Паспорт чыры: корейге айланган кыргыздар

Түштүк Кореяга кетүү максатында аты-жөнүн корейче өзгөрткөн 20га чукул жаран Мамлекеттик каттоо кызматынын өкүлдөрүн шылуундар менен кызматташып, документ жасашат деп айыптап чыгышты. Алар Bishkek Alliance LTD жоопкерчилиги чектелген коому Түштүк Кореяга виза алып берүүнү убада кылып, аталган мекеме кызматкерлери менен бирге документ даярдап, акысына үч миң доллардан жети миң долларга чейин алганын, бирок алдап кеткенин айтышууда. Алардын арызынын негизинде Бишкек шаардык милициясы кылмыш ишин козгоду. Бирок фирма жабылып, аны иштеткендер качып кеткени ачыкка чыкты.