Депутат Талант Мамытов: - Депутаттардын мени спикерликке көрсөтүү демилгесинен көп жакшы кабардар эмесмин. Бул бир эмес, бир нече депутаттын демилгеси болсо керек. Мага расмий айтылган эмес. Өлкөнү убактылуу башкаруу сунушу түшсө, ойлонуп, чечим кабыл алам. Эгерде ушундай чечим кабыл алынса, анда ойлоном, бирок расмий сунуш түшкөн жок. Түшсө кошумча маалымат берем. Медиа каражаттарында ушундай сөз болуп жатат.
Өкмөттүк аппараттын башчысы Бакыт Аманбаев: - Улукбек Кочкоров башка кызматка которулат. Аида Исмаилова бул тармакты билет деп, Социалдык өнүктүрүү министрлигине тандалды.
Депутат Сайдулла Нышанов: - Канатбек Исаевди спикерликтен кетирүү боюнча демилге көтөрүлүп, мага кол койдурганы келишти. Бирок мен ага кол койгон жокмун.
Парламентте талапкерлиги эмгек жана социалдык өнүктүрүү министрлигине каралып жаткан Аида Исмаилова 28-октябрда Жогорку Кеңештин жалпы жыйынында депутаттардын сынына кабылды.
Депутат Үмбөталы Кыдыралиев Исмаилованын пандемия учурунда шайлоого катышканын белгилеп, “Сиз сыяктуу чиновниктер бардык эрежелерди уятсыздык жана жоопкерчиликсиздик менен жерип, шайлоого барып, 5-октябрдагы окуяга салым кошту” деп айтты.
Исмаилова күнөөсү жок экенин белгилеп, шайлоого оору боюнча кырдаал жөнгө салынгандан кийин кеткенин айтты.
Ошондой эле ал парламенттик кайра шайлоого катышар-катышпасын так айткан жок.