Кремлде Орусиянын президенти Владимир Путин менен АКШ лидери Дональд Трамптын атайын чабармандары Жаред Кушнер, Стив Уиткофф жана Жош Гринбаум жолугушту.
Жолугушуудан кийин Путиндин жардамчысы Юрий Ушаков сүйлөшүүлөр төрт сааттай болгонун, "мазмундуу жана конструктивдүү", "ачык жана ишенимдүү" өткөнүн билдирди.
Анын сөзүнө караганда, тараптар 23-январда Орусия, Украина жана АКШ өкүлдөрүнөн турган жумуш тобунун үч тараптуу жолугушуусун Абу-Дабиде өткөрүүнү макулдашты. Орусиянын делегациясын Аскердик чалгын кызматынын башкармалыгынын жетекчиси Игорь Костюков баштап барат. Ошондой эле ал жакта экономикалык иштер боюнча эки тараптуу топтун жетекчилери - Орусиядагы түз инвестициялар фондунун башчысы Кирилл Дмитриев жана Стив Уиткофф да жолугушарын кошумчалады.
"Президенттин америкалыктар менен сүйлөшүүсү учурунда аймактык маселени Анкорижде (Аляска -ред.) макулдашылган формула боюнча чечпей туруп, кырдаалды узак мөөнөткө жөндөө мүмкүн эместиги кайрадан тастыкталды", - деди Ушаков.
Стив Уиткофф 22-январда Давостогу билдирүүсүндө тараптар Украинадагы согушту токтотуу боюнча келишимге жакындап калганын, чечилбеген жалгыз маселе – аймактарга көзөмөл кылуу экенин билдирген.
Путин америкалык чабармандар Уиткоф жана Кушнер менен Орусиянын АКШда камакта турган активдерин согушта жабыркаган аймактарды калыбына келтирүүгө пайдалануу боюнча сүйлөшүү мүмкүнчүлүгүн айткан.
Bloomberg агенттиги өткөн жумада Уиткофф жана Кушнер Путин менен жолугушууда АКШнын Украина боюнча тынчтык планынын маанилүү долбоорлорун тааныштырат деп жазган. Басылма жолугушуунун күн тартибинде Украинанын коопсуздугу үчүн АКШ менен Европанын кепилдиги жана өлкөнү согуштан кийинки калыбына келтирүү маселеси турганын кошумчалаган.
Уиткофф Путин менен Москвада декабрда да жолугушуп, алардын сүйлөшүүсү беш саатка созулган.
Орусия 2022-жылы 24-февралда Украинага басып кирген. Москва бул согушту "атайын аскердик операция" деп атайт.
23-январга караган түнү Пензага жасалган учкучсуз учактардын чабуулунан кийин мунай базасында өрт чыкканын облустун губернатору Олег Мельниченко маалымдады.
Анын сөзүнө караганда, түндө абадан коргонуу күчтөрү төрт дронду атып түшүргөн. "Биринин сыныгы мунай базанын аймагына түшүп, өрт чыкты. Азыр бул жерде ыкчам кызматтар иштеп жатышат", - деп жазды ал Телеграм каналына.
Украинанын мониторинг Телеграм каналдары Supernova+ жана Exilenova+ Телеграмга "Роснефть" компаниясынын аймактагы "Пензанефтепродукт" базасы тууралуу кеп болуп жатканын жазды.
Воронеж облусунда дрон сыныгы жер үйдүн чатырына тийип, өрт чыкканын аймактын башчысы Александр Гусев маалымдады. Анын айтымында, өрт өчүрүлдү, үйдүн ээлери туугандарынын үйүнө жеткирилди. Astra агенттигинин маалымдашынча, бул "Минудобрения" химиялык заводу жайгашкан Россошь шаарында болду.
Орусиянын Коргоо министрлиги 22-январь, саат 22:00дон тартып, 23-январь саат 7:00ге чейин жалпы 34 учкучсуз учак жок кылынганын билдирди.
Украин аскерлери түнкү чабуулдар тууралуу комментарий бере элек. Орусиядагы мунай базалар жана мунайды кайра иштетүүчү базалар акыркы убакта украин аскерлеринин негизги бутасына айланууда.
Орусия армиясы негизинен Украинадагы энергетикалык объекттерге чабуул коюп жатат, бул кышкы суукта электр энергиясы жана жылуулук масштабдуу түрдө өчүрүлүшүнө алып келүүдө.
Германиянын Тышкы иштер министрлиги Орусиянын элчисин чакырып, аскер атташесинин Андей М. аттуу орун басарын өлкөдөн чыгарууну талап кылды. Der Spiegel басылмасы жазгандай, мекеме элчиликтин кызматкери Германиядан 72 саат ичинде чыгып кетиши керектигин билдирген.
Немис бийлигинин маалыматына караганда, шектүү Орусиянын атайын кызматтарынын биринде иштеген жана узак убакыттан бери жакында тыңчылыкка айыпталып кармалган Илона Винер аттуу украин жаранынын ишине жетекчилик кылган.
Мекеменин маалыматына ылайык, Илона саясий иш-чаралардын катышуучулары, коргонуу объекттеринин жайгашкан жери жана Украинага дрон жеткирүү тууралуу маалыматтарды чогулткан.
Андан тышкары, тергөө божомолдогондой, Илона Германиянын Коргоо министрлигинин мурунку кызматкерлери менен тааныштыгы болгон. Алынган маалыматтарды ал өзүнүн орусиялык атайын кызматтагы жетекчисине берип турган. Spiegel басылмасы ал жетекчи өзүн элчиликте аскердик атташе деп көрсөткөн Орусиянын Башкы чалгын башкармалыгынын полковниги экенин жазды.
"Агентство" басылмасы Илонада Орусиянын паспорту да болгонун өз булактарынан аныктаган. Ага ылайык, Илона Винер Днепропетровскиде туулган, мурдагы фамилиясы Копылова болгон. 1987-жылы Копылова деген фамилия менен СССРдин, 2006-жылы Орусиянын паспортун алган. Ошондой эле анын үчүнчү фамилиясы – Крылова болгон.
Винер Федералдык кош улуттуу коомчулук бирикмесин (BBG) жетектеген. Бул түзүм 2022-жылы 17-марттан 2025-жылдын 17-октябрына чейин Германияда Бундестагдын лоббисттер реестрине киргизилген. Уюмдун аткаруучу лоббисттеринин ичинде Светлана Цюльсдорфф менен Светлана Бухин да аталган.
Цюльсдорфф (никеге чейин Зоткина) Москвада туулган, немец фамилиясын Wella компаниясынын мурдагы башкы директору Петер Цюльсдорфко турмушка чыккандан кийин алган.
Светлана Бухин (Шевченко) Львов облусунда туулган, кийин Орусияга кетип, немец жаранына турмушка чыгып, Берлинде жашап калган. Кеминде 2023-жылдын сентябрына чейин Орусияга орус паспорту менен барып жүргөнүн "Агентство" маалымдады.
Винердин орун басарларынын бири Вальтер Шторц мурда Германиянын Коргоо министрлигине караштуу мекемелердин бирин башкарып турган. 2025-жылы октябрда эле анын компаниясы Германиянын Куралдуу күчтөрү - Бундесвер менен чалгын машиналарын алып келүүгө 3 млрд евролук келишим түзгөн.
Москвадагы экинчи Батыш аймактык аскердик соту Орусиянын 2022-жылы 14-апрелде чөгүп кеткен "Москва" крейсери украин армиясынын чабуулуна кабылганын, жыйынтыгында 20 адам мерт кеткенин аныктады.
Соттун басма сөз кызматы бул маалыматты жарыялап, бирок кийинчерээк алып салганын "Медиазона" жазды.
Алынып салынган маалыматта сот крейсердин чөгүшүнө байланыштуу өкүм чыгарганы жазылган. Ага ылайык, украин Куралдуу күчтөрүнүн 406-артиллериялык бригадасынын командири Андрей Шубин сыртынан эл аралык терроризмге айыпталып, өмүр бою эркиндигинен ажыратылган.
Орусия тергөөсүнүн божомолуна караганда, Шубин Кара деңиздеги Жылан аралынын жанында "Москва" крейсерине жана "Адмирал Эссен" фрегатына ракета менен чабуул коюуну буйруган, аталган фрегат андан мурдараак да бутага алынганы айтылат. Сот ошондой эле украин аскеринен 2,2 миллиард рубль төлөтүү токтомун чыгарган.
Маалыматта сот алгачкы жолу "Москва" крейсери ракета чабуулуна кабылганын мойнуна алды деп белгиледи "Медиазона". Билдирүүдө ошондой эле крейсер чөккөндө набыт болгондордун тек-жайы расмий көрсөтүлүп, "жарылуудан, өрттөн жана ис түтүндөн экипаждын 20 мүчөсү мерт кеткен" деп жазылган. Ошондой эле 24 моряк түрдүү жаракат алганы, кеме сууда бир нече саат кармалып турганына карабай сегиз адам дайынсыз жоголгону белгиленген. "Адмирал Эссен" фрегатына урулган соккудан бир адам жаракат алган.
Орусиянын Кара деңиз флотунун флагманы саналган "Москва" крейсери Украина менен согушта колдонулган. Украин армиясы жана Пентагон 2022-жылы жазында кеме украин ракеталарынын соккусунан кийин чөккөнүн билдиришкен. Орусия тарап муну четке кагып, крейсердин чөгүп кетиши ок-дарылардын жарылышына алып келген өрттүн кесепетинен болгон деп ырастап келет.
Орусиянын Коргоо министрлиги башында крейсердин экипажы толугу менен эвакуацияланганын айтса, кийинчерээк 27 аскер кызматкери дайынсыз жоголгонун маалымдаган.
Кемеде набыт болгондордун айрымдары аскердик милдетин өтөп жүргөн жоокерлер болгон.
"Москва" крейсеринде набыт болгондордун так саны белгисиз эле.