Бул оюнда Кыргызстандын улуттук курама командасынын чабуулчусу Эрнист Батырканов дарбазачы катары оюнга чыкты. Ага мындай милдет жүктөлгөнү улуттук курама команданын үч дарбазачысы коронавируска шектелгендердин сары тизмесине киргенине байланыштуу болду.
Буга чейин жапон өкмөтүнүн COVID-19га каршы саясатына ылайык, жалпы машыктыруучулар штабы, администрация, оюнчу Бекжан Сагынбаев, дарбазачылар Эржан Токотаев, Кутман Кадырбеков жана Валерий Кашуба коронавирус илдетине чалдыкты деп шек саналгандардын тизмесине киргендиктен, оюндан четтетилген.
7-июнда Монголия курама командасы менен болгон оюнга кыргыз футболчулары дарбазачысыз чыгууга мажбур болгон. Оюнда дарбазаны коргоочу Айзар Акматов кайтарып, Кыргызстан курама командасы F тайпасында акыркы орунду ээлеп келе жаткан Монголия курама командасына 0:1 эсебинде жеңилди.
Кыргызстандын футбол союзунун президенти Канат Маматов коронавируска байланыштуу кырдаалга төмөндөгүдөй түшүндүрмө берди:
“Биз Жапониянын бардык көрсөтмөлөрүн так аткардык. Азыр баарыбыз оор учурда турабыз. Бул жерде бирөөнү күнөөлөгөн туура эмес. Оору ар бир адамга жугуп калышы мүмкүн. АФКнын сунушу менен бул беттештерди өткөрүүгө Жапония гана макул болду. Биз бул оюндарды Кыргызстанда өткөрө албайт болчубуз. Анткени бизде эл аралык талапка ылайык келген стадионбуз жок. Эми өткөрүп жаткан мамлекет кандай талап койсо, баарын аткарууга мажбурбуз”, - деди Канат Маматов.
Андан тышкары бүгүнкү оюнга коргоочулар - Тамирлан Козубаев менен Кайрат Жыргалбек уулу да катышкан жок. Экөө Монголия курамасы менен 7-июндагы оюнда жана 2019-жылы тажик футболчулары менен беттеште эскертүү алышкан. 2019-жылы Бишкекте болгон Кыргызстан менен Тажикстан командаларынын беттешинде эки эскертүү алганына байланыштуу, быйыл 7-июнда болгон Кыргызстан - Монголия беттешинен четтетилген команданын капитаны, коргоочу Валерий Кичин дагы бүгүнкү оюнга чыкпай калды. Ал дагы коронавируска шектелгендердин сары тизмесине кирип калган.
Канат Маматов журналисттердин суроосуна жооп берип жатып футболчулардын арасында эмдөөдөн өткөндөр да бар экенин кошумчалады.
“Кыргызстанда эмдөө ар бир адамдын каалоосу менен гана жасалат. Биз футболчуларды кыйнап вакцина алдыра албайбыз. Анын үстүнө ар кандай реакция жүрүп кетиши мүмкүн. Биздин футболчулардын көпчүлүгү ар кайсы чет элдик клубдарда ойнойт. Аларды бир убакытка чогултуп, беттешке даярдануу мүмкүн эмес. Анткени ар бир клубдун өз эрежелери бар. Жапония мамлекетинин талабы боюнча курама команда толугу менен бир делегация болуп бир күндө барышы керек эле. Азыр биз башка дарбазачы Павел Матяшты Жапонияга жөнөттүк. Ал бүгүн, 11-июнда Жапонияга жетет. Буюрса, 15-июнда Жапония менен боло турган оюнга чыгат деп үмүт артып турабыз", - деди ал.
1-таймга кошумча бир мүнөт убакыт берилди. Беттештин биринчи таймы бүтөрүнө саналуу секунддар калганда чабуулчу Мирлан Мурзаев кыргыз тараптын эсебине 5-голду алып келди. Мьянма - Кыргызстан 0:5
44-мүнөттө Алимардон Шукуров кезектеги голдун ээси болду. Мьянма - Кыргызстан 0:4
34-мүнөт. Кыргызстандын жарым коргоочусу Фархат Мусабеков чабуулчу Абай Боколеевден пас алып, бүгүнкү оюндагы 3-голдун автору болду. Мьянма - Кыргызстан 0:3.