- автор Айнура Жекше кызы
ДССУ эпидемиянын экинчи толкунунан коркуп турат
Дүйнөлүк саламаттык сактоо уюму кээ бир өлкөлөр айлап созулган карантинден даярдыксыз чыгууда деп эскертти. Глобалдык алкакта коронавируска 4,1 миллион киши кабылды, 286 миңден ашууну каза болду. Бирок эксперттер бул статистика чыныгы сандарды чагылдырбайт дешет.
Эксперттер жапырт тест жасоо жана инфекцияны алып жүргөндөр менен жакын байланышта болгон адамдарды аныктоо иши жолго коюлбаса, карантинден чыгып жаткан өлкөлөрдө эпидемиянын экинчи толкуну башталышы мүмкүн деп эскертишүүдө.
“Илдет аз санда, бирок жугузуп алгандар, алар менен байланышта болгондор иликтенбей жайыла берсе, вирус кайрадан күч алышы ыктымал”, - деди дүйшөмбү күнү Дүйнөлүк саламаттык сактоо уюмунун чукул кырдаалдар бөлүмүнүн жетекчиси Макл Райан.
Мындай чочулоо Түштүк Корея менен Германияда соңку күндөрү коронавирусту жуктуруп алгандар көбөйгөндөн кийин пайда болду.
Берлинде жайгашкан Роберт Кох атындагы Жугуштуу ооруларды изилдөө институтунун вице-президенти Ларс Шаде оорунун экинчи толкунунун алдын-алуу үчүн ар бир адам жоопкерчиликтүү мамиле кылышы керектигин белгиледи:
“Вирус мурдагыдан азайганы менен айланабызда бар. Таптакыр жок кылынмайынча, инфекциянын чынжыры пайда болбошу үчүн ар бирибиз аракет кылышыбыз керек. Башкача айтканда, жүрүм-турумду бүгүнкү шартка ылайыкташтыруу зарыл”.
Эки айдан бери сыртка чыгууга тыюу салынган Францияда чектөө чаралары алына баштагандан бери COVID-19дан өлгөндөрдүн да, жаңы бейтаптардын да саны көбөйдү.
Ал ортодо Орусия коронавирус жуккандардын саны боюнча дүйнөдө экинчи орунга чыкты.
Шейшембиде соңку 24 саат ичинде инфекция жугузган дагы 10 миң 899 адам аныкталды, 107 адам көз жумду. COVID-19 илдетине чалдыккандардын жалпы саны 232 миңден ашты, 43,5 миңдей бейтап айыкты.
Ооругандардын саны өскөнү менен президент Владимир Путин 11-майда иш эмес күндөрдүн мөөнөтү мындан ары узарбай турганын айтып, карантин чараларын жумшартууну ар бир аймактын жергиликтүү бийлиги өз алдынча чечерин билдирген.
Ал эми глобалдык алкакта коронавируска 4,1 миллион киши кабылды, 286 миңден ашууну каза болду. Бирок эксперттер бул статистика чыныгы сандарды чагылдырбайт дешет.
Кошмо Штаттарда дүйшөмбү күнү коронавирустун кесепетинен дагы 830 киши өлдү, оорунун айынан ажал тапкандардын жалпы саны 80 миңден ашты.
Бирок Statista порталынын маалыматына караганда, калкынын санын эске алганда COVID-19дан көз жумгандар боюнча Бельгия биринчи орунда турат. Ал жакта 1 миллион жашоочуга 757 өлүм туура келет, экинчи орунда Испания, андан ары Италия жайгашкан. АКШ бул кайгылуу стастистикада 9-сапта.
Жон Хопкинс университетинин маалыматына ылайык, Кошмо Штаттарда инфекция жугузуп алгандардын саны 1,3 миллиондон ашты.
Дүйшөмбү күнү Ак үйдүн кызматкерлерине президент Дональд Трамп отурган имараттын батыш канатына беткапсыз кирүгө тыюу салынды. Анын алдында вице-президент Майк Пенстин жардамчысы жана Трамп менен жакын иштешкен камердинер ооруп калган.
Жаңы коронавирус алгач тараган Кытайда турмуш акырындык менен эпидемияга чейинки калыбына келүүдө. Алсак, 11-майда Шанхайда Диснейленд паркы үч айлык тыныгуудан кийин көрүүчүлөргө эшигин ачты.
Бир суткада коронавирус дагы 7 адамдан табылды, 17 бейтап айыкты (видео)
Кыргызстанда соңку бир суткада коронавируска 1421 анализ жүргүзүлүп, алардын жетөөнөн вирус табылды. Бул тууралуу 13-майда саламаттык сактоо министринин орун басары Нурболот Үсөнбаев билдирди.
Алардын бирөө Ош облусунда, дагы бирөө Нарын облусунда жана Чүй облусунда бешөө.
Жалпысынан 13-майга карата Кыргызстанда коронавирус 1044 адамдын анализинен табылды, алардын 12си кайтыш болду. Айыгып чыккандары - 726.
Коронавирус коркунучуна байланыштуу Кыргызстандын айрым аймактарында өзгөчө абал режими жарыяланып, коменданттык саат киргизилген. Бул эреже 11-майдан тартып токтоду, бирок өзгөчө кырдаал режими уланууда.
ИИМ: Кыргызстандын Орусиядагы өкүлчүлүгүнүн эки кызматкеринен коронавирус чыкты
Бул тууралуу Кыргызстандын ички иштер министри Кашкар Жунушалиев парламенттин Конституциялык мыйзамдар, мамлекеттик түзүлүш комитетинин жыйынында билдирди. Анын айтымында, Орусиядагы Кыргызстандын Ички иштер министрлигинин өкүлчүлүгүндө төрт кызматкер иштейт. Учурда анын экөө коронавирус илдетине чалдыгып, ооруканада жатат.
«Ачык эле айтайын, төрт кызматкердин экөө коронавирус илдети менен ооруп калды. Аларды дарылоо боюнча Орусиянын ички иштер министрине кат жазып, телефон менен сүйлөшкөм. Алар жардам берип жатышат», - деди Жунушалиев.
Министр кызматкерлери кандай шартта вирус жугузуп алганын айткан жок. Саламаттык сактоо министрлигинин акыркы маалыматына ылайык, Кыргызстанда 22 милиция кызматкерине вирус жукту жана алар илдетке негизинен кызмат учурунда кабылган.
Орусияда соңку бир күндүн ичинде COVID-19 жуккан дагы 10 899 адам аныкталды. Ооруга чалдыккандардын саны 232 миңден ашты жана мындай көрсөткүч менен Орусия АКШдан кийинки эле экинчи өлкө болуп калды. Акыркы бир күндүн ичинде бул өлкөдө сөз болуп жаткан илдеттен 107 адам жан берди. Жалпысынан 43,5 миңдей киши айыкты.
Министрлик өзгөчө кырдаалдын мөөнөтү тууралуу маалымат берди
Кыргызстанда коронавируска байланыштуу киргизилген өзгөчө кырдаал режими качан алынары азырынча белгисиз. 13-майда онлайн брифингде «Өзгөчө кырдаалды алуунун болжолдуу мөөнөтү барбы?» деген суроого саламаттык сактоо министринин орун басары Нурболот Үсөнбаев:
«Божомол кыска болгону оң. Анткени жакын арадагы абалды эске алып, ошого жараша айткан туура. Узак мөөнөткө божомолдоо өтө кыйын нерсе. Бүгүнкү күндө эпидемиологиялык абал туруктуу болуп жатканын сактап калсак, ооругандар жана жугузгандар бара-бара азайса гана өзгөчө кырдаал режимин жумшартуу же алып салуу тууралуу сөз кылсак болот» деп жооп берди.
Үсөнбаев ага чейин Кыргызстанда коронавирус боюнча эпидемиологиялык абал «бир аз оңолуп келе жатканын» айтып, 13-майда соңку бир суткада вирус жети гана адамдан табылганын «көптөн күткөн көрсөткүч» деп атаган.
Ошону менен катар ар бир адам санитардык талаптарды аткарбаса, этият болбосо абал кайра курчушу ыктымал экенин эскерткен.
Жалпысынан 13-майга карата Кыргызстанда коронавирус 1044 адамдын анализинен табылды, алардын 12си кайтыш болду. Айыгып чыккандары – 726 адам.
Коронавирус өлкөдө аныкталганы тууралуу расмий маалымат алгач 18-мартта чыккан.