Учкучсуз учак соккусунан Сумыда эки киши каза болду
Орусиялык дрондордун турак жай районуна жасаган соккусунан Украинанын Сумы шаарында эки киши каза болуп, дагы 12 киши жаракат алды. Бул тууралуу облустук аскердик администрация жана шаардын милдетин аткаруучу Артём Кобзарь билдирди.
Өзүнүн телеграм-каналындагы видео билдирүүсүндө Кобзарь шаарда бир нече күчтүү жарылуу болгонун айтты. Алдын ала маалыматтар боюнча, турак жай кварталына "Шахед" дрондору менен соккулар урулган.
Украиналык мониторинг каналдары Сумы, Чернигов жана Киев облустарынын үстүндө жыйырмадан ашык дрон бар экенин билдиришүүдө. Полтава облусунда да аба коркунучу жарыяланды.
17-ноябрь күнү кечинде россиялык аскерлер Сумыдагы турак жай кварталына ракеталык сокку урушкан. 11 киши каза болуп, ондогон киши жабыркаган.
Украинанын Сумы облусу Орусиянын Курск облусу менен чектешет, анын аймагына 6-августта Украина Куралдуу Күчтөрүнүн бөлүктөрү кирген. Андан кийин Орусия тараптан Сумы облусуна жасалган аткылоолордун интенсивдүүлүгү кыйла күчөгөн. Жергиликтүү администрация алты миңге жакын киши жашаган 23 калктуу конушту милдеттүү түрдө эвакуациялоо жөнүндө жарыялаган.
Путиндин жаңы ракета жөнүндөгү билдирүүсүнөн кийин президент Владимир Зеленский Украинанын өнөктөштөрүнө кайрылды
“Орусиянын Украинага каршы континенттер аралык баллистикалык ракетаны колдонушу бир жыл ичиндеги экинчи эскалация кадамы болуп саналат”, - деп билдирди президент Владимир Зеленский 21-ноябрь күнү кечинде.
Ушундайча ал Орусия президенти В ладимир Путиндин ракетаны колдонуу боюнча жасаган ачык билдирүүлөрүнө комментарий берди. Зеленский Днепрге жасалган ракеталык соккуну "бул согуштун масштабын жана катаалдыгын айкын жана олуттуу жогорулатуу" жана БУУнун Уставын бузуу деп атады.
Зеленскийдин пикиринде, мындай биринчи кадам Украинага каршы агрессия үчүн Түндүк Кореянын аскерлерин тартуу болгон.
"Путин бул эки кадамды тең дүйнөдөгү согушту кеңейтпөөгө чакырган бардык адамдарды этибарга албастан жасады. Ал Кытай, Бразилия, Европа өлкөлөрү, Америка жана дүйнөнүн башка бардык өлкөлөрү эмнеге чакырып жатканына көңүл бурбайт. Путин бул согушту – эч кандай себепсиз согушту баштаган жалгыз адам жана согуш миң күндөн ашык уланышы үчүн бардык аракеттерди жасап жаткан адам", – деп билдирди ал.
Украина: Путин тынчтыкка "сүйлөшүүлөр эмес, күч менен гана мажбурлоого болорун" далилдеди
Украинанын Тышкы иштер министрлиги Орусия президентинин жаңы баллистикалык ракетаны колдонуу боюнча билдирүүсүн "кылдаттык менен документтештирди". Бул тууралуу мекеме 21-ноябрда билдирди.
Ведомствонун айтымында, эл аралык укук көз карашынан алганда, бул сүйлөгөн сөзү Украинага каршы агрессия кылмышына жана андан келип чыккан бардык согуштук кылмыштарга "күнөөлүүлүгүн иш жүзүндө моюнга алуу" болуп саналат.
"Биз Путиндин бул жана башка ачык моюнга алууларын аны жана анын шериктерин жоопкерчиликке тартуу үчүн колдонобуз. Адилеттүүлүк сөзсүз болот", - деп кошумчалайт министрлик.
ТИМдин маалымат кызматынын билдирүүсүндө айтылгандай, Орусия президентинин билдирүүсү согушту улантууну каалаган жалгыз Орусия экенин көрсөтүп, Путин согуштун масштабын Иран менен Түндүк Кореянын жардамын тартуу менен кеңейтип жатканын билдирет.
Украинанын Тышкы иштер министрлиги ошондой эле Украина Орусиянын аймагындагы бардык мыйзамдуу аскердик объектилерге сокку урууга укуктуу экенин баса белгилеген: бул соккулар токтошу үчүн Орусия "агрессияны токтотуп, аскерлерин Украинанын эгемендүү аймагынан чыгарса жетиштүү".
Путин Украинага каршы орто аралыкка атуучу курал колдонулганын айтты
Орусия Украина аймагына орто аралыкка атылуучу өзөктүк эмес баллистикалык ракета менен сокку урду. Бул тууралуу 21-ноябрда орус президенти Владимир Путин билдирди.
"Орусиянын Куралдуу күчтөрү Украинанын коргонуу-өнөр жай комплексине караштуу объектилердин бирине куралдын бир нече түрү менен сокку урушту. Күжүрмөн шартта орусиялык орто аралыкка атуучу эң жаңы ракеталык системалардын бири да сыноодон өткөрүлдү, анда өзөктүк эмес, өтө катуу ылдамдыктагы баллистикалык ракета колдонулду", - деди ал.
Путин Украинанын Днепропетровск шаарынын аймагындагы эң ири жана Советтер Союзунан бери белгилүү болгон, азыркы кезде ракеталык техника жана башка курал-жарак өндүрүлүп жаткан өнөр жай комплекстеринин бирине сокку урулганын айтты.
Путин бул 21-ноябрда Орусияга каршы америкалык жана британиялык алыска атуучу курал колдонулган соккуга жооп болгонун белгиледи.
Украина 19-ноябрда америкалык ATACMS ыкчам-тактикалык ракеталарынын алтоо менен, 21-ноябрда британиялык Storm Shadow жана америкалык HIMARS системалары менен Орусиянын Украина менен чек арасындагы Брянск жана Курск облустарындагы аскердик объектилерге ракеталык сокку урганын билдирген Путин абадан коргонуу системалары бул чабуулдардын мизин кайтарганын айтты.
Путиндин билдиришинче, Брянскиде курал-жарак сакталуучу кампада ATACMS ракетасынын сыныктары түшкөн жерде чыккан өрт өчүрүлдү, олуттуу зыян келтирилген жок. Ал Курск облусунда "Север" аскердик тобунун командалык пункттарынын бири бутага алынганын, ошол жердеги аскерлер арасында каза болгондор, жараат алгандар бар экенин, командалык жана ыкчам курам жабыркабаганын маалымдады.
Киев Москва континент аралык баллистикалык ракета менен сокку урган болушу ыктымал экенин 21-ноябрда эртең менен билдирген. Орус аскерлери Украинанын түштүк-чыгышындагы маанилүү өнөр жай аймагы Днепропетровск облусуна, анын борбор калаасы Днепрге чабуул койгонун, баллистикалык ракетадан тышкары Х-47М2 "Кинжал" ракетасын, ошондой эле Х-101 канаттуу ракеталарынан жетини учурганын кабарлаган.
Украинанын абадан коргонуу күчтөрү Х-101 ракеталарынан алтоону атып түшүрүшкөнү маалым болгон.
Днепропетровск облусунун башчысы Сергей Лысак Орусиянын эң оор соккусу бүгүн ушул облуска туш келгенин, бир нече өнөр жай объектиси талкаланып, эки жерде өрт чыкканын айткан.
Украин президенти Владимир Зеленский Орусиянын жаңы куралы ылдамдыгы жагынан да, бийикке учуу жагынан да баллистикалык ракетадай экенин белгилеген.