Алмазбек Атамбаев элден кечирим сурады:
- Тарых ченеминен алып караганда алты жыл көз ирмемге барабар. Бирок мен үчүн чейрек кылымга барабар болду. Албетте, ойлогон ойду кыстаган турмуш жеңет дегендей көп нерсе колумдан келбей калды, убакыт да жетпей калды. Анткени, билесиздер, болгону акыркы 2-3 жылда стабилдүүлүк, тынчтык, ынтымак келип, иштегенге мүмкүнчүлүк болду. Бирок болбой эле өкүнөм. Айрым убада, ойлорумду ишке ашыра албадым ага кечирим сурайм, кыргыз элим! Кечирим койгула. Бирок толук ишенем, кыргыз көчү жолун улайт! Сооронбай Жээнбеков чогуу баштаган иштерибизди аягына чыгарат, таза жана адилеттүү ажо болот.
Экс- президент Алмазбек Атамбаев президенттик мөөнөтүндө аны колдогон жубайына, уят кылбаган уулдарына ыраазылык билдирди. "Элдин чыдамкайлыгы үчүн стабилдүү мамлекет курдук. Биздин башыбыздан оор сыноолор өттү. Биз анын баары бизди күчтүү кылды", - деди Атамбаев.
Алмазбек Атамбаев жаңы кызматка киришкен Сооронбай Жээнбековго ийгилик каалап, ал Кыргызстанды татыктуу башкарарына ишеним билдирди.
"2010-жылы 7-апрелде кан төккөн жигиттер болбогондо кыргыз көчү адашып жүрмөк", -деди Алмазбек Атамбаев. "Эгемендик үчүн баарыбыз кан төккөнгө даяр болушубуз керек, эгемендикти көздүн карегиндей сактайлы. Антпесек бизди урпактар кечирбейт", -деди Алмазбек Атамбаев.