Президент Сооронбай Жээнбеков коронавирустан каза болгон медицина кызматкерлеринин жакындарына көңүл айтты. Мамлекет башчынын басма сөз кызматы тараткан кабарда ооруну жумуш учурунда жугузуп алып көз жумган алты адистин аты аталды. Алар:
- Ысык-Көл райондук аймактык ооруканасынын реанимация бөлүмүнүн анестезиолог-реаниматологу Сарыбагыш Иманалиев;
- Ысык-Көл районунун саламаттык сактоо боюнча координатору Бүбүайым Жээнбаева;
- Чүй районунун Үй-бүлөлүк дарыгерлер борборунун директорунун орун басары Күлжамал Жумабаева;
- Бишкек шаарындагы № 1 шаардык клиникалык оорукананын ыкчам терапия бөлүмүнүн башчысы Бегайым Исакова;
- Ак-Талаа райондук ооруканасынын хирургу Кубанычбек Карагулов;
- Ысык-Ата районунун Ново-Покровка айылынын үй-бүлөлүк дарыгерлер борборунун фелдшери Валерий Гауп.
Жээнбеков илдетке каршы күрөштө алдыңкы сапта жүрүп көз жумган медицина кызматкерлери пандемиянын бардык кыйынчылыгын биринчилерден болуп баатырдык менен тосуп алышканын, анын кесепеттерин жоюш үчүн күнү-түнү талыкпастан эмгектенишкенин белгиледи. (Толук маалымат бул жерде)
Боронов: Коронавирустан толук кутула элекпиз
- Бишкек шаарындагы №1 клиникалык оорукананын башкы дарыгери Жусуп Бошкоев иштен алынганын Саламаттык сактоо министрлигинин өкүлү Айнура Акматова 5-августтагы брифингде билдирди. Анын айтымында, №1 оорукана боюнча дооматты Саламаттык сактоо министрлигинде түзүлгөн атайын комиссия териштирип, ушундай чечим чыкты.
-
Бишкек шаарында коронавирус пандемиясынан 14 педагог кайтыш болду. Бул тууралуу Бишкек шаардык билим берүү башкармалыгынын жетекчиси Элмира Иманалиева 5-августта «Sputnik Кыргызстан» агенттигиндеги онлайн-брифингде билдирди. Анын айтымында, вирустан каза болгон педагогдордун сегизи мугалимдер, экөө мектеп директору, калганы бала бакчаларда иштеген кызматкерлер.
-
Кыргызстанда коронавирус боюнча абал жалпысынан дагы эле оор. Бул тууралуу 5-августта премьер-министр Кубатбек Боронов билдирди. Боронов белгилегендей, Дүйнөлүк саламаттык сактоо уюмунун (ДССУ) усулу боюнча, 14 күндө жаңы катталгандардын көбөйүш ыргагы Кыргызстанда 39,2% кемиди. Бирок оорунун күчөп кетүү коркунучу сакталып турат. Боронов Кыргызстанда коронавирустун экинчи толкуну болсо дарыгерлер жетишпей калышы ыктымал экенин да эскертти.
-
Кыргызстанда коронавирус пандемиясына каршы күрөш үчүн республикалык бюджеттен 2 миллиард 569 миллион сом сарпталды. Бул тууралуу 5-августтагы брифингде финансы министринин орун басары Сүйөркул Абдыбалы тегин билдирди.
-
Дүйнөдө коронавирустан көз жумгандар 700 миң кишиге жетти. Маалыматтарга караганда 15 секунда сайын бирден бейтап кайтыш болуп жатат. 206 миңден көп кишинин өлүмү катталган Латын Америкасы өлүм-житим жагынан Европадан ашып өттү. Өткөн жумада аймакта инфекциялангандардын саны 5 миллиондон ашкан. Көз жумгандардын саны боюнча АКШдан кийинки экинчи орунда келаткан Бразилияда коронавирустан 96 миңдей киши өлгөнү расмий бышыкталды. Мексика 49 миңдей кишисин жоготту. Буга карабай Латын Америкасындагы бир нече өлкө экономиканы жандандырыш үчүн карантин эрежелерин жумшартып жатышат. Шаршемби күнгө карай дүйнө жүзүндө коронавирусту 18 жарым миллион киши жугузуп алганы расмий катталды.
Кыргызстанда бир сутка ичинде 569 кишиден лабораториялык жол менен коронавирус аныкталды.
Саламаттык сактоо министрлигинин өкүлү Айнура Акматованын 5-августтагы брифингде билдиргенине караганда, вирус жугузуп алгандардын саны боюнча Бишкек шаары дале биринчи орунда.
Бир күн ичинде илдет табылган 569 кишинин 190у Бишкекте аныкталды. Ал эми Ош шаарында– 84, Чүйдө – 45, Ош облусунда – 64, Таласта – 43, Нарында – 13, Ысык-Көлдө– 41, Жалал-Абад облусунда – 47, Баткен аймагында - 42 адамдан COVID-19 табылды.
Расмий маалымат боюнча Кыргызстанда пандемия башталган март айынан бери коронавирусту 38110 киши жугузуп алды, анын 29510у айыкты. Вирустун курмандыктары 1438 кишиге жетти.
3-4-августтагы расмий маалыматтарда вирус жаңы аныкталган учурлар 400дүн тегерегинде болуп жаткан.
Дарыгерлер кырдаал турукташкандай туюлганы менен айрыкча аймактарда ооругандардын көбү ооруканага кайрылбай, үйдө дарыланып жатканын айтышууда.
- автор Айнура Жекше кызы
Пандемия токтобой жаткан кезде көпчүлүк өлкөлөрдө окуу жылынын башталышы менен "балдар мектепке кантип кайтат?" деген маселе баш ооруга айланды.
Анткени бардык гигиеналык нормалар сакталган кезде да окуучулар вирусту үйлөрүнө ташып келбейт деп эч ким кепилдик бере албайт. Инфекция жуктургандар 4,7 миллион кишиден ашкан Кошмо Штаттарда окуу жайлары сабак өтүүнүн түрдүү варианттарын сунуш кылып жатышат.
3-августта өлкөнүн башкы инфекционисти Энтони Фаучи балдардын мектептерге кайтуусун колдой турганын айтып, бирок ар бир жерде эпидемиологиялык кырдаалды эске алуу зарыл экенин белгиледи.
«Балдардын коопсуздугу, саламаттыгы биринчи орунда турушу керек. Мугалимдерди жана ата-энелерди, COVID-19дун үй бүлөлөрдүн башка мүчөлөрүнө жайылбашын да ойлош керек. Инфекциянын тарашы, вирусту жугузуп алуу ыктымалдыгы төмөн болсо, анда окуу жайларын ача бергиле. Бирок вирустун жайылышынын алдын алган бардык чаралар көрүлүүгө тийиш».
Мектептерди ачууну жактаган президент Дональд Трамп да жактап жатат.
Анткен менен бардык санитардык эрежелер сакталган учурда да окуучулар вирусту үйүнө ташып келет деген коркунуч жогору болууда.
Жаңы окуу жылы үстүбүздөгү аптада Жоржия, Луизиана, Миссисиппи жана Теннесси штаттарында башталууда. Айрым жерлерде сабактар класстарда өтсө, башка жактарда окуу онлайн уюштурулат. Башка мектептер аралаш форманы сунуш кылып жатышат. Лос-Анжелес, Филаделфия жана Вашинтон штаттары жок дегенде окуу жылынын башында мектептерди ачпай турууну оң көрүштү.
COVID-19 басаңдай электе мектептерге кайтуудан бир топ мугалимдер да чочулашат. 3-августта АКШнын ондогон аймагындагы окутуучулар окуу жайларын ачуу планына каршылыгын билдиришти.
Германияда мектептер ачылды, Италияда мугалимдер жетишсиз
Европада эпидемиянын экинчи толкуну камтама кылып жаткан кезде Германиянын түндүгүндөгү Мекленбург - Алдыңкы Померания облусунда дүйшөмбүдө жайкы эс алуу аяктап, түмөндөгөн окуучу класстарга кайтты. Өлкөдөгү бардык окуу жайлары марттын ортосунда жабылып, ошол бойдон ачыла элек болчу.
Италияда жүздөгөн мугалим сентябрда мектептер иштей баштаса, вирусту жугузуп алуу коркунучу жогору болот деп чочулап, жумуштан кетүүгө арыз тапшырышты. Билим берүү министрлиги бардык санитардык нормалар сакталарына убада бергени менен кесиптик кошуундар ошол эрежелер боюнча кошумча класстарды ачыш керек экенин, ага орун жетиштүү эмес экенин айтып келатышат. Мугалимдер тартыш болгондуктан, башталгыч класстарда диплом ала элек адистерге иштөөгө уруксат берилмекчи.
Боливия окуу жылын эрте бүтүрдү
Латын Америкасында окуу процесси онлайн уланууда. COVID-19 48 миңден ашуун адамдын өмүрүн алып кеткен Мексикада 30 миллиондон көп окуучу 24-августтан тартып аралыктан окумай болду. Билим берүү министри Эстебан Моктезума Баррагандын айтымында, сабактар теледен, алыскы аймактарда радиодон окутулмакчы. Министр бир катар өлкөлөр мектептерди ачып, бирок инфекция кайра тарап жаткандыктан, жабууга аргасыз болушканын кошумчалады.
Ал арада Боливия өкмөтү окуу жылы эрте аяктап жатканын билдирди. Анткени айыл-кыштактарда Интернет жок болгондуктан, билим берүү процессин камсыз кылуу мүмкүн эмес. Окуу жылы өлкөдө февралда башталып, ноябрда жыйынтыкталат.
Эки миллиондой окуучунун 80% жакыны мамлекеттик мектептерде билим алат. Жергиликтүү булактардын маалыматына караганда, боливиялыктардын 10% гана Интерентке байланышуу шарты бар, ал эми ЮНИСЕФтин изилдөөсү окуучулардын 40% эле онлайн билим алуудан пайдалана алганын көргөздү.