Еврокомиссия дыйкандарга 500 миллион евро жардам берүү чечимин Брюсселдеги ири нааразылык акциясына тушташ кабыл алды: “500 миллион евро – бул реалдуу акча. Ал фермерлерге тамак-ашты жакшы көргөн бизге аны туруктуу негизде өндүрүүсүнө жардам көргөзүү үчүн берилет”,-деп айтты Еврокомиссиянын вице-президенти Юрки Катайнен Брюсселдеги маалымат жыйынында.
Евробиримдикке мүчө өлкөлөрдүн айыл чарба министрлери ушул дүйшөмбүдө чукул жыйынга чогулган кезде 5000дей фермер 1000дей тракторун Брюсселдин борборуна чейин айдап кирип, шаарга жүктөй келишкен тангак чөптөрдү өрттөп жиберишкен эле.
Нааразылык акциясы негизинен тынч өткөнү менен фермерлер полиция менен тирешкенге чейин барып, коопсуздук күчтөрү аларга каршы суу бүрккүчтөрдү колдонду.
Европалык фермерлердин бул жолку нааразылыгына эң биринчи кезекте эски континетте сүт баасынын мурдагыдан 20-30% арзандап кеткени түрткү берди окшойт.
”Сүттү азыркы баасында сатуу мүмкүн эмес. Эгер жакын арада өзгөрүүлөр болбосо, Европанын ири аймактары сүт өндүрүүчүлөрсүз калат”,-дейт Нидерланддын сүт өндүрүүчүлөр кеңешинин төрайымы Сиета Ван Кеимпема.
Нааразылыкка чыккан фермерлер өздөрүн саясаттын курмандыгы деп эсептешет. Алар азыркы кризистин башкы себебин Орусия Батыштын санкцияларына жооп чара катары киргизген азык-түлүк эмбаргосунан көрүшүүдө.
Европалык фермерлердин Copa-Cogeca уюмунун эсебинде, алардын Орусияга бир жылдык экспортунун акчалай көлөмү 5,5 миллиард еврого барабар эле. Азыр Европа фермерлери бул базарды жоготуп отурат.
Андыктан аталган уюмдун президенти Пекка Песонен өз билдирүүсүндө белгилегендей, Евркомиссиянын 500 миллон евролук жардамы фермелер үчүн жетишсиз, бул акча алардын жоготууларын жаба албайт.
Адистер Орусиянын эмбаргосунан тышкары Европада сүт, эт жана жер-жемиш өндүрүшүнө кедергисин тийгизип, дыйкандардын кирешесин азайткан жагдайлар катары быйыл жайдагы кургакчылыкты, Кытайдагы экономикалык басаңдоону да аташууда.
Еврошаркет буга чейин да Орусиянын жооп санкциясынан жабыр тарткан дыйкандарды колдоо боюнча бир катар, анын ичинде продукцияны бюджет эсебинен сатып алып, кампада кармап, базарга кийинчерээк чыгаруу өңдүү чараларды көргөн.
