Милиция “Айт Айт Десе” жана “Temirov Live” долбоорлорунун кеңсесин жапты
Ички иштер министрлигинин (ИИМ) кызматкерлери 16-январда “Айт Айт Десе” жана “Temirov Live” долбоорлорунун Бишкектеги кеңсесинен техникасын алып кетип, эшигине мөөр басып жапты. Тергөөчү бул аракети тууралуу маалымат бербегенин кабарчыбыз билдирди.
16-январдын таңында “Айт, айт десе” жана “Темиров LIVE” долбоорлорунун, “Арча медиа” жана “ПолитКлиника” басылмасынын журналисттеринин үйлөрүндө тинтүү болгон. Кийинчерээк милиция аларды суракка алып кеткен.
ИИМ социалдык тармактардагы “Айт Айт Десе” жана “Temirov Live” баракчаларындагы массалык башаламандыктарга чакырык жасаган материалдарга байланыштуу кылмыш иши козголгонун кабарлады.
Маалыматка ылайык, ал материалдарды ИИМдин Тергөө кызматы кылмыштардын бирдиктүү реестрине каттап, соттук-лингвистикалык экспертиза дайындалган. 12-январда эскспертизанын корутундусу чыгып, “Айт Айт Десе”, “Temirov Live” баракчаларындагы материалдарда массалык башаламандыктарга чакырыктардын белгилери бар деп аныкталган.
ИИМдин Тергөө кызматы Кылмыш жаза кодексинин “Массалык башаламандыктар” беренесинин үчүнчү бөлүгү - “Бийлик өкүлдөрүнүн мыйзамдуу талаптарына жигердүү баш ийбөөгө жана массалык башаламандыктарга чакырыктар, ошого тете жарандарга зомбулук көрсөтүүгө чакырыктар” менен кылмыш ишин козгогон.
“Темиров LIVE” долбоорунун негиздөөчүсү, 2022-жылы Кыргызстандан күч менен чыгарылган журналист Болот Темиров “Азаттыкка” курган маегинде акыркы окуяларды анын командасынын журналисттик ишмердигине байланыштырды.
ИИМ алып кеткен журналисттердин тизмеси
16-январдын таңында “Айт, айт десе” жана “Темиров LIVE” долбоорлорунун мурдагы жана азыркы ондой кызматкеринин үйүндө тинтүү болуп, милиция аларды суракка алып кетти.
ИИМ алып кеткен журналисттердин тизмеси:
Махабат Тажыбек кызы, “Айт, айт десе” жана “Темиров LIVE” долбоорлорунун директору, Кыргызстандан чыгарылган иликтөөчү журналист Болот Темировдун жубайы;
Сапар Акунбеков, “Темиров LIVE” редакциясынын, “Айт, айт десе” долбоорунун кызматкери;
Азамат Ишенбеков, “Темиров LIVE” редакциясынын, “Айт, айт десе” долбоорунун кызматкери;
Айке Бейшекеева, “Темиров LIVE” редакциясынын журналисти;
Максат Тажибек уулу, “Темиров LIVE” редакциясынын кызматкери;
Акыл Орозбеков, “Темиров LIVE” редакциясынын кызматкери;
Тыныстан Асыпбек, “Темиров LIVE” редакциясынын мурдагы журналисти, учурда “ПолитКлиника” басылмасында иштейт;
Актилек Капаров, “Темиров LIVE” редакциясынын мурдагы журналисти; учурда "Алга Медиада" иштейт;
Сайпидин Султаналиев, “Темиров LIVE” редакциясынын мурдагы журналисти, учурда “Арча Медиада” (мурдагы Next TV медиасы) иштейт;
Жоодар Бузумов, “Темиров LIVE” редакциясынын мурдагы журналисти;
Жумабек Турдалиев.
Ички иштер министрлиги (ИИМ) “Айт Айт Десе” жана “Temirov Live” баракчаларындагы массалык башаламандыктарга чакырык жасаган материалдарга байланыштуу кылмыш иши козголгонун билдирди.
Иш Кылмыш жаза кодексинин “Массалык башаламандыктар” беренесинин үчүнчү бөлүгү “Бийлик өкүлдөрүнүн мыйзамдуу талаптарына жигердүү баш ийбөөгө жана массалык башаламандыктарга чакырыктар, ошого тете жарандарга зомбулук көрсөтүүгө чакырыктар” менен тергелип жатат.
“Темиров LIVE” долбоорунун негиздөөчүсү, 2022-жылы Кыргызстандан күч менен чыгарылган журналист Болот Темиров “Азаттыкка” курган маегинде акыркы окуяларды анын командасынын журналисттик ишмердигине байланыштырды.
Маданият министринин орун басары тинтүү, кармоолорду басым деп эсептебей турганын айтты
Маданият, маалымат, спорт жана жаштар министринин орун басары Марат Тагаев "Temirov Live" медиасынын ондон ашуун мурдагы жана учурдагы кызматкерлеринин үйү тинтилип, ИИМге күч менен суракка жеткирилишин сөз эркиндигине кысым деп эсептебейт. Бул тууралуу Тагаев 16-январда "Азаттыктын" "Эксперттер талдайт" программасында сүйлөп жатып билдирди.
"Кыргызстанда журналистика майдаланып, деградацияга учурады. Кыргыз журналистикасы өзгөрүшү керек. Маалыматты толук аңдабай туруп эле аны ашыра чаап жарыялоо көнүмүш адатка айланды. Андыктан соңку окуяны басым-кысым деп айтуудан алыс болууга чакырам", - деген Марат Тагаев.