"Азаттыктын" Бишкектеги бюросунун кызматкери, журналист, педагог-режиссер.
420 миң доллардын доосу менен айыпталып жаткан Улуттук Банктын төрагасы Улан Сарбановдун жана мурда чоң кызматта турган бир катар адамдардын үстүнөн сот жараяны 16-мартта улантылды. Бул күнү экс-президенттин адвокаты Максим Максимович Аскар Акаевдин атынан көрсөтмө берип, ага коюлуп жаткан айып негизсиз деп билдирди. Анын айтымында, 420 миң долларды президентке кимдер алып барып бергенин иликтебей, ал акча каражаты каякка жумшалганын издегенде, бул маселе ачыкка чыкмак.
Бүгүн Биринчи май райондук сотунда экс-президентке 420 миң доллар берген делип айып коюлуп жаткан бир катар жетекчилердин үстүнөн сот улантылат. Улуттук банктын төрагасы Улан Сарбанов сот жараяны бүткөнчө ээлеген кызматтынан убактылуу четтетилген болчу.
Президент Курманбек Бакиев мыйзамдарды чыгаруунун ордуна, аткаруу бийлик структураларынын ишине ашкере кийлигишип, жолтоо болуп жатат деп Жогорку Кеңешти сынга алды. Өлкө башчысы бул жөнүндө 3-февралда Жогорку Кеңеште чыгып сүйлөгөн сөзүндө баса белгиледи. Президент ошондой эле депутаттарды тергөөсү бүтө элек иштерге кийлигишип, саясий максатта спектаклдерди уюштурууну токтотууну талап кылды.
Кылмыш иши козголгондугуна байланыштуу 31-январда Жаза аткаруу башкармалыгынын жетекчиси Капар Мукеев өкмөт башчысынын буйругу менен убактылуу кызматтан четтетилди.
Кыргызстанда 18 арак, эки спирт заводу бар. Бирок кирешени мол бере турган бул ишканалар мамлекеттик казынага жарытып пайда бербей келатат. Учурда Жогорку Кеңеш тарабынан алкоголь продукциясын чыгаруучу ишканаларды лицензиялаштыруу маселеси көтөрүлүүдө.
24-декабрда Ош мамлекеттик акимчилигинин имаратында болгон жардыруу учурда иликтенип жатат.
“Пирамида” телекомпаниясынын 50 пайыз акциясына ээ болгон “Медиа-Инвест” уюмуна ээлик кылган “Инвест Тел” компаниясы жасалма жол менен түзүлгөн. Анын анык кожоюндары жок болуп чыккан. Бул жөнүндө “Пирамида” телекомпаниясындагы чырды териштирүү үчүн түзүлгөн парламенттик комиссия билдирди. “Инвест Тел” компаниясынын өкүлдөрү өз кезегинде “Пирамиданын” акцияларына мыйзамдуу ээ болушканын белгилешүүдө.
Кыргызстанда парламент депутаттары “Манас” аба майданында жайгашкан америкалык аскер базадан мамлекетке түшкөн акча каражатын көбөйтүү маселесин көтөрүүдө. Өлкөнүн каржы министри Акылбек Жапаров өз кезегинде чет элдик авиабазадан мамлекеттин бюджетине киреше деле кирбей тургандыгын айтып чыкты. Президент Курманбек Бакиев мындан мурда “Манас” авиабазасынын туруу акысын 100 эсеге көтөрүү боюнча АКШ менен сүйлөшүүлөр жүрүп жатканын билдирген болчу.
Кыргызстанда паспорт маселеси курч проблема бойдон калууда. Көптөгөн кыргыз атуулдары паспорттору жок кошуна мамлекеттердин чекараларынан өтүүдө азап тартып келишсе, айрымдары чет өлкөгө жумушка, окууга барууга бара албай, өкмөттөн үмүтүн үзбөй келишүүдө. Маалымат технологиялар жана ресурстар боюнча Улуттук агенттиктин билдиргенине караганда жаңы паспорттор Молдованын “Регистру” компаниясы тарабынан чыгарылып, атуулдарга бериле баштады. Сентябрь айында Маалымат технологиялар жана ресурстар боюнча Улуттук агенттик паспорт чыгаруу боюнча Түштүк Кореянын Venture C&C Plasa компаниясы менен келишим түзгөн. Жакында ал келишим бузулгандыгына байланыштуу Түштүк Кореялык компания өкмөттү сотко бере турган болду.
30-ноябрда баш прокурор Камбаралы Конгантиев маалымат жыйынын өткөрүп, депутат маркум Тынычбек Акматбаевдин өлүмүнүн себептери иликтенип жатканын, жаза өтөө башкармалыгындагы абал жана экс-депутат Аскар Акаевдин үй-бүлөсүнө тиешелүү мүлктөр боюнча козголгон 21 кылмыш иши сотко өткөрүлгөнүн, бул боюнча иштер аягына чыгарыларын билдирди. Ал эми Акаевдин адвокаты Максим Максимовичтин айтымында, экс-президенттин үй-бүлөсүнө негизсиз мүлктөр таңууланууда.
17-ноябрь - кыргыз кино чеберлеринин кесиптик күнү. Кино ишмерлер Кыргызстан эгемендүүлүк алып, өз алдынча мамлекет болгону кино тармагына көңүл бурулбай, бир кезде дүйнөгө “Кыргыз керемети” деп таанылган улуттук кино өнөрү оор кризиске учураганын айтышууда. Ал эми мамлекеттик катчы жаңы өкмөт кино тармагын өнүктүрүүгө көңүл бура тургандыгын билдирди.
15-ноябрда жеке менчик үй куруу үчүн жер участогуна муктаж 50дөн ашык адам өкмөт үйүнүн жанына топтолушту. Алар жер участогун Бишкек шаарына жакын жерден бөлүштүрүүнү жана бул маселеге президент Курманбек Бакиевдин жеке көзөмөл кылуусун талап кылышып, өкмөттүн 8 айдан берки убадасына ишенбөөчүлүк көрсөтүштү. Эгерде талаптары аткарылбаса нааразылык акциясын уланта турагандыктарын билдиришти.
Кыргызстан менен Орусиянын соода-экономикалык жана илимий техникалык кызматташтык боюнча эки өлкөнүн өкмөт аралык комиссиясынын 8-отуруму ноябрдын аягында Омск шаарында өтөт. 11-ноябрда премьер-министр Феликс Кулов эки тараптуу жолугушууда каралуучу иш чаралардын даярдыгына байланыштуу өкмөт курамы менен жумушчу жыйынын өткөрдү.
Баш мыйзамга өзгөртүүлөрдү жана толуктоолорду киргизүүдө Конституциялык кеңешме тарабынан премьер-министрлик кызматты жойуу жөнүндө сунуштар айтылып, парламенттик башкаруу системасына өтүү маселеси козголууда. Ал эми мамлекет башчы Курманбек Бакиев Кыргызстан парламенттик башкарууга азырынча даярдыгы жок экендигин белгилеп, президенттик-парламенттик башкарууну ылайык көрүүдө.
Кыргызстан эгемендүүлүккө ээ болгон күндөн баштап маданият тармагына, профессионалдык искусствого мамлекет тарабынан тийиштүү көңүл бурулбай, жүздөгөн маданият үйлөрү, китепканалар талоонго учурап, музыкалык мектептер жабылууга дуушар болгон. Ал эми жакында кайрадан түзүлгөн маданият министрлиги айыл маданиятын көтөрүүнү жана анын укуктук нормативдик базасын түзүүнү көздөөдө. Көркөм өнөр ээлеринин кесиптик күнүндө жаңы өкмөт жалпы улуттук маданиятка өзгөчө маани бере тургандыгы белгиленди.
Айрым укук коргоо уюмдарынын билдиргенине караганда, жаза мөөнөтүн өтөөчү жайларда кылмыш жообуна тартылгандардын саны көбөйүүдө. Алардын көпчүлүгү кылган күнөөсүнө жараша эмес, Кылмыш-жаза кодексинин айрым беренелеринин учур талабына жооп бербегендигинен жазага тартылып, абактарда отурушат. Коомчулукта Кылмыш жаза кодексин реформалоо керек деген пикирлер айтылууда.
Эки жыл аралыгында өлкө аймагында жаратылыш кырсыктарынан 18 миңге чукул адам жабыр тарткан. Алардын 7 миңине мамлекет тарабынан ссуда берилген. Калганадары али күнчө материалдык колдоого муктаж. Ал эми жыл сайын жаратылыш кырсыктарынын саны кескин өсүп, анын алдын алуу боюнча иштер каржы маселесине келип такалууда.
27-октябрда өкмөт үйүндө биринчи вице-премьер-министрдин милдетин аткаруучу Данияр Үсөнов үй куруучулардын коомдук уюмдарынын өкүлдөрү менен жолугушуп, Бишкек шаарынын аймагынан үй курууга жер участогу берилбестигин билдирди. Ал ошондой эле жер алууну көздөп митинг, пикет сыяктуу нааразылык иш чраларды өткөрүүгө тыйуу салынаарын, аны уюштурган адамдарга мыйзам чегинде катуу чара көрүлөөрүн белгиледи.
25-октябрда Өкмөт үйүндө өткөн Конституциялык кеңешменин жыйына мамлекет башчы Курманбек Бакиев Жогорку Кеңештин алдындагы нааразылык митинги боюнча өкмөттүн мүчөлөрү жана парламенттин депутаттары менен жабык эшик артында жыйын өткөрө тургандыгына байланыштуу кеңешменин жыйынына катышпай калды. Ал эми жыйында Конституциялык кеңешменин регламенти талкууланып, кеңешменин мүчөлөрү аткаруу бийлигине өлкөдө түзүлгөн кырдаалды жөнгө салууну сунушташты.
Июнь айынан бери Каракече көмүр кениндеги маселе чечилбей коомчулукта ар кандай пикирлерди жаратып келүүдө. Окуянын чоо-жайын иликтегени түзүлгөн атайын мамлекеттик комиссия бейшембиде Каракечеде болуп, ал жердеги абал менен таанышып келди. 22-октябрда биринчи вице-премьер министрдин милдетин аткаруучу Данияр Үсөнов комиссиянын мүчөлөрү менен жолугушуп, Каракечеде түзүлгөн оор кырдаалды жөнгө салуу маселесин талкуулады.
Дагы жүктөңүз
