Ант берүү аземи 24-ноябрда саат 10:00дө "Ала-Арча" мамлекеттик резиденциясынын «Энесай» залында башталды. Инаугурацияга 450 киши чакырылды. Бул салтанатка жалпысынан 8 млн 404 миң сом сарпталары кабарланды. Кыргызстанда мамлекет башчы алты жылга шайланат. Ушуну менен экинчи ирет өлкөдө президент тынч жол менен алмашууда. 2010-жылы референдум аркылуу шайланып келген өткөөл мезгилдин президенти Роза Отунбаева 2011-жылы 1-декабрда Алмазбек Атамбаевге мамлекет башчылык кызматты өткөрүп берген.
Алмазбек Атамбаев өзүнүн алты жылдык мөөнөтүнө "үзүлгөндү улаган жылдар болду" деп баа берди.
"Мамлекет оор жылдарды баштан кечирди. Алар бизди чыйралтып, күчтүү кылды. Биз Кыргызстандын тарыхындагы кыйын кезеңди басып өттүк деп ишенимдүү айта алам. Кыргызстан азыр чыныгы көз карандысыз мамлекет", - деди ал.
Кызматын тапшырып жаткан президент Алмазбек Атамбаев жаңы президентти куттуктады. "Менин кызматтык мөөнөтүм бүттү, кудайга шүгүр" деп айтты.
