Норвегия өкмөтү Румынияга 127 миллион доллар бөлүп жатканын жарыялады. Бул каражат Румыниянын НАТОнун мүчөсү катары Украинага жардам көрсөтүү максатында ракетадан коргоочу Patriot системасын берип, анын ордуна жаңысын сатып алууга кете турган чыгымынын бир бөлүгүнүн ордун толтурууга жумшалат.
Башында Бухарест АКШда жасалуучу мындай системасын Украинага бергени туура болобу же жокпу деп талкуулап жатканы маалымдалган. Украина Румыниядан Patriot алганын быйыл июнь айында ырастаган.
2017-жылы Румыния Patriot батареяларынан жетөөнө (жалпы баасы 4 миллиард долларлык) буюртма берген. Азыркыга чейин андай системалардан төртөө колуна тийген. Украинага бирөөнү бергенден кийин калган үчөөнүн экөө пайдаланууда турат. Patriot батареясынын ар биринин наркы 400 миллионго жетет.
Украина 2022-жылдын февраль айынан бери коңшусу Орусиянын толук масштабдуу агрессиясына каршы согушуп келе жатат. Курал-жарак жана каржы жагынан Батыштагы өнөктөштөрү жардам берүүдө. Өлкө НАТОго жана Европа Биримдигине мүчө болуу аракетин көрүүдө. (RK)
Чеченстандын башчысы Рамзан Кадыров Гудермес шаарындагы "Орусиянын атайын бөлүктөр университети" деп аталган жайдын имаратына "абадан учкучсуз учак чабуулу жасалганын" 29-октябрда билдирди. Аталган шаар Орусиянын курамындагы бул республиканын борбор калаасы Грозныйдан 40 чакырым аралыкта жайгашкан.
Орусия Украинага каршы согуш ачкандан бери Чеченстандын аймагына дрон чабуулу коюлган окуя буга чейин каттала элек болчу.
Кадыров Telegram каналына жазгандай, чабуул 29-октябрда эртең менен болду, натыйжада “окуу жайдын бош турган имаратынын чатыры күйдү”, эч ким жабыркаган жок, өрт өчүрүлдү.
Орусиянын аймагы Украинанын дрон чабуулдарына соңку кезде көбүрөөк кабылууда. Чеченстан Украинадан 500 чакырымдай аралыкта жайгашкан. Азырынча украин тарап Кадыровдун билдирүүсү боюнча комментарий бере элек.
"Орусиянын атайын бөлүктөр университети" деп аталган жай 2013-жылы ачылган. Ага орус президенти Владимир Путиндин ысымы ыйгарылган. Чеченстандын жетекчилигинин маалыматына караганда, согуш башталгандан бери ал жерде миңдеген киши аскердик даярдыктан өтүп, майданга жөнөтүлгөн.
Кадыров 16 жаштагы уулу Адамды бул жайдын куратору кылып дайындаганы быйыл апрель айында маалымдалган.
Киевде шейшембиге караган түндө Орусиянын дрон чабуулунан турак жайларгы зыян келтирилип, автоунаалар өрттөлдү. Шаардын аскердик администрациясы алты адам жабыркаганын билдирди. Бир адам бутунан оор жаракат алып, ооруканага жаткырылды.
Жергиликтүү бийликтин маалыматына караганда, дрондун калдыктары Соломенск жана Святошинск райондоруна түшкөн. Дүкөндө өрт чыккан. Абадан чабуул болору тууралуу эскертүүлөр төрт сааттан ашык жаңырып турду.
Харьковдун бийлиги түнкү саат 02:51де жер тамдарга ракета тийип, бир үй толугу менен талкаланганын, ондогон имараттар жабыркаганын билдирди. Төрт киши каза болгон.
Днепропетров облусунун Кривой Рог шаарында ракеталык аткылоодон бир киши каза таап, 14ү киши жараат алганын облустук аскердик администрациясы билдирди.
Орусия тарап Киев, Харьков жана Кривой Рогдогу соккулар тууралуу комментарий берген жок.
Түндүк Кореянын аскерлери Орусиянын Украина менен чектеш тилкесиндеги Курск облусуна жеткени анык экенин НАТО тастыктайт. Бул тууралуу 28-октябрда НАТОнун баш катчысы Марк Рютте билдирди.
Рютте мындай кадамды Орусиянын Украинага каршы толук масштабдуу согушундагы “олуттуу эскалация” деп атады жана орус президенти Владимир Путиндин согушта 600 миңден ашуун аскерин жоготкондон кийин “айласы куруп жаткандыгынын” белгиси экенин айтты.
Украинанын Аскердик чалгын кызматы түндүк кореялык аскерлердин алгачкы бөлүктөрү Орусиянын Курск облусуна жайгаштырылганын 24-октябрда маалымдаган.
Кошмо Штаттар Түндүк Корея Орусияга 3 миң аскерин жөнөткөнүн билдирген жана Москвага согушууга түздөн-түз жардам көрсөтүп жатканы үчүн Пхеньян тийиштүү кесепеттерге кабылышы ыктымал экенин эскерткен.
Орусиянын президенти Владимир Путин Түндүк Корея менен стратегиялык өнөктөштүк тууралуу келишим бар экенин белгилеп, “эмне кылсак да өзүбүз билебиз” деп 24-октябрда аталган өлкөнүн аскерлери Орусияга барганы тууралуу суроого жооп берип жатып айткан.
Орусиянын Украина менен чектеш тилкесиндеги Курск облусунун айрым айыл-кыштактарын азыркы тапта украин аскерлери ээлеп турат. Киев бул операциясынын негизги максаты өз жерин Орусиянын чабуулдарынан коргоо үчүн “буфердик зона” түзүү, согуш жана жоготуу деген эмне экенин орус тарапка да жеткирүү экенин белгилеген.