Жылдызкан Жолдошева: Коррупция менен күрөш деп атасыңар. 20 миллиондон ашык чыгым келтирген энергетика министри Таалай Ибраев деген ушул жерде отурат. Доскул Бекмурзаев отурат. Кышта биз кыйналганы турабыз. Ошондуктан коррупция менен күрөшөбүз десеңер Садыр Нургожоевич, депутаттарды коркутпай, өз командаңыздан баштаңыз. Аларды калкалабаңыз.
Москва шаарынан келген "Ноокат" коомунун жетекчиси Толкунбай Акматов Бишкектеги элдик курултайда Орусиядагы мигранттарга байланыштуу бир катар маселелерди көтөрдү. Ал ошондой эле Кыргызстандын Орусиядагы элчиси Гүлнара-Клара Саматтын ишин сынга алып, ага чара көрүлүшү керектигин билдирди.
"Баарыңардын эле уул-кызыңар мусапыр болуп чет мамлекеттерде жүрөт, кыйналып тапканын силерге жөнөтүп, өлкөнүн бюджетине салым кошуп жатат. Москвадагы мигранттардын эң көйгөйлүү маселеси - бул каттоого туруу. Бул маселени чечет деген мигранттардын үмүтү чоң. Ушул маселени чечүүнү мигранттар аябай суранды. Анан "Мигрант" деген тиркеме чыгарса деп жатабыз. Аны "Түндүк" деген системага кошуп койсо, онлайн эле бардык документти бүтүрсө жакшы болмок. Дагы бир чоң көйгөй - маңзат менен кармалып, көптөгөн бала отурат. Алар эң аз дегенде 12 жылдан 25 жылга чейин кесилип кетип жатат. Ушуга байланыштуу роликтерди чыгарып, аны телевидение аркылуу таратып, "жолобогула" деп эскертүү керек болуп жатат. Бул жактан иш орундарын түзүп, сырттагы мигранттардын санын азайтсак. Москвада "Сахарово" деген борбордо мигранттар ар жылы медициналык кароодон өтүшү керек. Ошол кароону Кыргызстанда эле жүргүзгүдөй болсок жакшы болмок. Урматтуу президент, ошол жерде элчи эжебиз бар (Гүлнара-Клара Самат - ред), биз аны эл менен эмес деп көп айтып келдик. Анын маселеси Жогорку Кеңеште каралат деп жатты эле, бирок Баткен көйгөйү чыгып каралбай калды. Өзүнүн элин башка мамлекеттин коопсуздук кызматкерлерине салып берип жаткан элчинин бул кызматта иштегенге акысы жок", - деди Акматов.