Ош шаардык милициясы 10-июлда күндүзгү саат 1лер чамасында добуш сатып алууга шектүү дагы бир партиянын өкүлүн кармады. Мекеменин басма сөз кызматы кармалган киши бир добушту 2000 сомдон соодалаганын билдирди.
Жанынан 37 миӊ сом, партияга таандык күбөлүк, жарнамалык баракчалар табылганын маалымдады. Күч органдары кылмышка шектүү аял кайсы партиянын өкүлү экенин тактаган жок.
Коомдук тармактарда ал «Улуттар Биримдиги» партиясынын өкүлү экени айтылып, милиция кармаган учурдагы сүрөттөр жарыяланууда. Аталган саясий бирикменин маалымат катчысы Камил Сыдыков кармалган кишинин партияга тиешеси бар экенин ырастап, анын жанындагы акча өзүнө таандык экенин кабарлады.
Ош шаарында жалпы 1168 адам көчмө урна менен добуш берип жатат. Алардын басымдуусун майыптыгы бар адамдар жана кары-картаңдар түзөт.
Бул боюнча Ош аймактык шайлоо комиссиясынын төрагасы Урмат Аттокуров "Азаттык" радиосуна билдирди.
"Бүгүн көчмө урна менен шайлоодон 1168 адам өтүп жатат. Алар өздөрү арыз жазып, шайлоо участкасына бара албай турганын билдирген. Бүгүнкү шайлоонун жыйынтыгы эртеңкиге кошуп чыгарылат", - деди Аттокуров.
"Жалпы иш": шайлоо өнөктүгүндө Ошто мыйзам көп бузулууда
Шайлоого байкоо жүргүзгөн "Жалпы иш" коомдук фонду Бишкек, Ош жана Токмок шаардык кеңештеринин депутаттарын кайра шайлоонун жүрүшүндө 83 мыйзам бузуу фактылары аныкталганын кабарлады.
Алардын ичинен шайлоо алдындагы үгүт эрежелерин бузуу боюнча 65, добуш сатып алуу боюнча 11, административдик ресурстарды колдонуу, шайлоочуларга карата коркутуу жана кысым көрсөтүү боюнча беш факты.
Талапкерлерди каттоонун жол-жоболорун бузуу боюнча бир жана участкалык аймактык шайлоо комиссиясынын курамына байланыштуу дагы бир иш.
Фонд үгүт эрежелерин бузуу боюнча 65 фактынын ичинен Ош шаарынын аймактык шайлоо комиссиясына 52 арыз жана кайрылууларды берген. "Жалпы иш" эң көп мыйзам бузуу Ошто болуп жатканын кошумчалады. Бишкек шаарында 24, Токмокто жети факты катталган.
8-июлда “Улуттар Биримдиги” саясий партиясынын лидери Мелис Мырзакматов жергиликтүү TMG телеканалына берген маегинде, Ош шаардык кеңешине шайлоодо административдик ресурс колдонуу тыйылбай жатканын айткан.
“Бул шайлоодо деле мыйзам бузуулар катталууда. Шайлоо болбой жатып эле милицияга 18 арыз келди. Жергиликтүү бийлик мурдагы адатынан арыла албай жатат. Таза шайлоо өткөрүүгө көнө албай турат. Мурдагыдай эле мыйзам бузуулар кайталанууда. Президент таза шайлоо өткөрүү принцибин туу тутуп жатат. Бирок Ошто ошого каршы иштеп жатышат. Жөн эле айтып жатат да деген күчтөр да бар", - деген Мелис Мырзакматов.