Орусиянын Бишкектеги элчилигинин алдында Улан Үсөйүн баштаган бир нече жарандык активист Украинаны колдогон акция өткөрүүдө. Алар колдоруна “Украинага даңк!”, “Тынчтык керек!”, “Согушка жол жок!” деген жазууларды кармап турушат.
Азырынча элчиликтен аларга эч ким чыккан жок. Ушундай эле акция бүгүн эртең менен дагы өткөн.
Украинанын президенти Владимир Зеленский өлкөнүн Куралдуу күчтөрү Орусиянын армиясынын чабуулуна татыктуу жооп кайтарып, кармаш өлкөнүн дээрлик бардык аймагында уланып жатканын билдирди.
24-февралдагы атайын брифингде ал аскерлер жардамга муктаж экенин кошумчалап, Украинанын суверенитетин коргоону каалаган жарандардын баарына курал таратыла баштаганын белгиледи.
“Биздин элдин келечеги азыр ар бир жарандан көз каранды. Курал кармоо тажрыйбасы бар ар бир киши Украинаны коргоого кошулса болот. Бул үчүн алар тиешелүү борборлорго келиши керек. Ички иштер министрлиги мамлекетти коргоо үчүн ардагерлерди да тарта баштады”, - деди ал.
Харьковдо жок кылынган орусиялык аскердик техника
Киев облусунда Украинага караштуу аскердик-транспорттук учак кулады. Кырсык Жуково жана Триполье айылдарынын ортосунда болгон. Расмий органдар бортто 14 адам болгонун, анын бешөө каза тапканын билдирди.