Эл аралык арачылар Газада ок атпоо режимин улантуу аракетин көрүүдө
Шаршембиде ХАМАС (АКШ менен Евробиримдикте террордук деп таанылган) радикал уюму барымтадан туткундардын кезектеги тобун бошотсо, Израил түрмөлөрүнөн палестиндерди чыгара турганы кабарланды.
29-ноябрда Газада согушту убактылуу токтотуунун эки күндүк мөөнөтү аяктайт.
Израил өкмөтүнүн өкүлү Эйлон Леви Газадагы ок атпоо режими "үчкө бир" кишини айырбаштоо менен беш күнгө узартылышы ыктымал экенин шейшембиде билдирген.
AFP агенттиги өз булактарына таянып, ХАМАС радикал тобу дагы “ок атпоону төрт күнгө узартууга” макул экенин жазды.
Газадагы согушту токтотуу боюнча башкы арачы Катарда сүйлөшүүлөр уланууда. Доха шаарына АКШнын Башкы чалгын башкармалагынын жетекчиси Уильям Бёрнс, Израилдин Чалгын кызматынын (Моссад) башчысы Давид Барнеа жана Египеттин чалгын кызматынын жетекчиси Аббас Камел барганы маалым болду.
Бёрнс жана Барнеа Катардын премьер-министри Мохаммед бин-Абдурахманом Аль-Тани менен өзүнчө кезиккени тууралуу кабар тарады.
24-ноябрда жаатташкан эки тараптын ортосунда ок атышпоо жана туткундарды айырбаштоо боюнча макулдашуу күчүнө киргенден бери ХАМАС радикал уюму барымтадан жапысынан 51 туткунду бошотту. Израилдин түрмөлөрүнөн бошотулган палестиндердин саны 350гө жетти.
Газа: ХАМАСтын барымтасынан 12 туткун, Израил түрмөсүнөн 30 палестин бошотулду
28-ноябрда ХАМАС (АКШ менен Евробиримдикте террордук деп таанылган) радикал уюмунун барымтасынан дагы 12 киши бошотулду. Бул тууралуу Израилдин өкмөт башчысынын кеңсеси билдирди. Маалыматка караганда, бошотулгандардын баары аялдар. Арасында Таиланддын эки жараны бар.
Израилдин түрмөлөрдү тейлеген мекемеси макулдашууга ылайык 30 палестин шейшембиде эркиндикке чыкканын тастыктады.
Жаатташкан эки тараптын ортосунда ок атышпоо жана туткундарды айырбаштоо боюнча макулдашуу күчүнө кирген 24-ноябрдан бери ХАМАС радикал уюмунун барымтасындагы 51 израилдик жана 20дан ашуун чет өлкөлүк бошотулду. Чет элдиктерди алардын мамлекеттеринин бийлиги өз дипломатиялык каналдары аркылуу туткундан чыгууда.
Израил армиясы дүйшөмбүдө 11 туткунду өткөрүп алганын бышыктады. Алардын ичинде үч жашар эгиздер бар. Газа тилкесинде согушту токтотуунун башкы арачысы - Катар бийлигинин маалыматында барымтадан чыккандардын үчөө француз, экөө немис жана алты киши Аргентинанын жарандары экени белгиленген.
78 жаштагы Рути Мундер барымтада кызы жана небереси менен отурган. Ал туткунда «канчалык кыйын болсо» үмүт үзбөй отурганын Израилдин медиасына айтып берди. «Мен оптимисттик маанайда акыры бир күнү бошотушат деп эле отурдум. Биз го бул жерде аманбыз, канча кишинин канын төгүштү деп ойлодум. Менин уулумду Нир-Оз кибуцунда өлтүрүштү».
ХАМАС куралдуу тобу Израилге 7-октябрда кол салып, 1200дөй кишини жок кылып, 240тай адамды барымтага алган.
Дүйшөмбүдө Израилдин түрмөлөрүнөн 33 палестин (30 бала, үч аял) бошотулду. Жалпы эркиндикке чыккан палестиндердин саны 350гө жетет.
Алардын арасында Этаф Жарадат да бар. 51 жашка толгон күнү эркиндикке чыккан аял эки жыл мурун соттун чечими жок эле абакка камалган.
"Эркиндикке чыкканыма ишенбей турам. Түшүмдөй сезилет. Кудайдын кудурети менен болду го. Бул эркиндик канчалык кан төгүү менен коштолду", - деген палестин аял эки уулу, иниси Изарилде түрмөдө отурганын айтты.
Газа тилкесине Израил армиясы согуш ачкандан бери курчоодо турган анклавда гуманитардык кырдаал курч. Таза суу, тамак-аш, дары-дармек, күйүүчү май тартыш. БУУнун эсебинде, тилкедеги 2.3 миллион калктын 1.8 миллиону үй-жайын таштап, түштүк тарапка качууга аргасыз болду.
Хан-Юнисте баш калкалаган тургун Рами ал-Ризек согуш токтосо экен деп тилейт. "Эл эптеп күн көрүп жатат. Дагы канча күтөбүз? Баарыбыз кырылып калгыча күтөлүбү?", - деди ал журналисттерге.
Газада согуш башталганы 15 миңдей палестин набыт болуп, гуманитардык кризис уланууда. БУУ соңку беш күндө толук курчоодо калган анклавга гуманитардык жардам киргизүүнү көбөйттү. Бирок ал деле Газа тилкесинде аргасыз жер которгон 1.8 миллион тургундун "эң зарыл керектөөсүнө өп-чап жетерин" дүйнөлүк уюм эскертти.
АКШнын, Египеттин жана Катардын арачылыгы менен түзүлгөн төрт күндүк макулдашуунун алкагында ХАМАС барымтадагы 50 израилдикти кое бермек, ал эми Израил түрмөдөгү 150 палестинди бошотууга милдеттүү. Газа тилкесинде ок атышуу токтоп, гуманитардык жардам, анын ичинде күйүүчү май киргизилмек.
ХАМАС (АКШ менен Европада террордук деп таанылган) уюмунун барымтасынан бошотула тургандардын тизмеси Израил бийлигинин колуна 28-ноябрда тийди. Haaretz басылмасы кабарлагандай, өкмөт бул тууралуу алардын жакындарын кабардар кылды.
Алдын ала маалыматка караганда, шейшембиде дагы 10 израилдик туткун бошотулат. Ал эми Израил бийлиги түрмөдөн кое бериле турган палестиндердин тизмесине дагы 50 киши кошулганын билдирди. Алардын баары аялдар. Ушуну менен израил түрмөлөрүнөн бошотула турган палстиндердин саны 350гө жетти. Алардын 140ы буга чейин кое берилди.
ХАМАС радикал уюму менен Израилдин ортосундагы ок атышууну токтотуп, туткундарды айырбаштоо боюнча макулдашуу эки күнгө узартылган. Бул тууралуу эки тараптын ортосунда арачы болгон Катар менен АКШ 27-ноябрда билдирди. Ошол эле күнү кечинде мурунку төрт күндүк макулдашуунун алкагында ХАМАС куралдуу тобунун барымтасынан бошотулган 11 киши Израил тарапка өткөрүлүп берилди. Алардын арасында үч жаштагы эгиз балдар да бар экени кабарланды.
Ал эми Тель-Авив түрмөдөн 33 палестин аялды жана өспүрүмдү Эл аралык Кызыл Чырым уюмуна өткөрүп берди.
Макулдашуу күчүнө кирген 24-ноябрдан бери ХАМАС радикал уюму 60тай туткунду бошотту. Алардын арасында чет өлкөлүктөр мамлекет бийликтери менен түзүлгөн өз ара макулдашуунун алкагында эркиндикке чыгып жатышат.
АКШ, Египет жана Катардын арачылыгы менен түзүлгөн төрт күндүк макулдашуунун алкагында ХАМАС барымтадагы 50 израилдикти кое бермек, ал эми Израил түрмөдөгү 150 палестинди бошотмок. Газа тилкесинде ок атышуу токтоп, 200 жүк ташуучу унаа гуманитардык жардам жана төрт жүк ташуучу машине күйүүчү май киргизилмек.
ХАМАС куралдуу тобу Израилге 7-октябрда кол салып, 1200дөй кишини жок кылып, 240тай адамды барымтага алган. Израил аталган радикал топко согуш жарыялап, Газа тилкесине чабуулун баштаган. Андан бери ХАМАС көзөмөлдөгөн аймактын Саламаттык сактоо министрлиги 15-миңдей киши набыт болгонун билдирип келет. Бул санды көз карандысыз булактардан ырастоо мүмкүн эмес.
Газа: ХАМАСтын туткунунан, Израилдин түрмөсүнөн ондогон киши бошотулду
Ок атпоо режимин узартуу
Израил менен ХАМАС (АКШ менен Европа Биримдигинде террордук уюм деп таанылган) Газа тилкесинде ок атышууну токтотуу жана туткундарды айырбаштоо режимин дагы эки күнгө узартууну макулдашты. Бул тууралуу сүйлөшүүлөргө ортомчулук кылган Катардын тышкы иштер министрлигинин басма сөз өкүлү Мажид ал-Ансари Х (мурдагы Твиттер) социалдык түйүнү аркылуу жарыялады.
Израил ХАМАСтын согушкерлери күнүгө 10 кишиден бошотуп турса макулдашууну улам бир күнгө узартууга даяр экенин билдирген.
Израил өкмөтүнүн өкүлү Эйлон Леви буга чейин эгерде ХАМАС куралдуу тобу калган барымтадагыларды бошотууга макул болбосо ЦАХАЛ макулдашуунун мөөнөтү аяктар замат операциясын толук жандантарын билдирген.
БУУнун баш катчысы Антониу Гутерриш палестин анклавында гуманитардык тыныгууну узартып, ок атууну толук токтотууга үндөдү.
«Газанын, Израилдин жана жалпы эле аймактын элинин кызыкчылыгы үчүн ок атууну толук токтотууга жетишүү керек", – деп айтылат баш катчынын атынан тараган билдирүүдө.
БУУ соңку төрт күндө толук курчоодо калган анклавга гуманитардык жардам киргизүүнү көбөйттү. Бирок ал деле Газа тилкесинде аргасыз жер которгон 1.7 млн тургундун "эң зарыл керектөөсүнө өп-чап жетерин" дүйнөлүк уюм жарыялады.
Гутерриш барымтадагыларды тезинен бошотууга, бардык өлкөлөрдү «чөлкөмдүн туруктуу келечеги - эки мамлекет тууралуу чечимди" колдоого да чакырды.
Дүйшөмбүдө Евробиримдикке кирген өлкөлөр менен Араб мамлекеттеринин өкүлдөрү Барселонада жолугуп, согушту токтотууну талкуулашты.
Еврошаркеттин тышкы иштер мекемесинин жетекчиси Жозеф Боррелл от атпоо режимин улантууга чакырды. "Ок атууну токтотуу режими туруктуу жана көпкө созулушу үчүн аны дагы узартуу керек. Ошол маалда саясий чечимдерди үстүнөн иштөө абзел. Саясий чечим - зордук-зомбулуктун туңгуюк айлампасын түбөлүк жок кылуусу шарт".
Мурдарак Израилдин премьер-министри Беньямин Нетаньяху ок атууну токтотуу келишимин узартууга макул экенин, бирок жөөт армиясы ХАМАСты толук тыптыйпыл кылууну көздөгөн максатынан кайтпай турганын кайталаган. Ошол эле учурда мындай режим узартылса куралдуу топтор орун которуштуруп, көз жазгырып кетет деген тынчсыздануу да айтылган.
Газа тилкесинде ХАМАСтын согушкерлеринин барымтасында 50 күн отургандан кийин жакындарын көргөн туткундардын сезимин сөз менен жеткирүү мүмкүн эмес.
52 жаштагы Шарон Авигдори 12деги кызы Ноам менен 7-октябрдагы кандуу каргашада Израилдин Беэри конушунда барымтага алынган. Аларды жакындары Рамат-Гандагы Шиба медициналык борборунда жекшембиде чыдамсыздык менен күтүп турду.
Эне-бала 25-декабрда ок атпоо режиминин экинчи күнү 13 израилдик жана төрт чет элдик туткун менен кошо бошотулду. Шарондун келини Шошан Харанды, анын кызы Ади Шохамды эки баласы менен Беэридеги үйүндө отурган жеринен согушкерлер кармап кеткен. Бул эки аялдын биринин күйөөсү кол салууда набыт болсо, экинчисиники барымтада отурат.
Ушул тапта Газа тилкесинде согушкерлердин колунда 180 киши, анын ичинде ондогон бала калды. Алардын жакындары кандай болсо дагы туткундагыларды бошотууну талап кылууда.
Израилдин түрмөсүнөн чыккан палестиндер
АКШнын, Катардын жана Египеттин арачылыгы менен түзүлгөн макулдашууга ылайык, Израил түрмөлөрүнөн палестиндерди коё берип жатат. 30дан ашуун киши, негизинен аялдар менен балдар Рамаллага жекшембиде кайтып барды.
Алардын бири Мажд Фрейхаттын кубанычы көпкө созулган жок. Бир жарым жыл түрмөдө отуруп бошонгон палестин жигитке үйүнө келгенде аталаш агасы Жениндеги ЦАХАЛдын операциясында өлгөнүн угузушту.
"Кубанарымды же кайгырарымды билбей калдым. Биз түрмөдө отурганда Батыш Жээкте жана Газа тилкесинде эмне болуп жатканынан кабарыбыз жок эле. Урандынын алдында, кыйраган мечиттерде калган мусапырлардын, жашында жайран болгондордун жаткан жери жайлуу болсун», - деди жакынын жоктогон жигит.
Жекшембиде Израил 39 палестинди: алты аял жана 33 өспүрүмдү эки түрмөдөн чыгарганын медиа агенттиктер кабарлады.
Өткөн аптада Израил менен ХАМАС радикал уюмунунун ортосунда жетишилген макулдашууга ылайык, 24-ноябрдан тарта төрт күнгө согуш токтогон. Бул маалда толук курчоодо калган анклавга гуманитардык жардам кирип, ХАМАС радикал уюму барымтадагы 240тан ашуун туткундан 50нү, ал эми Израил түрмөдөн 150 палестинди чыгаруу милдетин алган.