Евробиримдиктин Орусияга каршы санкцияларынын 20-пакетинин алкагында Киев да Москвага жаңы санкцияларды киргизди. Бул тууралуу ишембиде украин президентинин кеңсесинин маалымат кызматы кабарлады.
Мекеме президент Владимир Зеленский Украинанын Улуттук коопсуздук жана коргонуу кеңешинин чечимдерин санкцияларга шайкеш келтирүү боюнча эки жарлыкка кол койгонун белгиледи. Жаңы санкциялар буга чейин украиналык чектөөлөрдө турган орусиялык 120 жаранды жана уюмдарды камтыйт.
Жаңы чектөөлөр орусиялык 16 жаранга, Орусия, Беларус, БАЭ, Казакстан, Кыргызстан, Өзбекстандын компанияларына жана Украинанын убактылуу баскынчылыкта калган аймактарындагы жалпы 31 ишканага тийиштүү.
Жарандардын арасынан "кара тизмеге" Орусиянын стратегиялык ишканаларынын, бюджеттик мекемелеринин, орус армиясынын жетекчилери жана Орусия басып алган аймактарда иштеп жаткан кызматкерлер кирерин "Азаттыктын" украин кызматы кабарлады.
Алардын ичинде прокурор Людмила Баландина, судья Дмитрий Гордеев жана "Россия-1" телканалынын "Вести" программасын алып барган Мария Ситтель бар. Киев аларды саясий чечимдерге катышы бар жана жалган маалымат таратууга айыптоодо.
Ишканалардын ичинен санкциялар Орусиянын коргонуу өнөр жай компанияларына, электрондук согуш системаларын, программалык камсыздоо жана дрон компоненттерин өндүрүүчүлөргө, ошондой эле мунай, газ жана алтын казуучу компанияларга киргизилди. Тактап айтканда, чектөөлөр Орусиянын аэрокосмостук жана дрон компоненттерин өндүрүүчүсү "Атлант Аэро" жана дрондор жана ракеталар үчүн байланыш системаларын жана компоненттерин чыгаруучу орусиялык "Ирз-Связь" компаниясына тиешелүү.
Мындан тышкары санкциялар украин тараптын арызы менен Бириккен Араб Эмирликтериндеги Орусиянын лабораториялары үчүн станокторду, жабдууларды, химиялык заттарды жана коммерциялык учактар үчүн тетиктерди саткан компанияларга, ошондой эле беларус мунайын экспорттоочуларга да киргизилди.
Санкцияларга Судандын 7, Ирандын 17 жараны жана баллистикалык ракеталар менен дрондорду өндүрүү программасы менен иштеген ирандык 11 ишкана да илинди.
Узап бараткан аптада Еврокомиссиянын төрайымы Урсула фон дер Ляйен Евробиримдик Орусияга каршы санкциялардын 21-пакетин даярдоого киришкенин билдирген. РБК жазгандай, анын мазмуну азырынча ачыкталбайт. Басылма согуштун экономикалык кесепеттери орусиялыктардын жашоосуна ачык тийе баштаганы Брюсселде белгиленгенин Урсула фон дер Ляйендин сөзүнө шилтеме кылып жазды.
Орусиялык аскерлер 30-майга караган түнү УкраинанынСумы облусунун Шостка аймагына учкучсуз учактар менен сокку урду. Жарандык инфраструктура объектилерине зыян келтирилип, имараттар талкаланды.
Турак жай жана турак эмес имараттарга, административдик жайларга жана транспортко да зыян келтирилгенин жергиликтүү облустук аскердик администрациясынын (ОВА) башчысы Олег Григоров өзүнүн Telegram каналына жазды. Анын айтымында, дрондордун бир бөлүгүн коргонуу күчтөрү жок кылууга жетишти.
Баштапкы маалыматтар боюнча, жабыркагандар жана каза болгондор жок.
Ошол эле учурда, 30-майда Запорожье облусундагы өнөр жай инфраструктурасына эртең менен жасалган соккудан бир адам жаракат алганын жергиликтүү бийлик башчысы Иван Федоров жазган. Жабыркаган адам 40 жаштагы эркек экени кабарланган. Кийин ал каза болгону маалымдалды.
Сумы облусунда бир сутка ичинде Орусиянын учкучсуз учактарынын чабуулунан бир адам - Краснополье аймагында 59 жаштагы эркек киши каза болгонун 30-май күнү эртең менен Григоров Telegram каналына жазды. Дагы эки адам - 48 жаштагы аял жана 65 жаштагы эркек киши жаракат алды. Облустун 11 аймагындагы 19 калктуу конушка 50дөн ашык сокку урулду.
30-майга караган түнү Орусиянын Куралдуу күчтөрү Украинанын аймагына жалпысынан алты Х-101 канаттуу ракетасын жана 290 сокку уруучу учкучсуз учагын, «Искандер-М» баллистикалык ракетасын учурду. Бул тууралуу Украинанын Куралдуу күчтөрүнүн Аба күчтөрү билдирди. Украиналык аскерлер 279 дронду жана беш ракетаны атып түшүрүп, токтотуп калууга жетишкенин билдиришти. Учкучсуз учактардын жети жерге тийгени жана дагы он жерге сыныктар түшкөнү катталды. "Мындан тышкары, душмандын эки ракетасы (канаттуу жана баллистикалык) бутага жеткен жок, алар боюнча маалымат такталууда", - деп кошумчалашты Украинанын Куралдуу күчтөрүнүн Аба күчтөрү.
Ишембиге караган түнү Орусиянын түштүгүндөгү Таганрог шаарында учкучсуз учактардын чабуулунан улам танкер, күйүүчү май куюлган резервуар жана административдик имарат өрттөнгөнүн Ростов облусунун губернатору Юрий Слюсар өзүнүн Телеграм каналында билдирди.
Слюсар кийинчерээк порттун аймагындагы танкердеги жана объектилердеги өрт өчүрүлгөнүн, сакталып турган мазут акпаганын жазды.
Ал ошондой эле Таганрогдогу жеке турак үйдө дрон соккусунан бир эркек киши жана бир аял жабыркаганын кабарлады. Слюсар түн ичинде жана эртең менен аймакта абадан жасалган чабуулдун мизин кайтаруу учурунда "дээрлик элүүгө жакын дрон жок кылынганын" белгиледи. Чабуул Таганрогдон сырткары Ростов-на-Дону, Сальск, Миллерово, Тарасов, Шолохов, Верхнедонской жана бир катар башка райондорго да жасалды.
Украиналык Exilenova+ Телеграм каналы Таганрогго жасалган "массалык чабуул" тууралуу жазып, жарылуулар авиациялык заводдун аймагында да болгону кабарланганын билдирди.
Украина Куралдуу күчтөрүнүн Учкучсуз системалар күчтөрүнүн командири Роберт Бровди өзүнүн Телеграм каналында түн ичиндеги чабуулдан Таганрогдо "Курганнефтепродукт" мунай базасы жана "көмүскө флоттун" танкери жок кылынганын жазды. Бровди ошондой эле жергиликтүү аскерий аэродромго жасалган соккудан улам Ту-142 үлгүсүндөгү суу астындагы кемелерге каршы эки учак жана "Искандер" ыкчам-тактикалык ракеталык комплекси жабыркаганын билдирди.
Орусия тарап аэродромго жасалган чабуул тууралуу кабарлаган жок.
Мындан сырткары Бровди Украинанын Куралдуу күчтөрүнүн Орусия басып алган Крымдагы Феодосия деңиз мунай терминалына жасаган түнкү чабуулу тууралуу да жазды. «Крым.Реалии» басылмасы Феодосиядагы мунай базасынан бир нече чакырымга созулган түтүндүн сүрөттөрүн жарыялоодо.
Краснодар аймагында дрон сыныктары түшүп, Армавирдеги кайра жүктөөчү мунай базасынын аймагында өрт чыкканын жергиликтүү ыкчам штаб билдирди. Маалыматка ылайык, жабыркагандар жок. Кийинчерээк өзгөчө кырдаалдар кызматтары мунай базасында тутанган өрт өчүрүлгөнүн маалымдашты.
Ыкчам штаб ошондой эле Приморско-Ахтарск шаарында украин дронунун сыныктары түшкөдө бир адам жабыркаганын кабарлады. Шаарда дрондун сыныктары алты даректен табылган. Жеке үйлөрдүн терезелери жана сырткы жасалгасы зыян тарткан.
Белгород облусунун губернатору Александр Шуваев өткөн суткада аймакка украин дрондору менен 55 жолу чабуул жасалганын билдирди. Шуваев украин тарап авиация жана артиллерияны колдонгонун айтууда. Ал чабуулдардын кесепетинен үч жай тургун каза болуп, дагы үчөө жаракат алганын кошумчалады.
Орусиянын Коргоо министрлиги өткөн түнү Украинанын 127 дрон чабуулун тосконун жарыялады. Аскерий мекеменин маалыматы боюнча, учкучсуз аппараттар Брянск, Волгоград, Воронеж, Курск, Орёл облустарынын жана башка аймактардын үстүнөн да атып түшүрүлдү.
Орусия аннексиялап алган Крымдын бийлиги бул аймакта АИ-95 үлгүсүндөгү бензинди сатууга чектөө киргизди. Москва дайындаган аймактын "башчысы" Сергей Аксенов 30-майдан тартып АИ-95 бензинин суткасына бир жолу 20 литрден ашык эмес сатып алууга уруксат берилгенин билдирди.
Аксенов ошондой эле жергиликтүү тургундардан "бензинди запаска албоону" өтүндү. Крымдын Отун жана энергетика "министрлиги" өзүнүн сайтында май куюучу станцияларда ар кандай маркадагы бензин бар экендиги жөнүндө маалыматты жарыялай баштады. Бирок 29-майдын кечинде АИ-95 тизмедеги 148 май куюучу станциянын көбүндө жок болгон.
Ошол эле күнү эртең менен аннексияланган Севастополдун "губернатору" Михаил Развожаев шаардын май куюучу станцияларында "логистикалык кыйынчылыктарга" байланыштуу АИ-92 жана АИ-95 маркасындагы бензин "убактылуу" жок болуп жатканын билдирди. Ошондой эле, анын айтымында, дизель майынын тартыштыгы пайда болду.
Бир жума мурда, 22-майда Севастополдун "бийлиги" Крымдын бардык аймагына бир унаага же канистрге 20 литрден ашык эмес деген чектөө киргизген.
24-майда Украинанын Запорожье облусунун оккупацияланган бөлүгүндө да май куюучу станцияларда күйүүчү май сатууга чектөө киргизилген.
Reuters агенттиги 20-майда расмий маалыматтарга жана өз булактарына таянып Орусиянын борбордук бөлүгүндөгү ири мунай иштетүүчү заводдордун дээрлик бардыгы акыркы жумаларда Украинанын дрон чабуулдарынан кийин күйүүчү май өндүрүшүн токтотууга же кыскартууга аргасыз болгонун билдирген. Толугу менен же жарым-жартылай ишин токтоткон мунай иштетүүчү заводдордун жалпы кубаттуулугу жылына 83 миллион тоннадан ашык же суткасына 238 миң тоннага жакынды түзөт. Агенттиктин анонимдүү булактарынын маалыматы боюнча, бул Орусиядагы мунай иштетүүнүн төрттөн бирин, бардык бензиндин 30% ашыгын жана дизель майынын 25% жакынын түзөт. Орусиянын Энергетика министрлиги Reuters агенттигинин комментарий берүү өтүнүчүнө жооп берген жок.
Экономист Вячеслав Ширяев 29-майда DW эфиринде Орусияда бензин өндүрүү боюнча иштеп жаткан кубаттуулуктун 45% гана калганын билдирди:
"Мага күн сайын адамдар бензин жок жерлер, 15 литрден берип жаткан жерлер тууралуу маалымат жөнөтүп турушат. Бул дээрлик Орусиянын борбордук аймактарынын баары".
Орусия коңшусу Украинага каршы толук масштабдуу согуш ачып, анын аймагын күн сайын дрон жана ракета менен аткылап келатканына бешинчи жыл болуп баратат. Соңку жылдары Орусиянын өзүнүн аймагы да бутага көп алынууда. Украина Орусиядагы чабуулдарга адатта комментарий бербейт, болгону, Москванын согуш машинасын токтотуу үчүн анын мунай жана аскердик продукция чыгаруучу ишканаларын жарактан чыгаруу керек деп эсептей турганын айтып калат.