Бүгүн, 9-февралда Бишкек шаарынын административдик соту "Азаттык Медиа" мекемесинин Финансылык чалгын кызматына каршы арызын кароону 16-мартка жылдырды. Процессте аталган медианын адвокаты Нурбек Сыдыков Чалгын кызматынын "Азаттыктын" банктагы эсебин бөгөттөө тууралуу буйругун берүүнү өтүндү жана судья бул өтүнүчтү канааттандырды. Бирок жоопкер тараптын жанында бул документ жок болгондуктан судья бул документти "Азаттыктын" юристерине берүүнү тапшырып, жараянды 16-мартка жылдырды.
Бишкек шаарындагы Ленин райондук соту “Азаттык Медианын” мекемесин Жалпыга маалымдоо каражаты катары ишмердигин токтотуу тууралуу Маданият, маалымат, спорт жана жаштар саясаты министрлигинин өтүнүчүн кароону 20-февралга жылдырды. Буга аталган министрликтин отурумду башка күнгө жылдыруу жана экспертиза дайындоо өтүнүнчү себеп болду. Доогер тараптын өкүлдөрү 9-февралдагы сот процессине келген жок.
Amnesty International: Кыргыз соту "Азаттык" аркылуу сөз эркиндигинин тагдырын чечет
9-февралда Бишкектин Ленин райондук соту Кыргызстандын маданият, маалымат, спорт жана жаштар саясаты министрлигинин «Азаттык» радиосунун ишмердигин токтотуу тууралуу арызын карайт. Буга утурлай баш кеңсеси Лондондо жайгашкан Amnesty International (Эл аралык мунапыс) уюму билдирүү таратып, кыргыз бийлигин соттон арызын кайтарып алууга, журналисттерди коркутуп-үркүтүүнү токтотууга, сөз жана ой-пикир эркиндигин чектебөөгө чакырды.
“Эртең (ред. 9-февралда) Бишкектеги сот бир гана “Азаттык” радиосунун эмес, иш жүзүндө өлкөдөгү сөз эркиндигинин тагдырын чечет. “Азаттык” радиосунун улуттук бюросу жабылса, Кыргызстандын бийлигинин мындай аракети сөз эркиндигине каршы масштабдуу ачык чабуул жана өлкөдөгү окуяларды ар кандай сынчыл көз караш менен чагылдырууга чыдамсыз мамиле катары бааланат. Amnesty International (“Эл аралык мунапыс” уюму) өлкө бийлигин бул арыздан баш тартууга, журналисттер жана өкмөттү сындагандарды куугунтуктап, опузалоону токтотууга, ойду эркин айтуу укугун толугу менен урматтоого, алга сүрөөгө жана аны ишке ашырууга көмөктөшүүгө чакырат», - деди уюмдун Чыгыш Европа жана Борбор Азия боюнча директорунун орун басары Денис Кривошеев. 9-февралда Бишкекте “Азаттык” радиосуна байланыштуу эки соттук отурум өтөт. Саат 9:30да Ленин райондук соту Маданият, маалымат, спорт жана жаштар саясаты министрлигинин “Азаттык Медиа” мекемесинин Кыргызстандагы ишмердигин токтотуу боюнча арызын карайт. Саат 9:00дө Бишкектин Административдик сотунда “Азаттык Медианын” жергиликтүү банк эсебинин бөгөттөлүшүнө байланыштуу Финансылык чалгын кызматына каршы арызы териштирилет.
Финансылык чалгын кызматы “Азаттык Медианы” былтыр 28-декабрда “Кылмыштуу кирешени адалдаштырууга” катыштыгы бардыгы тууралуу маалымат бар адамдардын, топтордун жана уюмдардын тизмесинен чыгарганы белгилүү болду. Бул тууралуу аталган орган 31-январда “Азаттыкка” жөнөткөн катында айтылат. Анда былтыр жыл аягында Финчалгын кызматы өз буйругу менен “Азаттыкты” кылмыштуу кирешени адалдаган уюмдардын тизмесинен Ички иштер министрлигинин кайрылуусунун негизинде чыгарганы белгилүү болгон.
“Азаттык Медианын” “Демирбанктагы" банк эсебине бөгөт коюлганы 31-октябрда кабарланган. 15-ноябрда Финансылык чалгын кызматы банк эсеби эмне үчүн бөгөттөлүп турганын түшүндүрүп, “Азаттык Медиа” “Кылмыштуу кирешени адалдаштырууга катыштыгы бардыгы тууралуу маалымат бар адамдардын, топтордун жана уюмдардын тизмесине” киргизилгенин, буга УКМКнын каты негиз болгонун расмий билдирген.
Финчалгын кызматы “Азаттык Медиа” бул тизмеге “Террордук ишмердүүлүктү каржылоого жана кылмыштуу кирешени мыйзамдаштырууга каршы аракеттенүү жөнүндө” мыйзамдын 14-беренесинин негизинде козголгон кылмыш ишинин алкагында киргизилгенин маалымдаган.
Бирок тиешелүү органдар ал иштин “Азаттык Медиага” кандай байланышы бар экени жөнүндө эч кандай түшүндүрмө бербей келет.
Финчалгын кызматы былтыр жыл аягында “Азаттыкты” шектүү уюмдардардын катарынан чыгарса да радионун “Демирбанктагы” банк эсептери ачыла элек. Буга чейин “Демирбанкка” кайрылган учурда “Азаттыктын” эсептери соттун чечими менен камакка алынганын билдирген. Бирок аталган мекеме кайсы иш жана кандай чечимдин негизинде болгонун түшүндүрбөй жатат.
"Азаттык Медиа" банк эсеби негизсиз бөгөттөлгөнүн жана мекемеде иштеген кыргыз жарандарынын, кызматкерлердин укуктары бузулуп жатканын белгилейт.