Түркияда апаатта 35 миңден ашуун киши набыт болгонун өлкөнүн президенти Режеп Тайып Эрдоган шейшембинин кечинде айтты. Курмандыктар 1939-жылы болгон катуу жер титирөөдөн ашып, Түркиянын жаңы тарыхындагы эң чоң апаат болуп калды.
Сирияда 6-фералда болгон жер титирөөдөн жана андан кийинки силкинүүлөрдөн өлгөндөрдүн саны 5800дөн ашты. Согуштун каарын тарткан өлкөдө гуманитардык кырдаал оор. Улуттар Уюму эки өлкөдө жалпысынан 7 миллиондой бала жабыр тартканын билдирди.
ЮНИСЕФтин басма сөз катчысы Жеймс Элдер:
“Сириянын түндүк-батышында ансыз деле чукул кырдаал өкүм сүрүп, холера илдетинен, ызгаардуу кыштан жана жаңжалдан жабыркаган төрт миллион киши гуманитардык жардам алчу”, - деди Женевада өткөн жыйында.
Түркиянын ишкерлер конфедерациясы табыгый апааттын чыгымын 84 миллиард доллардан ашат деп баалады. Президент Эрдоган куткаруу операциясына жалпысынан 250 миңдей киши тартылганын билдирди. Уранды алдынан аман калгандарды табуу үмүтү күн өткөн сайын азайып баратат. Кыргызстандык 200 куткаруучу жана алты дарыгер дагы апааттын алгачкы күнүнөн тартып куткаруу операциясына тартылган. Бишкектен 80 боз үй алып барып, зилзаланын очогу болгон Кахраманмараш шаарынын стадионуна тигип беришти.
Түркия менен Сирияда 6-февралда болгон катуу зилзаладан набыт болгондор 40 миңге чукулдады. Улуттар Уюму бул сан эки эсеге чейин көбөйүшү ыктымал экенин эскертти. Эки өлкөдө тең 800 миңдей кишиге тамак-аш жетпей, ачык асман алдында калды.
Түркиянын Табигый кырсыктарды жана өзгөчө кырдаалдарды башкаруу агенттигинин зилзаладан набыт болгондор 31 643 кишиге жеткенин, Сириядагы жоготуулар 5700дөн ашканын Улуттар Уюму кабарлады.
Уранды алдынан аман калгандарды табуу үмүтү барган сайын азайып жатат. 13-февралда бир үй-бүлөдөн үч аял, төрт жаштагы бир бала тирүү куткарылганы кабарланды. Алар уранды алдында 170 сааттан ашык калган.
Зилзалада кыйраган үйлөрдүн конструкциясынын талапка жооп бербегени үчүн Түркияда кеминде 131 киши суракка тартыла баштаганы кабарланды.
Жер титирөөдөн миңдеген киши жараат алып, миллиондон ашыгы үй-жайсыз калды. Өткөн аптада Дүйнөлүк саламаттык сактоо уюму зилзаладан 26 миллиондой киши жабыр тартканын билдирген.
Улуттар Уюму Башар Сирияда Асаддын режими көзөмөлдөгөн аймактар аркылуу Идлибге гумжардам жеткирүүнү уюштуруу аркетинде. БУУнун баш катчысынын гуманитардык маселелер боюнча орун басары Мартин Гриффитис жакын арада Идлиб провинциясына жардам жиберилерин билдирди. Ал Алеппого барганда
"Бул жердеги адамдардын азабын көрдүк, эми андан арылууга бүткүл дүйнө көмөктөшүүгө тийиш" - деп айтты.
Сириянын бул аймагына Испаниянын дарыгерлеринен башка эл аралык гуманитардык топтор кире элек. Жергиликтүү тургундар БУУну жана башка эл аралык агенттиктерди жардам жеткире албаганы үчүн сындап жатат.
Идлиб провинциясын исламчыл "Хайят Тахрир аш-Шам" тобу көзөмөлдөйт.
Түркия өз аймагы аркылуу Сириянын саясий режимине баш ийбеген райондоруна жол ачууга макул болгону кабарланды. Учурда Түркия-Сирия чек арасынын Баб ал-Хава бекетинен гумжардам кирүүдө.
Түркияда жер титирөөдө каза болгон Токтогул районунун Чеч-Дөбө айылынын тургунунун сөөгү Кыргызстанга алып келинди.
Маалыматты Өзгөчө кырдаалдар министрлиги 14-февралда билдирди.
Өзгөчө кырдаалдар министрлиги билдиргендей, 1986-жылы туулган аялдын сөөгү уранды астынан 11-февралда табылган.
Жакындарынын айтымында, маркум Түркияда үй кызматчысы болуп иштеп жүргөн.
Кыргызстандын Финансы министрлиги бүгүн, 14-февралда саат 10:00гө карата Түркиядагы жер титирөөдөн жабыркаган жарандар үчүн ачылган атайын эсепке 13 млн. 962 603.7 сом жана 12 550 рубл түшкөнүн маалымдады.
Түркиядагы жер титирөөдөн жабыркаган жарандар үчүн аталган министрликтин Борбордук казыналыгында атайын бирдиктүү депозиттик эсеп ачылган. Андан сырткары Кыргызстанда өз алдынча жардам чогулткандар болууда.