррупция менен чындап күрөшүшүн күтөт. Бирок мындай өзгөрүшкө катардагы шайлоочулар өздөрү да салым кошо алышат. «Азаттыкка» берген интервьюсунда Германияда коалициялык өкмөткө кирген Жашылдар партиясынын мүчөсү жана Европарламенттин мурдагы депутаты Ева Куистроп коррупцияга малынбаган кесипкөй аялдар бийликтин ар кыл баскычтарына келсе, алкымы бузуктарга бут тосулмак деп эсептейт. Аны менен интервьюда Куистроп сөзүн "аялдар канткенде бийликке тартылат?" деген суроого жооп берүүдөн баштады.
Атактуу поп жылдызы Майкл Жэксон америкалык радиодон чыгып сүйлөп, өзүнө коюлган "жаш балага сексуалдык зордук көрсөткөн" деген айыптоону "жалган жалаа" деп мүнөздөдү. Соттор 28-мартта прокурорлордун мындан он жыл мурда Жэксонго каршы берилген көрсөтмөлөрдү карай тургандыгын чечиши керек. Ырчы өзүн каралоонун, жалаа жабуунун курмандыгы деп эсептейт.
Ливандык шийилердин "Хезбулла" партиясы шейшембиде Бейруттун көчөлөрүнө 10 миңдеген колдоочуларын чыгарып, сириялык аскерлер чыгарылса Ливанда АКШнын жана Израилдин таасири күч алаарын эскертти. Куралдуу бөлүктөрү бар бул таасирлүү уюмдун саясий сахнага чыгышы Ливандагы кырдаалды курчутабы же жокпу - азыр айтуу кыйын. Бирок Ливандагы 14 миң аскерин чыгарып кетүүгө мажбур болуп жаткан Сириянын чырагына май таамп жатканы шексиз.
Британиянын апелляциялык соту мусулмандардын жилаб көйнөгүн кийип келген 16 жаштагы кызды мектепке киргизбей коюп, мектептин жетекчилиги ал кыздын укугун бузган деп тапты. Британияда мектеп формасында мыйзамдык чектөө жок, бирок соттун соңку чечими мектептердин өз алдынча кийим кодексин аныкташына кедерги түзөт шекилдүү.
Сирия Ливанда 20 жылдан бери турган аскер күчтөрүн жакынкы айларда алып кетээрин жарыялаган эле. Дамаск өкмөтүн убадасын аткарууга мажбурлоо үчүн, Кошмо Штаттары жана анын өнөктөрү Сириядан Ливандагы аскерлерин дароо чыгарып кетүүнү талап кылууда.
Ооганстандан баңги зат ташып чыгуунун кескин көбөйүшүн кантип токтотуш керек? Бул тилсиз жоого ооган өкмөтүнүн күчү жетеби? Эл аралык Наркотикалык көзөмөл кеңеши ушул шейшембиде жарыялаган жылдык отчетунда мына ушундай тынчсыздануу камтылган.
Кошмо Штаттарынын Мамлекеттик департаменти жыл сайын дүйнөдөгү адам укуктарынын абалы боюнча отчет жарыялайт. Ушул дүйшөмбүдө жарык көргөн быйылкы отчетто Орусияда жана башка мурдагы советтик жумурияттарда демократиялык реформа жылбай жаткандыгына тынчсыздануу билдирилди. Бирок документте демократиялык реформа багытында жалпы жонунан жылыш бар деген үмүт камтылган.
Жума күнкү жан кечтинин чабуулунан кийин Израилдин өкмөтү Сирияга жана палестиндерге кысымын күч алдырды. Убактылуу элдешүүнүн мезгилинде орун алган Тел Авивдеги чабуулда беш киши набыт болгон.
Төмөнкү палатадагы 63 орун үчүн 230 талапкер ат салышты. 63 орундун 22си партиялык тизме боюнча бөлүштүрүлөт, калган 41 орундун ээлери бир мандаттуу чөлкөмдөрдө аныкталат. Мандаттардын басымдуу бөлүгү президент Имомали Рахмоновдун Элдик Деморкатиялык партиясынын үлүшүнө тийет деп күтүлүүдө.
22-февралда Кошмо Штаттарынын президенти Жорж Буш Брюсселде НАТОнун жыйынында болду. Буш ошондой эле Европа Биримдигинин саммитине катышып, Европа комиссиясынын өкүлдөрү менен жолугушуп жатат.
Кыргызстанда ушул аптанын соңунда өтө турган парламенттик шайлоого талапкер болуп аялдар эркектерден 10 эседен ашык аз катталды. Коңшу өлкөлөргө салыштырмалуу, Кыргызстанда аялдар коомдо активдүү роль ойношкону менен, мамлекет башкарууга келгенде алар мурдагыдай эле обочодо кала беришүүдө. Ал эми улуттук азчылыктардан чыккан аялдарга мамлекеттик ишке аралашуу андан да кыйын.
Казакстандын Курмангазы атындагы элдик оркестри жана Казак Мамлекеттик Камералык оркестри өткөн аптада Вашингтондо жана Нью-Йоркто атактуу концерт залдарында оюн коюшту. Камералык оркестрде 3 жарым миллион доллардык Страдиваринин скрипкасы да үн кошту, бирок казактардын актаруусундагы Батыштык классикалык музыкасына караганда казактын нукура элдик ыр-күүлөрү чоң кызыгууну жаратты.
Иракта добуш саноо уланып жатканда көптөгөн эреже бузуулар туурасында маалыматтар ачыкка чыгып жатат. Ошого карабастан, башында эле шайлоого жогору баа берген Ирактын бийлик өкүлдөрү жана Бириккен Улуттар уюму өз пикирлерин өзгөртүшкөн жок.
Мындан эки жыл илгери дал ушул тапта АКШнын президенти Жорж Буштун администрациясы Иракка кол салуунун зарылчылыгын дүйнөгө далилдеп жаткан кез эле. Вашингтон келтирген аргументтердин негизгиси Саддам Хусейндин массалык кыргын куралы бар деген теген ырастоо болгон. Ушул күндөрү кыргын куралына байланышкан тынчсыздануу Ирактын коңшусу Иран тарапка оошту. Кошмо Штаттары "Тегеран тымызын ядролук курал жасап жатат" деп айтып жатат. Америкалык бийлик өкүлдөрү "Иранга каршы күч колдонуу планда жок" деп ырасташканы менен, көп байкоочуларга Вашингтондон чыккан кеп Иракка кол салуунун алдындагыдай кооптуу жаңырык болуп туйулууда. Иранга кол салууга шашылбоого чакырган таасирлүү адамдардын бири - Буш администрациясынын Ирактагы курал адистеринин мурдагы жетекчиси Дейвид Кей.
АКШнын жаңы бекиген Мамлекеттик катчысы Кондолиза Райс Европаны жана Жакынкы Чыгышты кыдыруусун улантты. Жекшембиде ал Анкарада Түркиянын жетекчилери менен көздөшүп, кийин Израилди көздөй жол тартты.
Ирактын убактылуу президенти Гази ал-Явари АКШ баштаган куралдуу күчтөр Ирактан жыл аягына чейин чыгарылаары күмөн экенин билдирди. Бирок анын айтымында, 2006-жылдан тарта аскерлердин санын кыскартуу башталышы мүмкүн. АКШнын Мамлекеттик катчысы Кондолиза Райс да жекшембидеги шайлоого ирактык миллиондогон атуулдардын катышканына карабастан, Иракта турган 170 миңден ашык чет элдик күчтөрдү алып кетүү тууралуу сөз кылуу эрте деп эсептейт. Саясат талдоочулар да Ирактан америкалык аскерлер жакын арада кетээри күмөн экендигин айтып жатышат.
Чыгыш европалык сегиз өлкөнүн өкмөт башчысы ушул шаршембиде Болгариянын баш калаасында чогулуп, ромалардын абалын жакшыртууну караган эл аралык атайын программаны талкуулашты. Европанын эң ири улуттук азчылыгы болгон ромалардын же цыгандардын билим деңгээлин көтөрүү жана алардын дискриминациасына бөгөт кою сыяктуу чаралардын бараандуу программасы "Ромаларды Кабылдоонун Декадасы" деп аталат.
Дагы жүктөңүз
