Линктер

ЧУКУЛ КАБАР!
9-Октябрь, 2024-жыл, шаршемби, Бишкек убактысы 00:24

Күрөш: Кыргызстан алтынчы медалды алды

Кыргызстандыктар Норвегиянын Осло шаарында өтүп жаткан Күрөш боюнча дүйнө чемпионатында байгеге ээ болгон спортчулардын алгачкы тобун тосуп алышты.

Кыз-келиндер күрөшүнөн кыргыз балбандары эки алтын, бир коло, эркин күрөштөн бир күмүш, бир коло, грек-рим күрөшүнөн бир күмүш байгеге ээ болушту.

Алтын байгелерди кыз-келиндер күрөшүнөн Айсулуу Тыныбекова (62 кг), Мээрим Жуманазарова (68 кг), күмүш байгени эркин күрөш балбаны Эрназар Акматалиев (70 кг), коло байгелерди кыз-келиндер күрөшүнөн Айпери Медет кызы (76 кг), эркин күрөштөн Алибек Осмонов (65 кг) алды. Грек-рим күрөшүнөн Жоламан Шаршенбеков 60 килограмм салмакта финалда молдовалык Виктор Чобану менен күрөшүп, күмүш медал тагынды.

9-октябрда грек-рим күрөшүнөн Калы Сулайманов (63 кг.) жана Марлен Асикеев (67 кг.) да килемге чыгып, байгесиз калышты. Сулайманов алгачкы беттешинде жапониялык Кензуке Шимизуга жеңилип жарыштан четтесе, Асикеев алгач украиналык Алексей Масюкту жеңип (7:4), 1/8 финалда мелдеш кожоюну Мортен Торесенге утулду (4:6).

Мелдеш 10-октябрда аяктайт. Дүйнө чемпионатына Кыргызстандан 15 балбан барды. Айсулуу Тыныбекова эгемен Кыргызстандын тарыхында Күрөш боюнча дүйнө чемпионатынын финалында эки жолу күрөшүп, эки жолу тең жеңишке жеткен алгачкы спортчу болуп калды. Ошондой эле спорттун олимпиадалык түрлөрүнөн дүйнө чемпионатында алтын байге алган алгачкы спортчу. Мээрим Жуманазарова Кыргызстандын тарыхында күрөш боюнча Дүйнө чемпионатын утуп алган Айсулуу Тыныбековадан кийинки экинчи спортчу. Ал эми Эрназар Акматалиев эркин күрөш боюнча Дүйнө чемпионатынын финалына чыккан алгачкы кыргызстандык. Жоламан Шаршенбеков грек-рим күрөшү боюнча дүйнө чемпионатынын финалында эки жолу күрөшүп, эки жолу тең күмүш байге алган алгачкы кыргызстандык спортчу.

23:46 8.10.2021

Норвегиянын борбору Ослодо 2-октябрда башталган күрөш боюнча дүйнө чемпионаты 10-октябрга чейин уланат.

4-октябрда кыргызстандык балбан Алибек Осмонов Норвегиянын Осло шаарында өтүп жаткан күрөш боюнча Дүйнө чемпионатында коло медал тагынды.

Биргелешкен күрөш дүйнөсү уюмунун расмий сайтындагы маалыматка таянсак, Осмонов 4-октябрда эркин күрөштөн 65 килограмм салмакта 3-орун үчүн беттеште польшалык Кристов Биенковскини 4:1 эсебинде жеңди.

Алибек Осмонов буга чейин төрт беттеш өткөргөн. Ал 3-октябрда алгач 1/16 финалда франциялык Маруан Ахмед Йеззаны 11:0 эсебинде, 1/8 финалда бразилиялык Маркос Де Брито Сикуеираны 12:2 эсебинде мөөнөтүнөн мурда жеңген. Чейрек финалда украиналык Васил Шуптар менен беттешип, 5:3 эсебинде утту. Жарым финалда ирандык Амирмохаммад Бабак Йазданичератти менен таймашып, 4:5 эсебинде бир упай айырма менен жеңилген эле.

Күрөштүн бул түрүнөн буга чейин кыргызстандык үч спортчу килемге чыгып, экөө мелдештен четтеген. Улукбек Жолдошбеков (61 кг.) менен Арсалан Будажапов (79 кг.) алгачкы атаандаштарына жеңилип, байге үчүн таймаштан четтеп калды.

XS
SM
MD
LG