АКШ Украинага 425 миллион долларлык жаңы аскердик жардам берилерин жарыялады.
АКШнын Коргоо министрлиги - Пентагон 1-ноябрда тараткан маалыматка караганда, бул ирет жардам топтому зениттик ракеталарды, снаряддар менен чопкутталган транспортторду камтыйт.
Украинанын Харьков облусунун полициясы 2-ноябрда билдиргендей, Орусиянын ракеталык соккусунан жараат алгандар 40 кишиге жетти.
1-ноябрда Харьков шаарында полиция кызматкерлери топтолгон жерге урулган соккуда бир полициячы набыт болду.
Украина соңку суткада да Орусиянын соккуларынан адамдар каза болгонун жана жараат алганын 1-ноябрда билдирди.
Херсон облусунда 19 калктуу пункт аткыланганын, билим берүү мекемеси жана бир нече үй кыйраганын, бир жергиликтүү тургундун өмүрү кыйылганын, дагы 13 киши жараат алганын аскердик администрация башчысы Александр Прокудин кабарлады.
Харьков облусунда да бир нече айылга чабуул коюлганын, эки киши жараат алганын, бирөө каза болгонун жергиликтүү бийлик башчысы Олег Синегубов маалымдады.
Мындан тышкары Днепр аймагына "Искандер-М" баллистикалык ракетасы менен сокку урулганы айтылды.
Ал тапта Түндүк Корея Орусиянын Украинага каршы согушуна жардам берерин расмий жарыялады.
1-ноябрда Москвада орус тышкы иштер министри Сергей Лавров менен жолугушууда бул өлкөнүн башкы дипломаты Цой Сон Хи түндүк кореялык аскерлер Орусияга жөнөтүлгөнү тууралуу билдирүүлөр боюнча түздөн-түз эч нерсе айткан жок, бирок Москваны согуш башталгандан бери колдоп келатканын жана жардамын улантарын айтты:
"Жеңишке жеткен күнгө чейин биз дайым орусиялык жолдошторубуздун жанында болорубузду дагы бир жолу ишендирип айтабыз", - деди ал.
АКШнын мамлекеттик катчысы Энтони Блинкен бейшембиде Орусияда Түндүк Кореянын 10 миң аскери жүргөнүн, анын 8 миңи Украина менен чектеш Курск облусуна жайгашып, жакын арада согушка салынганы жатканын 31-октябрда билдирген.
Москва менен Пхеньян ортосунда бекемделип бараткан аскердик кызматташтык аймактык гана эмес, глобалдык коопсуздукка олуттуу коркунуч жаратарын 29-октябрда Түштүк Кореянын президенти Юн Сок Ёл белгилеген.
Түндүк Корея Орусияга аскер жөнөткөнүн танып, бирок эгер ошондой болгон күндө да эл аралк нормаларга каршы келбей турганын билдирген.
Орусиянын президенти Владимир Путин 24-октябрда Түндүк Кореянын аскерлери Орусияга барганы тууралуу суроого жооп бергенде аталган өлкө менен стратегиялык өнөктөштүк тууралуу келишим бар экенин белгилеп, “эмне кылсак да өзүбүз билебиз” деген.
АКШнын мамлекеттик катчысы Энтони Блинкен бейшембиде Орусияда Түндүк Кореянын 10 миң аскери жүргөнүн, анын 8 миңи Курск облусуна жайгашып, жакын арада Украинадагы согушка тартылат деп күтүлүп жатканын билдирди. “Америка авазы” радиосу ал Кытайды таасирин колдонуп Пхеньянды Украинадагы согушка аралашуудан токтотуп калууга чакырганын жазды.
АКШнын мамлекеттик катчысы Орусия Түндүк Кореянын аскерлерине учкучсуз аппараттарды колдонууну үйрөтүп жатканын айтты.
Түндүк Корея ушул эле күнү заманбап, континенттер аралык баллистикалык ракетаны сыноодон өткөргөнүн жарыялаган. Жапониянын Коргоо министрлиги ракета биринчи жолу миң метр бийиктикте 85 мүнөттөй учканын кабарлады.
Украинанын армиясы 6-августта Орусиянын Курск облусуна кирип барып, ал жакта жүздөгөн чарчы чакырым аймакты ушул күнгө чейин өз карамагында кармап турат.
АКШ түндүк кореялык аскерлердин жаңжалга тартылышына олуттуу карап, Кремлди бул кадамдан баш тартууга чакырып жатат.
Москванын Бириккен Улуттар Уюмундагы (БУУ) туруктуу элчиси Нью-Йоркто 30-октябрда өткөн Коопсуздук кеңешинин жыйынында Орусия менен Түндүк Кореянын алакасы эл аралык укукка каршы келбестигин жана “үчүнчү өлкөгө каршы багытталбаганын” айтты. Василия Небензя ошондой эле түндүк кореялык аскерлердин фронтко салынганы тууралуу кабарларды четке какты.
Түндүк кореялык аскерлер Орусияга жайгаштырылганы тууралуу маалыматты алгач расмий Сеул бир нече жума мурда билдирген. Кийин бул кабарларды украин бийлиги, андан соң НАТО ырастады. (