Түркия менен Сирияда 6-февралда болгон катуу зилзаладан набыт болгондор 37 миңден ашты. Түркиянын Табигый кырсыктарды жана өзгөчө кырдаалдарды башкаруу агенттигинин (AFAD) маалыматына караганда, зилзаладан набыт болгондор 31 643 кишиге жетти. Ал эми Сириядагы жоготуулар 5714 болгонун Бириккен Улуттар Уюму кабарлады.
Урандылардын алдынан аман калгандарды табуу үмүтү барган сайын азайып жатат. 13-февралда бир үй-бүлөдөн үч аял, ошондой эле төрт жаштагы бир бала тирүү куткарылганы кабарланды. Алар урандылардын алдында 170 сааттан ашык убакыт болушкан.
Зилзалада кыйраган үйлөрдүн конструкциясынын талапка жооп бербегени үчүн Түркияда кеминде 131 кишиге тергөө башталганы кабарланды.
6-февралдагы жер титирөөдөн миңдеген киши жараат алып, миллиондон ашыгы үй-жайсыз калды. 11-февралда Дүйнөлүк саламаттык сактоо уюму (ДССУ) зилзаладан 26 миллиондой киши жабыр тартканын билдирди.
БУУнун саламаттык сактоо мекемеси кырсыктан жабыркагандарга өтө зарыл жардамды уюштуруу үчүн тез арада 42,8 миллион доллар бөлүүгө чакырды. Уюм 15 миллион киши Түркияда жардамга муктаж болсо, согуштан талкаланган Сирияда 11 миллиондой адам башкалкасыз калганын билдирди.
13-февралда Бишкектен Түркияга дагы кошумча 35 куткаруучу жөнөп кетти. Алардын арасында үч дарыгер бар. Бул тууралуу Министрлер кабинетинин басма сөз кызматы кабарлады.
Маалыматка караганда, өзгөчө кырдаалдар министри Бообек Ажикеевдин жетекчилиги менен куткаруучулардан сырткары 49 боз үй, мобилдүү кийиз үй жана медикамент түрүндө гуманитардык жүк жөнөтүлдү.
Кыргызстандын Өзгөчө кырдаалдар министрлигинин басма сөз кызматы кабарлагандай, Түркиянын зилзала болгон Кахраманмараш шаарында иштеп жаткан кыргызстандык куткаруучулар жалпы төрт адамды урандылардын арасынан тирүү алып чыкты.
Маалыматка ылайык, 12-февралда саат 22:00 чамасында урандылардын арасында тирүү калган адам бар экени аныкталып, алты жарым сааттай тынымсыз казуу иштеринин кийин 50 жаштар чамасындагы эркек киши аман-эсен куткарылган.
Андан алдын, 7 жаштагы баланы уранды алдынан аман таап чыкан. 11-февралда кыргызстандык куткаруучулар жер титирөөнүн алтынчы күнүндө 22 жаштагы кош бойлуу келинди, 16 жаштагы өспүрүмдү уранды алдынан алып чыккан эле.
