Украина Орусиянын колуна туткунга түшүп калган жарандарынын арасынан жалпысынан 4306сын кайтарып алууга жетишти. Бул тууралуу украин президенти Владимир Зеленский билдирди.
Ал согуш туткундарынын баарын мекенине кайтаруу иши уланып жатканын, атайын түзүлгөн Координациялык штаб бар экенин айтты.
АКШ президенти Дональд Трамп Украина боюнча ок атышпоо тууралуу келишим талкууланып жатканын кабарлап, анын алкагында “жер бөлүштүрүү” маселеси дагы ортого салынганын айтты. Бул тууралуу Трамп Ак үйдөгү басма сөз-брифинг учурунда билдирди.
“Жакын арада (Украинада) ок атышууну толук токтотууга жетишебиз деп үмүттөнөм, андан кийин келишим түзөбүз... Келишим азыр талкууланып жатат, ага аймактарды бөлүү жана башкалар кирет”, - деди Трамп.
Буга чейин АКШ президенти Украинада согушту токтотууга байланыштуу “тынчтык келишиминин бир канча элементтери” макулдашылганын жана Орусиянын президенти Владимир Путин менен “жер жана электр станцияларды” талкуулай турганын айткан.
Орусиялык “Коммерсант” басылмасынын кабарчысы Андрей Колесниковдун жазганына караганда, Орусиянын өнөр жай жана ишкерлер бирлигинин жабык жыйынында Путин "сүйлөшүүлөрдө буга чейин өзүнүн карамагына алган Крым, Севастополь, Луганск, Донецк республикаларын, Херсон жана Запарожье облустарын Орусиянын аймагы деп таануу туралуу сөз болуп жатканын" билдирген. Колесниковдун булактарынын айтымында, мындай жагдайда Москва “Одесса жана жана азыр Украинага таандык болгон башка аймактарга доомат койбойт”.
21-мартта Трамптын администрациясы Орусияга каршы санкцияларды көзөмөлдөгөн эл аралык топторго катышууну азайтканы белгилүү болгон. Бул тууралуу Bloomberg бир катар европалык чиновниктерге шилтеме берүү менен билдирген.
Ошондой эле 28-мартта Йель университетинин Орусиянын Украинадагы согуш кылмыштары боюнча далилдерди чогултууда негизги роль ойногон бөлүмү жабыла турганы кабарланган.
23-мартта Украинадагы ок атышууну токтотуу маселеси боюнча сүйлөшүүлөрдүн кезектеги айлампасы Жидда шаарында (Сауд Арабиясы) өтөт. Америка президентинин атайын чабарманы Стив Уиткофф эгер Украинада ок атышпоо келишими түзүлсө, Орусияга каршы санкциялар жеңилдей турганын айткан.
Bloomberg агенттиги Путин АКШ президентинин атайын чабарманы менен жолугушууда согушту токтотуунун шарты катары Украинага курал-жарак жеткирүүнү токтотууну атаганын кабарлаган.
Улуу Британия союздаш өлкөлөрү менен биргелешип Орусияга Украинадагы согушун баштагандан берки эң катаал санкция киргизди. Бул тууралуу 21-мартта британ Каржы министрлиги билдирди.
Мекеменин маалыматына караганда, жалпысынан 25 млрд фунт стерлингден (дээрлик 30 млрд евро) ашуун суммалык орусиялык активдер "тоңдурулду". Британ Каржы министрлигинин Каржылык санкция башкармалыгы (Office of Financial Sanctions Implementation, OFSI) маалымдагандай, Орусия Украинага 2022-жылдын февралында кол салгандан бери санкциялардын натыйжасында 400 млрд долларынан (более 475 млрд евро) кол жууду, бул Москва өлкөнүн коргоо тармагына жумшаган дээрлик төрт жылдык каржылоосуна барабар каражат.
"Орусиянын жалпы каржылык абалы алсыроодо, федералдык бюджеттеги тартыштык кеминде келерки жылга чейин уланат, рублдин куну кетүүдө, өлкөдө кесипкөй жумуш күчү азайды, инфляция күчөөдө", - деп билдирди мекеме.
Deutsche Welle басылмасы белгилегендей, Орусиянын Украинага толук масштабдуу кол салуусунан бери Батыш өлкөлөрү анын жалпысынан 280 млрд евролук активдерин "тоңдуруп" коюшту, анын көпчүлүк бөлүгү Европа Биримдигинин (ЕБ) аймагында сакталууда. Евробиримдикте ал активдерди Орусия баштаган согуштун айынан Украина тарткан чыгымдын ордун толтуруу үчүн конфискациялоо сунушу айтылып, бул маселенин тегерегинде талкуу жүрүүдө. Айрым европалык өлкөлөр мындай демилгени колдосо, айрымдары каршы чыгып, Киевге ошол активдерден түшкөн пайыздык кирешени гана берсе болот деп сунуштоодо.
20-мартта Украина Евробиримдиктен 1 млрд евролук кезектеги жардам алды. Насыя түрүндө берилген бул каражаттын ордун Киев Орусиянын "тоңдурулган" активдеринин проценттик кирешесинин эсебинен жабат деп сүйлөшүлгөн.
Бейшемби күнү кечинде Орусия Кара деңиздин жээгиндеги Одесса шаарына сокку уруп, андан үч өспүрүм жарадар болду.
Ички иштер министрлигинин маалыматы боюнча дрон чабуулунун кесепетинен инфратүзүмгө, бир нече турак жайга жана коммерциялык имараттарга зыян келтирилип, өрт тутанды. Өндүрүш ишканалары, автоунаалар жабыркаганы да маалымдалды.
"Биз эч нерсе кыла алган жокпуз. Баары күйүп жатканда жөн гана туруп бердик. Мен кимге жардам сурап кайрылышты билген жокмун. Бул жерде биздин кардарлардын автоунаалары токтоп турган эле", - деди шаар тургундарынын бири.
Чехиянын президенти Петр Павел Орусиянын түнкү чабуулу учурунда Украинанын Одесса шаарында болгонун жума күнү украин бийлиги билдирди.
Одесса облусунун жергиликтүү бийлиги чех президенти бейшемби күнү Кара деңиздеги портко барганын маалымдады.
"Белгилей кетчү нерсе чех президенти менен жолугушуубузда душман Одесса облусуна кайрадан жапырт чабуул жасады. Бул бүткүл дүйнөгө дагы бир эскертүү: согуш уланууда, Украина күрөшүн улантууда", - деп жазды Одесса облусунун губернатору Олег Кипер Телеграмм каналына.
Орусия далай далилдерге карабастан Украинада жайкын тургундарга сокку урганын четке кагып, аскердик жайларды гана бутага аларын билдирип келет.
Ал арада АКШнын президенти Дональд Трамп жакын арада Киев менен Вашингтон сейрек кездешүүчү минералдар жана табигый ресурстар боюнча келишимге кол коёрун билдирди. Трамп 20-мартта Ак үйдө журналисттерге берген маегинде Украинадагы тынчтык келишимине жетишүү боюнча аракеттер "жакшы жүрүп жатканын" айтты.
"Бир нече мүнөт мурун маанилүү минералдарды жана сейрек кездешүүчү элементтерди өндүрүүнү кескин көбөйтүү боюнча буйрукка кол койдум. Бул биздин өлкөнүн алкагында чоң иш. Белгилүү болгондой, биз дүйнө жүзү боюнча сейрек кездешүүчү пайдалуу кендерди ачуу үчүн ар кандай жерлерде келишимдерге кол коюп жатабыз. Биз Украина жана Орусия боюнча жакшы ийгиликтерге жетишип жатабыз. Ошондой эле жакын арада Украина менен сейрек кездешүүчү кен байлыктар боюнча келишимге кол коёбуз"
Киев менен Вашингтон февраль айынын башында Украинанын стратегиялык минералдык ресурстарын өнүктүрүү боюнча кеңири келишим түзүүнү макулдашкан. Бирок 28-февралда Ак үйдөгү Трамп менен Зеленскийдин катуу кайым айтышуусунан кийин бул келишимге кол коюлбай калган.