Кожобек Рысбаев: Канча деген коррупционерлер, мүлкүн жашырып, көзүн май баскандар ушуга алып келди.
Сиз эми буга жол бербешиңиз керек. Экономика оңолуп, кедейчилик жоюлганда гана сизге ишеним болот.
Аида Касымалиева: Урматтуу Сооронбай Шарипович, ушул күндөрү биздин көз алдыбызда тарых жазылууда. Ар бир кабыл алынган чечимди кайра кайтарып алса болбойт. Ал чечимдер кандай жыйынтыкка алып келерин биз кийин гана көрөбүз.
Бүгүн калың эл сиздин кадырыңызды миң эселеп билип, кетишиңизге кайгырып турат. Эмитеден эле эл сизди сагына баштады.
Баары көрүп, бардыгын билип турушат. Кадырыңыз чыныгы калың журттун жүрөгүндө экен! Көрсө, атайлап жасалган кара пиар сизге жукпаптыр. Эл сыйлап, бул кадамыңызды алкоого алган учур! Мындай кадам, чыныгы элин сүйгөн, жерин сүйгөн адамдын колунан гана келет!
Мүмкүн сиздин душмандарыныз бүгүн кубанып, эртен эл сыяктуу кайгырышар... Аны мезгил өз ордуна коет...
Иса Өмүркулов: Садыр Нургожоевич, кадрларга аяр мамиле жасаңыз. Экономика жана социалдык чөйрөдөгү адистерди сактап калыңыз.
Саясий оппоненттерге куугунтук болбойт деп айттыңыз, бул сөзүңүз жакты. Куугунтук болбошу керек.
Бирок, парламентти таратууга азыр эч негиз жок. Бир ай калды. Мыйзамдуу нукка салалы баарын.
Бул окуялар бизге сабак болушу керек. Мурда революция беш жылда болсо, азыр үч жылга түштү. Жаштар, энергия келип атат, энергиядан эмоция көп. Алардын талабын эске аласыз деген ойдомун.
Айнуру Алтыбаева: Биз мажоритардык (бир мандаттуу) системага кайтпашыбыз керек. Бул аялдардын, прогрессивдүү жаштардын, алдыга карай жылуунун жолун тоскон система.