Тажикстанда 2015-жылдын март айында күчүнө кирген “Адвокатура жана адвокаттык ишмердик жөнүндө" мыйзамга ылайык, бир жыл бою өлкөдөгү адвокаттар аттестациядан өтүштү. Жыйынтыгында Юстиция министрлиги 312 гана укук коргоочуга ишмердик кылууга уруксат берди. Мыйзам кабыл алынганга чейин Тажикстанда миңден ашуун адвокат бар эле.
Файзинисо Вохидова бул ыкма адам укуктарын бузат деген турум менен аттестацияга катышкан жок. Мындан улам ага жумушсуз калуу көйгөйү жаралды.
- Миңден ашуун адвокат ишсиз калууда. Демек алар өлкөдөгү жумушсуздардын жана чет элге иш издеп кеткен мигранттардын катарын толуктайт. Балким арабызда чет элдик уюмдар менен иштеп, андан ары ийгиликке жетүүгө мүмкүнчүлүгү барлар чыгар. Тажикстанда мыкты юристтер иш таба албай жүрөт. Мен өз каалоом менен аттестациядан өтүүгө документ тапшырбай койдум. Себеби, 30 жылдан бери ушул тармакта иштейм. Бул мыйзам логикага гана эмес, Баш мыйзамга да дал келбей жатат. Конституция ар бир жарандын эркин жашап, иш табуусуна негизги көрсөтмө. Мен андан башка мыйзамды кабыл албайм.
Вохидованын оюнча, адвокаттарга байланыштуу жаңы мыйзамдын 17-беренеси Конституциядагы эркин ишмердик кылуу боюнча жазылган эрежеге каршы келет.
- Менин юрист болуп иштешиме уруксат бербей жатышат. Эмгек укугум жана жарандык укугум бузулууда. Менин өлкөм социалдык мамлекет болуп эсептелет. Төрт ай күттүм, анткени айрым адвокаттар жумушсуз калганына байланыштуу сотко кайрылышкан. Бирок андан эч кандай майнап чыккан жок. Балким мен Конституциялык сотко кайрылармын. Анткени “эмне үчүн сотко берип, маселени чечкенге аракет кылбадың” деген суроолор болушу ыктымал.
Расмийлер адвокаттарды аттестациядан өткөрүү мамлекетте укуктук чала сабаттуулуктун жайылышынын алдын алат деген ойду белгилешет. Мыйзам акыркы кездери укуктук нормаларды дурус билбеген юристтердин саны өсүп баратканына байланыштуу кабыл алынганы кабарланган.
Жаңы мыйзам бийликтин гана сөзүн сүйлөп, алардын эрежеси менен иштеген адвокаттарга ыңгайлуу экенин белгилеген Файзинисо Вохидова учурда эл аралык уюмдардан жооп күтүп жаткан кези.
