Баткендин Бужум айылындагы №8077 шайлоо участкасында бир адам башка бюллетенди кошуп электрондук кутучага салып жатканы тартылган видео териштириле баштады. Бул тууралуу Ички иштер министрлиги кабарлады.
Алдын ала маалымат боюнча, бир шайлоочунун кабыл албай койгон бюллетенин экинчи киши өзүнүн бюллетенине кошуп салып жатканы белгилүү болду. Факты райондук милициянын электрондук журналына катталган.
«Kloop.kg» сайты буга чейин өзүнүн социалдык тармактардагы баракчасында бир шайлоочу бир канча бюллетенди кутучага салып жаткан видеону жарыялаган.
Ошондой эле Кара-Суу районунун Нариман айыл аймагына караштуу Жаңы-Маала айылындагы №5221 шайлоо участкасында жергиликтүү кеңешке талапкерлердин акча таратып жатканы жөнүндө «Kloop.kg» сайтынын маалыматы текшерилип жатканы маалымдалды.
Аталган сайттын 3 миңдей байкоочусу жер-жерлерде жергиликтүү кеңештерге шайлоо жана референдумдун жүрүшүнө байкоо салууда.
Ош шаарында жана облуста саат 15:00гө карата шайлоого байланыштуу мыйзам бузуу жөнүндө 21 маалымат милицияда катталды. Алардын басымдуу бөлүгү добуш сатып алууга тиешелүү.
Ош шаардык милициясынын басма сөз катчысы Замир Сыдыков шайлоодо партиялар бири-бирин каралап, жалган маалымат таратып жаткан учурлар бар экенин билдирди.
Анын айтымында, 16 маалымат электрондук китепчеге катталган. Алардын сегизи добуш сатып алуу, төртөө шайлоонун жүрүшүнө тоскоолдук кылуу, төртөө ээнбаштыкка байланыштуу:
«Шайлоонун жүрүшүндө партиялар бирин-бири каралоо, беделин түшүрүү аракетин жасап, ар кандай белгилүү жана белгисиз фейктерди пайдаланып, ушундай аракеттерге барып жатышат. Айрым маалыматтар жалган болуп чыгууда».
Ал эми Ош облустук милициясы добуш сатып алуу, үгүт жүргүзүү жана коркутуп-үркүтүү боюнча беш маалымат текшерилип жатканын кабарлады.