Осмоналиев: Садыр Жапаров өзү да кырдаалдын барымтасында калгандай туюлуп жатат
Мындай пикирин Жогорку Кеңештин IV чакырылышынын депутаты Каныбек Осмоналиев 15-октябрда «Азаттыктын» «Эксперттер талдайт» программасында билдирди. Ал кечээ президенттин жарлыгы менен өкмөт башчылыкка бекитилген Садыр Жапаровдун тарапкерлери бүгүн президентти кетирип, эми парламенттин кетишин талап кылып жатышканына түшүнбөгөнүн билдирди:
«Менде ушундай ой пайда болду: Садыр мырза өзү да кырдаалдын барымтасында калып жатат. Балким ал жерде түрдүү адамдар болуп жатканы да таасир этиши мүмкүн. «Кетсин» деп тургандардын көпчүлүгү жаштар, талаптары улам өзгөрүлүп жатат».
Каныбек Осмоналиев быйыл жазында Садыр Жапаровду абактан чыгарууну талап кылган митингден кийинки башаламандыкта кармалып, УКМКнын тергөө абагына камалган эле. Ага Жазык кодексинин 309-беренеси («Бийликти күч менен басып алууга аракеттенүү») боюнча айып коюлуп, сотко чейинки териштирүү башталган. Кийинчерээк саламаттыгына байланыштуу үй камагына чыгарылган.
Сариев: Конституциялык жол менен кетиш үчүн шайлоо өз мөөнөтүндө өтүшү керек
Кыргызстанда конституциялык жол менен кетиш үчүн парламенттик жана президенттик шайлоо өз мөөнөтүндө өтүшү керек. Бул тууралуу мурдагы премьер-министр Темир Сариев «Азаттыкка» берген комментарийинде билдирди. Анын айтымында, бүгүнкү шартта мыйзамга ылайык 20-декабрга чейин парламенттик, 15-январга чейин президенттик шайлоо өтүшү керек.
«Бирок «эки шайлоону бир күндө өткөрсөк болот» деп да айтып жатышат. Эгерде бул шайлоону өткөрбөсөк, конституциялык нуктан чыгып кетебиз. Бирок 2010-жылы өзгөчө шарт болуп калганда Убактылуу Өкмөт өзүнө бардык жоопкерчиликти алып, конституциялык реформа жүргүзүп, анын негизинде парламенттик шайлоо өткөргөн. Анда Конституциянын айрым пункттарын токтотуш керек. Бирок ал учурда өзгөчө шарт болгон үчүн эл аралык коомчулук, коңшу мамлекеттер аны кабыл алышкан. Бул жолу андай болбой калышы мүмкүн. Ошон үчүн саясатчылар акыркы абалды карап, конституциялык жол менен кетүүгө чакырышыбыз керек», - деди Сариев.
Темир Сариев президент Сооронбай Жээнбеков кызматтан кеткени жөнүндө видео кайрылуу кылып же арызын көрсөтсө ынанымдуу болмок деген пикирин кошумчалады.
Жогорку Кеңештин төрагасы Канатбек Исаев өз арызы менен президенттин милдетин аткаруудан баш тартты. Бул тууралуу Исаевдин партиялашы, «Кыргызстан» фракциясынын лидери Нурбек Алимбеков «Азаттыкка» кабарлады. Анын айтымында, парламент төрагасы президенттин милдетин аткаруудан баш тарткан.
«Бирок Канатбек Исаев Жогорку Кеңештин төрагасы бойдон кала берет», - деди Алимбеков.
Ошондой эле Нурбек Алимбеков 16-октябрда Жогорку Кеңештин кезексиз жыйыны чакырылганын жана анын жүрүшүндө Сооронбай Жээнбековдун президенттиктен кетүү боюнча арызы караларын маалымдады.
Премьер-министр Садыр Жапаров Кыргызстанда президент да, парламент төрагасы да кызматтан кеткенин жарыялады. Ал ушул мүнөттөрдө Эски аянтта чогулуп турган тарапташтарынын алдына чыгып сүйлөп төмөнкүдөй билдирү жасады:
"Бардыгы ордуна келди. Мурдагы президент Сооронбай Жээнбеков өз арызын жазып берип кетти. Спикер Канат Исаев анын милдетин аткаруу мүмкүн эмес экен деп, өзүнүн арызын жазып берди. Бүгүн президенттин милдетин аткаруучу жана премьер-министр деген кызмат мага өттү".