1-июлда Бишкек шаарынын мэри Азиз Суракматов тургундарды митингдерге катышуудан баш тартууга чакырган. Эл арасында ушундай түшүндүрүү иштерин жүргүзүүнү райондук администрация жетекчилерине, квартал башчыларга жана үй комитетинин башчыларына тапшырганы тартылган видеону 24.kg агенттиги жарыялаган.
27-июнда Жогорку Кеңеш Атамбаевдин «экс-президент» макамын алып, кол тийбестиктен ажыраткан. Бул чечим укук коргоо органдарына аны кылмыш жообуна тартууга мүмкүнчүлүк берет.
Мурдагы президенттин тарапкерлери 22-июндан бери Кой-Таш айылындагы анын үйүнө «элдик штаб» ачып, чогулуп турушат. Бийлик Атамбаев жана анын тарапкерлеринин митинги тууралуу маалыматына расмий комментарий бере элек.
Президент Сооронбай Жээнбеков Атамбаевдин кол тийбестиги алынгандан бери эл алдында биринчи жолу 30-июнда, Суусамырда Кожомкул балбандын 130 жылдыгына арналган иш-чарада сөз сүйлөп, калкты ынтымакка чакырды.
"Медиа-Форум" алдында өтүп жаткан митинг. (Түз эфир)
Митингди ооган согушунун ардагери ыр менен ачты. "Соке болбой калды" деген митингге Жогорку Кеңештин айрым депутаттары келди.
Cаат 16:00дө башталары айтылган жыйынга Атамбаев өзү да катышары айтылган. «Азаттыктын» кабарчысы Жогорку Кеңештин депутаттары Ирина Карамушкина, Анвар Артыков Карамат Орозова келгенин билдирди.
