Исмаил Исаков Кемпир-Абад боюнча келишимдин бир катар артыкчылык-кемчиликтерин белгилеп, сууну Өзбекстан менен тең пайдаланууну сунуштады.
Ош облусунун Өзгөн районунда Кемпир-Абад суу сактагычына байланыштуу курултай өтө турган жерге жүргүнчү ташыган кичи автобустар киргизилген жок. Өзүн Рустам Каныбаев деп тааныштырган жол коопсуздук кызматкери буга автоунаалардын каттамга чыгууга тийиштүү документтеринин жоктугу менен түшүндүрдү.
"Жүргүнчү ташыган транспорт ошол күндөгү каттамы боюнча уруксат алышы керек. Машина кароодон өтүп, белгиленген жерге барса болот деген уруксат берилет. Айдоочулар күндө эртең менен наркологиялык бөлүмдүн текшерүүсүнөн өтүш керек, спирттик ичимдик ичпегенин тактап, ушул каттамда каттайт деген кагаз берет. Ошол кагаздарды гана сурап жатабыз", - деди инспектор.
Өзгөндүн Кызыл-Октябрь айылында Кемпир-Абад суу сактагычына байланыштуу курултайга миңдей киши катышууда.
Кемпир-Абад боюнча курултайга келген Мамбетжунус Абылов бир кезде Леонид Кравчук кол койгон келишимди Путин сактабай жатканын, мындай маселе кийин кыргыз-өзбек алакасында да чыгышы мүмкүн экенин, маселени кынтыксыз чечүү үчүн элдик референдум зарыл экенин белгиледи.
Леонид Кравчук көз каранды эмес Украинанын туңгуч президенти. 1991-жылдын 8-декабрында ошол кездеги Орусиянын лидери Борис Ельцин, Беларустун жетекчиси Станислав Шушкевич менен СССРдин биротоло жоюлушуна алып барган Беловеж келишимине кол коюшкан. Кравчук быйыл 11-майда 88 жашында көз жумган.