Орусия илдет жуккандардын саны жагынан АКШдан кийинки орунга чыкты
Орусиянын президенти Владимир Путиндин басма сөз катчысы Дмитрий Песков коронавирус жугузуп алды. Бул тууралуу кабарды ал ТАСС маалымат агенттигине ырастады.
Өткөн айдын аягында орус премьер-министри Михаил Мишустинге да коронавирус жукканы белгилүү болгон. Өкмөт башчынын милдетин убактылуу аткаруу биринчи вице-премьер-министр Андрей Белоусовго жүктөлгөн.
Орусияда соңку бир күндүн ичинде COVID-19 жуккан дагы 10 899 адам аныкталды. Ооруга чалдыккандардын саны 232 миңден ашты жана мындай көрсөткүч менен Орусия АКШдан кийинки эле экинчи өлкө болуп калды. Акыркы бир күн ичинде бул өлкөдө сөз болуп жаткан илдеттен 107 адам жан берди, ооругандардын жалпы саны 2116 миң киши болду. Жалпысынан 43,5 миңдей киши айыкты.
Президент Владимир Путин 11-майда Орусияда жалпы иш эмес күндөрдүн мөөнөтү мындан ары узарбай турганын айткан жана карантин чараларын жумшартууга байланыштуу ар бир аймактын бийлиги өз алдынча чечим кабыл аларын билдирген.
Ал арада Санкт-Петербургда коронавируска чалдыккандар дарыланып жаткан ооруканада өрт чыгып, беш адам каза тапты. "Тилсиз жоо" Ыйык Георгий атындагы оорукананын реанимация бөлүмүндө шейшемби таңда тутанган. Алдын-ала маалыматка караганда, өрттүн чыгышына өпкөнү жасалма дем алдыруучу аппараттын ишиндеги мүчүлүштүк себеп болгон.
"ТАСС" маалымат агенттиги каза болгондордун баары коронавирустан жабыркап, аппараттын жардамы менен дем алып жаткандар болгонун жазды. 150дөй киши коопсуз жайга көчүрүлдү. Окуя боюнча кылмыш иши козголду.
9-майда Москвада COVID-19дан дарылангандар жаткан ооруканада өрт чыгып, бир аял каза тапкан.
Петербург коронавирус жуктургандардын саны боюнча Орусияда үчүнчү орунда турат. 12-майга карата ал жакта бул инфекция менен ооругандардын саны 7700дөн ашты.
Самат Калыков: Абакта коронавирус жок
Жаза аткаруу мамлекеттик кызматынын (ЖАМК) басма сөз катчысы Самат Калыков бүгүнкү күндө Кыргызстандын түрмөлөрүндө коронавирустун алдын алуу боюнча чаралар көрүлгөнүн айтууда. Ал муну мурдагы өкмөт башчы Сапар Исаков тууралуу маалымат берип жатып билдирди:
"Коронавируска текшеребиз. Биздин "коронавирус жок" дегенибизге ишенбей жатышпайбы. ПЦР анализ алып, оорусу жок экенин көрсөтөбүз. ЖАМК тутумунда коронавирус жок. Тескерисинче, түрмөлөр азыр эң корголгон жер болууда. Муну соттолгондор өзүлөрү да айтып жатышат".
Мурдагы президент Алмазбек Атамбаевди колдогон Кыргызстан социал-демократиялык партиясы (КСДП) 30-апрелде карантин эрежелерине карабастан мурдагы өкмөт башчы Сапар Исаков колонияга которулуп, анын коопсуздугуна коркунуч жаралганын кабарлаган.
Бир нече күн мурда №1 тергөө абагынын бир кызматкеринен коронавирус табылганы расмий айтылган.
Тажикстанда COVID-19дан ажал тапкандардын саны 21ге жетти
Тажикстанда соңку бир күндүн ичинде коронавирус жугузуп алган дагы 49 адам аныкталды жана ооругандардын жалпы саны 661 адамга жетти. Саламаттык сактоо министрлиги илдеттен жалпысынан 21 адам мерт болгонун билдирди.
Мунун алдында Интернетте Тажикстанда коронавирустан ажал тапты деген адамдардын кошумча, бейрасмий тизмеси пайда болгон жана анда каза болгон кишилердин саны 140тан ашканы көрсөтүлгөн.
Бул тизмеде маркум жарандардын аты-жөнү толук көрсөтүлгөн жана оорусунун таржымалы учкай жазылган. Бул Интернет-порталды түзгөндөр мындай маалыматтардын баары ачык булактардан алынганын билдиришкен жана Саламаттык сактоо министрлигин "илдеттен көз жумган адамдар тууралуу маалыматты жашырып жатат" деп айыпташкан.
Күч органдары буга чейин коронавируска байланыштуу такталбаган маалымат тараткандар жазалана турганын эскертишкен.
Тажик бийлиги узак убакыт бою өлкөдө өпкөнү сезгенткен вирус жугузуп алгандар бар экенин бышыктабай келген. Дүйшөмбү 30-апрелде гана 15 учур катталганын маалымдаган.
- автор Ыдырыс Исаков
Казакстан: COVID-19га корогон 14 млрд. доллар, медкызматкерлердин талабы
Казакстандын президенти Касым-Жомарт Токаев өлкө коронавируска каршы күрөшкө 14 миллиард доллардан ашык акча жумшаганын билдирди. Бирок бул күрөшкө сарпталган суммага казакстандыктар таң кылып бүтө албай жатышат.
Медицина кызматкерлери убада берилген акчаны албаганын айтып жатышат. Ал эми жарандык активисттер ал акчанын эсебинен элдин насыялары кечилишин, андан сырткары ар бир жаранга 200 миң теңгеден акча таратууну талап кылууга камынышууда.
Биз болгону 7 миң теңгеден гана бир жолу кошумча акы алдык.
Нур-Султан шаарынан анча алыс эмес жердеги Кушчу айылынын «Тез жардам» кызматкерлери жыйын куруп, өкмөт убада кылган кошумча акчаны жетекчилигинен талап кылышты.
Буга чейин Казакстандын өкмөтү коронавирус убагында иштеген медицина кызматкерлерине кошумча акы төлөп берүүгө убада берген. Бирок «Тез жардам» кызматында иштеген фельдшерлерлердин айлыгы көтөрүлгөн жок. Жаш фельдшер Жарылкасын Өткүр уулу иштен кетүүгө даяр экенин айтты:
«Биз болгону 7 миң теңгеден гана бир жолу кошумча акы алдык. Ал акча март айынын аягында берилген. Андан бери эч кимге эч нерсе төлөнгөн жок. Жетекчилик болсо сый акы берилет деген убадасын кайталап келет. Бирок кана ошол сый акы? Мен азыр эле иштен кетүү тууралуу арыз жазганга даярмын. Иштегенге болбой калды».
Бул дарыгерлердин нааразылыгына президент Касым-Жомарт Токаевдин акыркы билдирүүсү себеп болду. Ал коронавируска каршы күрөшкө Казакстан 6 триллион теңге жумшаганын айтты. 6 триллион теңге азыркы баа менен санаганда 14 млрд. долларга жакын акча болот. Ал эми жөнөкөй жарандар 13 миллиард доллар коротулган менен өлкөдө кандайдыр бир кескин өзгөрүү болбогонун социалдык тармактарга жарыялашууда. Жарандардын суроосуна президенттин кеңешчиси Олжас Кудайбергенов жооп бергенге аргасыз болду:
«Жарандарга жөлөк пул катары 42 500 теңгеден төлөөгө 386 миллиард теңге бөлүндү. Жөлөкпул алуучулардын саны 4,5 миллионго жакын адам. Акчанын жарымын төлөп бүттүк. Калганын төлөп жатабыз. Медицина тармагынын кошумча чыгымдарына 125 миллиард теңге бөлүмдү. Мунун көп бөлүгү коротулуп бүттү».
Президенттин кеңешчиси «каражатты коротуу уурдоо дегенсөз эмес» деди. «Сөз болуп жаткан каражат конкреттүү мамлекеттик программаларды каржылоого жумшалган. Ал программалар жылдын аягына чейин аткарылат. Мисалы, жумуш орундарын түзүү программасына бир триллион теңге бөлүнгөн. Дагы 1 триллион теңге ишкерлерге насыя берүүгө коротулат», - деген кеңешчи буга окшогон 11 долбоорду атады.
Бирок бийликтин бул жоопторуна жарандык активисттер ишенген жок. Тескерисинче, алар коронавирус менен күрөш үчүн коротулган каражаттарды ачыкка чыгарууну жана элдин буга чейин алган насыяларын кечирүүнү талап кылышууда. Жарандык активист Жанболат Мамай талаптар аткарылбаса тынч митингге чыгышарын эскертти:
«Казакстандагы ар бир үй-бүлөгө 200 миң теңгеден таратылып берилсин. Анткени азыр алардын баары үйдө отурат. Акчасы жок. Алар азык-түлүк, дары-дармек сатып алыш керек. Андан сырткары чакан жана орто ишкерлерди кийинки 3-6 айга салыктан бошотуу керек. Эң башкысы Казакстандын ар бир жаранынын буга чейин алган насыялары кечилиши керек. Эгерде бул талаптар аткарылбаса, анда тынч митингге чыгууга аргасыз болобуз. Анткени бийлик митингден башка тилди түшүнбөй жатат».
Расмий маалымат боюнча Казакстанда коронавируска кабылган 5160 учур катталды. 32 адам каза болду. 16-мартта киргизилген өзгөчө абал 11-майда алынды. Бийлик карантиндик чектөөлөр этап-этап менен жоюларын билдирүүдө.