Өзгөн районунун Кызыл-Октябрь айылында Кемпир-Абад суу сактагычы боюнча өтүп жаткан элдик курултай жыйынтыкталды.
Анда бир нече пунктан турган резолюция кабыл алынып, Кемпир-Абад суу сактагычын коргоо комитети түзүлмөй болду.
Курултайдын катышуучулары суу сактагыч жана анын аянтын Кыргызстандын менчигинде калтырууну, Кемпир-Абад суу сактагычына башка жерлерди алмашуу, делимитация жана деморкация иштерин токтотуп, ратификация өткөрбөөнү бийликтен талап кылышты. Делимитация жана деморкация боюнча мамлекеттик комиссияны кайрадан түзүү талабы айтылды.
Бул иштер токтобой турган болсо Кемпир-Абад боюнча кийинки элдик курултай Бишкекте өтө турганы белгиленди.
Экс-баш прокурор жана мурдагы элчи Азимбек Бекназаров Кыргызстандын президенти Садыр Жапаровду Кемпир-Абад суу сактагычы боюнча Өзбекстан менен макулдашкан документке кол койбоого чакырды.
Бул тууралуу ал Өзгөн районунун Кызыл-Октябрь айылында Кемпир-Абад суу сактагычы боюнча өтүп жаткан элдик курултайда сүйлөп жатып билдирди. Ал курултайдын жыйынтыгында кабыл алынган чечимдерди Өзбекстандын президенти Шавкат Мирзиёевге дагы жөнөтүүнү сунуштады.