"Азаттыктын" штаттан сырткаркы журналисти. Эл аралык AIB сыйлыгынын жеңүүчүсү (2011).
Ирандагы шайлоонун азырга чейинки жыйынтыгы ашкере консерватор президент Махмуд Ахмединежаддын ымалаштары алга озуп чыккандыгын көрсөтүүдө. 14-марттагы парламенттик шайлоодогу добуштардын 65 пайызы саналгандан кийин белгилүү болгондой, Ахмединежадды колдогон катаң консерваторлор 67 орунду, ал эми Ахмединежадды сындаган консерваторлор 46 орунду алышты. Мындан тышкары, реформист саналгандар 30 орунга, ал эми саясий туруму анык болбогон көз карандысыздар 42 орунга ээ болушту.
Иранда кечээки парламенттик шайлоонун жыйынтыгын эсептөө жүрүп жатат. Алдын ала эсептөө президент Махмуд Ахмединежад менен ымалаш консерватордук күчтөр алдыга чыкканын көрсөтүүдө. 70 чөлкөмдө эсептөө жүргүзүлсө, катаң турумдаргы консерваторлор 35инде жеңишке жетишиптир. Мамлекеттик сыналгыдан кабарлангандай, сабырдуу турумдагы консерваторлор 22, ал эми реформисттер 13 мандатка ээ болушту. Мажилисте бардыгы болуп 290 орун бар, башкача айтканда, добуштардын басымдуу көпчүлүгү азырынча тактала элек.
Ушул күндөрү Европа парламентине 50 жыл толууда. 1958-жылы жаңы түзүлгөндө бул уюм ал кезде 6 гана өлкө кирген Европа Биримдигинин кеңеш берүүчү чакан органы болгон. Азыр анда 27 өлкөдөн демократиялык шайлоолордо шайланган 785 депутат бар. Европарламент 342 миллион кишилүү дүйнөдөгү эң ири улуттар аралык демократиялык шайлоочулар биримдиги болуп саналат. Ошол эле убакта Европарламент чыгарган мыйзамдарынан мурда, башка парламенттерге окшобогон жактары менен көбүрөөк белгилүү.
Европа Биримдигинин лидерлери бүгүн Брюсселде 2008-жылдагы алгачкы жыйынына чогулушууда. Күн тартибинде энергетика жана айлана-чөйрөнү коргоо маселелери биринчи орунда болмокчу. Биримдик ошондой эле климаттын өзгөрүшү эң жарды өлкөлөрдөн миграциянын күчөшүнө алып келет, жана энергетика ресурстары үчүн бай өлкөлөрдүн өз арасында чатак чыгышы мүмкүн деген эскертүү жарыялашы күтүлүүдө.
Сизди интернет цензурасы тынчсыздандырабы? Же тоталитардык өлкөлөрдө интернет блоггерлердин камалышы ачууңузду келтиреби? Анда Бейжиндин Тянянмен аянтына демонстрацияга чыгыңыз. Андан соң Гаванадагы Төңкөрүш аянтындагы нааразылык акциясына кошулуңуз. Бул мүмкүн эмес деп ойлосоңуз, жаңыласыз. Кеминде виртуалдык, же интернеттеги демонстрацияларга катышууга сизде сөзсүз мүмкүнчүлүк бар.
37 жаштагы Амир Хайдерхан Хоти жакында Пакистандагы эң бир оор кызматтардын бирине келгени жатат. 18-февралдагы парламенттик шайлоодо анын секулярдык улутчул Авами Элдик партиясы бир топ мандаттарды утуп алгандан кийин, Хоти радикал экстремисттик күчтөрдүн уюткусу саналган Tүндүк-Батыш Чек ара провинциясына мамлекеттик министр болуп дайындалды. “Азаттыктын” ооган кызматына берген маегинде Хоти талибдер менен “ал-Каидачыл” козголоң күч алып жатканына карабастан, тынчтыкты жана коопсуздуктук бекемдөөгө убада кылды. Маекти Жаңыл Жусубжан даярдады. Биринчи суроо акимдин жаңы ишиндеги башкы милдеттер туурасында болду.
Дүйнө жүзүндөгү депутаттардын дээрлик 18 пайызы аялдар, алар министрлик кызматтардын да 16.1 пайызын ээлеп турушат. 2005-жылдан берки мезгилдеги 2 пайыздык жакшырууну көрсөткөн бул сан-эсеп Парламенттер аралык биримдиктин жаңы изилдөөсүндө келтирилет.
Пайдабы же адам укуктарыбы? Мунай-газбы же демократиябы? Борбор Азияда бул диллемага эң качан жеңил жооп табылбайт. Бул айрыкча, ушул күндөрү Ашхабатка жана Ташкенге германиялык делегациянын келишине байланыштуу айгине болууда.
Бүгүн Голливудда Оскар сыйлыктары таркатылат. Оскарда көп категориялар бар, биз "даректүү тасма" категориясына токтолсок. Себеби адатта бейкапар оюн-күлкү өкүм сүргөн Голливудда быйыл бул категориядагы беш тасмадан үчөө согуш темасында болуп атат.
Кабулда “Достумду соттош керекпи?” деген маселе ооган өкмөтүнүн канчалык чабал экендигин көрсөтүүдө. Полиция жакында киши уурдаган генералдын Кабулдагы үйүн камалоону токтоткон эле.
Өзбекстанда президент Ислам Каримов тун кызы Гүлнараны тышкы иштер министринин орун басарлыгына дайындады. Бул дароо эле "түшпөс хан өз кызын мураскорлукка таптап жатат" деген өйдө-төмөн кептерге дагы май чачты. А балким нарктуу, барктуу Каримова болгону диппаспорт алып, америкалык соттордон коркуп-үркпөй жер кыдырууну ойлоп жаткандыр.
Сербияда бүгүн президенттик шайлоонун экинчи айлампасы өтүп жатат. Добуш берүүнүн жыйынтыгына жараша өлкө Батышка ыктаары же Орусияга ооп кетээри белгилүү болмокчу. Шайлоого кайра талапкердигин койгон учурдагы президент Борис Тадич Европа биримдиги менен жакындашууну, ал тургай өлкөнүн биримдикке мүчө болуп кошулушун каалайт. Атаандашы Томислав Николич Москва менен түбөлүк достуктун жалындуу колдоочусу катары таанымал.
2-мартка белгиленген Орусиянын жаңы президентин шайлоонун өнөктүгү бүгүн расмий старт алды.
Ушул күндөрү Франциянын Везуль шаарында тажик тасмаларына өзгөчө басым жасалган Азиялык филмдер фестивалы өтүп жатат. Мурдатан кыргыз, казак тасмалары да көрсөтүлүп келген бул франциялык ири кароодо быйыл башкы сыйлыкка коюлган фильмдердин арасында Кыргызстандан "Боз салкын" да бар.
Британиянын Өзбекстандагы мурдагы элчисинин кийинки жары өз башынан өткөргөн окуяларды Лондон сахнасына алып чыкты. Надира Алиеванын автордук спектаклинде анын маң заттарына берилген атасы, ажынын зордуктоосу, Ташкендин түнкү клубунда стриптиз бийин бийлеген кези, элчи Крейг Мюррейге жолукканы жана кийин Лондонго көчүп келгени чагылдырылат. «Азаттыкка» берген маегинде Алиева бул спектакл менен өзү тууралуу түшүнүктү өзгөрткүсү келгендигин бышыктады.
Иракта Ашура диний фестивалы салыштырмалуу тынч аяктады. 10 күндүк Ашура майрамынын чордону болгон Кербала шаарында айрыкча акыркы күндөрү коопсуздук чаралары кескин күчөтүлдү. Фестивалдын жүрүшүндө башка шаарларда полиция менен кагылышууларда ондогон киши каза тапты.
Ушул бейшембиде Швецарияда жылда өтчү Дүйнөлүк экономикалык форум башталууда. Дүйнөнүн булуң-бурчунан атка минерлер, ишкерлер, исскуство өкүлдөр жаңы башталган жылдын башкы саясий-экономикалык багыттарын сөз кылышмакчы.
Түркмөнстан өз алдынчалык алгандан бери анын Иран менен алакасы ар дайым майдай-сүттөй болуп келген. Бирок акыркы кездери, болуп көрбөгөндөй катуу сууктун мезгилинде, түркмөн газы Иранга жетпей калгандан бери эки ортону кара мышык аралады.
Индонезияны 32 жыл өз билгениндей башкарган 86 жаштагы Сухарто, анемия жана жүрөктүн начар кагышына байланыштуу 4-январда Жакартада ооруканага жаткырылган эле. Канын алмаштырып, бөйрөгүн жасалма иштете башташканда, акбалы жакшыра түшкөн, бирок бир катар органдары иштебей калган. Кийин өпкөсү жаңыдан инфекцияга чалдыкканы аныкталгандан кийин, дарыгерлер аны 11-январь күнү атайын бөлүмгө жаткырышкан.
12-январда АКШнын Кувейттеги аскер турагына барганда америкалык президент Ирактан 20 миң америкалык аскерди үстүбүздөгү жылдын ортосуна чейин алып кетүү иш-чарасы план боюнча жүрүп жаткандыгын, бирок кошумча аскер чыгаруу тууралуу чечим кабыл алына электигин билдирди. Буш ошондой эле Иракка үмүт кайта баштады деп эсептейт.
Дагы жүктөңүз
