Президент Садыр Жапаров Улуттук коопсуздук боюнча мамлекеттик комитеттин (УКМК) төрагасы Камчыбек Ташиев Жогорку Кеңештин имаратына курал алып барганы “кичине ката” болгонун 9-октябрда “Кабар” маалымат агенттигине курган маегинде билдирди.
Мамлекет башчысы депутаттар арасында "Аскерлердин огу жок экен, автоматтары жетпейт экен, Ташиев эмне кылып жатат, чалгыны иштебей жатат" деген сын айтылганын, Ташиев эмоцияга алдырганын айтты.
Кыргызстандын Чек ара кызматы кыргыз-тажик тилкесиндеги бөлүктөр тийиштүү материалдык каражаттар жана азык-түлүк менен толук камсыз кылынганын Улуттук коопсуздук боюнча мамлекеттик комитет (УКМК) билдирди. Мекеменин басма сөз кызматы 8-октябрда билдирүү таратып, социалдык түйүндөрдө чек арачылар камсыз кылынбаганы тууралуу маалымат тарап жатканын, анын баары чындыкка дал келбей турганын белгиледи.
Бүгүн 8-октябрда Тышкы иштер министрлигине (ТИМ) Тажикстандын Кыргызстандагы элчиси Назирмад Ализода чакырылганын, министрликтин басма сөз катчысынын Фейсбуктагы жеке комментарийине карата тажик тараптын расмий протести орунсуз экени айтылган ТИМдин маалыматында.
Кыргызстан Жамааттык коопсуздук келишим уюмунун (ЖККУ) уставдык документтерине толуктоо киргизүүнү сунуштоодо. Бул тууралуу 8-октябрда Тышкы иштер министрлигинин басма сөз кызматы билдирди.
Мекеменин маалыматына караганда, 7-октябрда министрдин биринчи орун басары Нуран Ниязалиев уюмга мүчө өлкөлөрдөгү кесиптештеринин Армениянын борбор шаары Ереванда өткөн жыйынына катышты. Анда ал, кыргыз ТИМи билдиргендей, “Тажикстандын Кыргызстанга карата аскердик агрессиясынын кесепеттери тууралуу маалымат берип, мындан ары куралдуу кол салууга жол бербөө жана бардык келишпестиктерди ортодогу келишимдин жана уставдын негизинде тынч чечүү үчүн уюм ичинде механизмдерди тез арада ишке киргизүүгө чакырды”.
Ниязалиев ушул контекстте биргелешкен билдирүү кабыл алууну жана ЖККУнун уставдык документтерине кошумча киргизүүнү сунуш кылганы маалымдалды.
Ереванда өткөн жыйынга уюмга мүчө өлкөлөрдүн башкы дипломаттарынын биринчи орун басарлары катышты. Алар тышкы жана коргоо министрлеринин, президенттердин пландалып жаткан жыйындарында карала турган маселелерди талкуулашты.