4-ноябрга караган түнү Стерлитамак шаарындагы ишкана дрон чабуулуна кабылганын Башкырстандын башчысы Радий Хабиров билдирди.
Анын айтымында, эки пилотсуз учак тең атып түшүрүлдү, сыныктары өнөр жай зонасына кулап түштү. Бирок жетекчи кайсы ишкана тууралуу сөз болгонун айткан жок.
Ал эми шаардын мэри Эмил Шаймарданов нефтехимиялык заводдун цехинде жарылуу болгонун, ал жер жарым-жартылай ураганын маалымдады. Алдын ала кабарларга ылайык, ошол учурда цехте жүргөн беш кишинин эч кимиси жабыркаган жок.
Стерлитамак калктын саны жагынан жумурияттын Уфадан кийинки экинчи шаары, химия жана машина куруу өнөр жайынын ири борбору. Рейтер кабар агенттиги шаар украин чек арасынан бир жарым миңдей километр алыс жайгашканын белгилейт. Киев чабуулга байланыштуу комментарий жасай элек.
Украина жайында орус армиясын күйүүчү май менен камсыздаган мунай иштетүүчү завод, база жана терминалдарга чабул коюуну күчөткөн. Москва муну теракт деп атаса, Украина ал жайларды Орусия 2022-жылы баштаган согуштагы мыйзамдуу бута деп санайт.
Пентагон Ак үйгө алыска атуучу канаттуу Tomahawk ракеталарын Украинага берүүгө макул болгонун, эми акыркы сөз президент Дональд Трампта экенин CNN өзүнүн америкалык жана европалык булактарына таянып жазды.
Телеканалдын маалыматына караганда, аскердик мекеме макулдугун Ак үйгө октябрдын башында, Трамп менен украин президенти Владимир Зеленскийдин жолугушуусуна чейин берген. Ал кезде АКШ лидери Tomahawk Американын өзүнүн коопсуздугун камсыздоого керектигин айткан, азырынча расмий чечим кабыл алына элек.
CNN белгилегендей, Пентагон ракеталар Украинага берилсе АКШнын коргонуу мүмкүнчүлүгүнө терс таасир тийгизбейт деп эсептейт. НАТОнун башкы катчысы Марк Рютте Tomahawk маселеси дагы деле ачык турганын, ал бул тууралуу президент Трамп менен сүйлөшкөнүн билдирди. "Чечим Кошмо Штаттарда", - деди Рютте Лондондогу жолугушууда.
Дональд Трамп мурдараак эгер Орусия согушту токтотууга макул болбосо АКШ Украинага алыска атуучу канаттуу Tomahawk ракеталарын бере аларын билдирген.
Украина ракетанын бул түрүн алууга үмүттөнүп келет.
Москва эгер Вашингтон Украинага мындай ракета жагынан жардам берсе согуштун жүрүшүнө таасирин тийгизе албасын, бирок АКШ-Орусия мамилесине залакасын тийгизерин эскерткен.
Украин бийлиги 1-ноябрда Николаев жана Чернигов облустарын Орусия ракета менен аткылаганын билдирди. Николаевде адамдар жабыркаганын, тиешелүү кызматтар чабуулдун кесепетин жоюунун үстүндө иштеп жатышканын шаар башчысы Александр Сенкевич Телеграм каналына жазды.
Чернигов облусуна 1-ноябрга караган түндө Орусиянын учкучсуз учактары чабуул жасаган. Украинанын Чукул кырдаалдар кызматы маалымдагандай, 66 жаштагы аял жаракат алды. Айыл чарба ишканасынын кампасы өрттөндү. Бир катар административдик имараттар, бир үй жана автоунаа жабыркады.
1-ноябрь күнү дрон чабуулуна Новгород-Северский шаары да кабылганы кабарланды, ал жакта имараттар жабыркады.
Запорожье облусунун Орехов аймагына жасалган чабуулдан 72 жаштагы тургун жаракат алганын облус башчысы Иван Федоров билдирди. Полтава районунда дрон чабуулунан улам газ өндүрүүчү ишканада өрт чыкты. Чукул кырдаал кызматы өрттү өчүрүүгө 20дай техника, жүзгө чукул куткаруучу тартылганын, өрт таңкы алтыга жакын толук өчүрүлгөнүн билдирди. Жабыркагандар тууралуу маалымдалган жок.
Украин аба күчтөрүнүн маалыматына караганда, ишембиге караган түнү Орусия тараптан 223 дрон чабуул койду. Анын ичинен 206сы жок кылынды.
Орусиянын Украинадагы кеңири масштабдагы согушу башталганына 3,5 жылдан ашты. Согушту токтотуу боюнча дипломатиялык аракеттерден майнап чыга элек.
31-октябрга караган түнү Украинанын Сумы шаары Орусиянын дрон чабуулуна кабылганын, сокку жапырт урулганын, жарандык инфраструктура объектилери, үйлөр талкаланганын, кеминде 11 киши жараат алганын, арасында балдар да бар экенин, кээ бир жерлерде өрт тутанганын жергиликтүү бийлик өкүлдөрү кабарлады.
Сумы облустук аскердик администрациясынын башчысы Олег Григоровдун айтымында, бир саат ичинде эле бул аймакка он учкучсуз учак учурулду. 30-октябрда эртең менен да Сумыда май куюучу станция бутага алынып, төрт киши жараат алган. Эки күн мурда шаардын бир бөлүгү электр жарыгысыз калган.
Быйыл жыл башынан бери Орусия менен чектеш тилкеде жайгашкан бул аймакты орус аскерлери куралдын ар кандай түрү менен 543 жолу аткылады, натыйжада 72 кишинин өмүрү кыйылды, 434 киши жараат алды.
Өткөн түнү Харьков аймагы да орус армиясынын аткылоосуна кабылганы, темир жол ишканасы жабыркаганы кабарланды.
Жумага караган түнү дрон чабуулуна кабылганын Орусия да билдирүүдө. Бир нече аймактын жергиликтүү бийлик башчылары маалымдагандай, электр жарыгы менен камсыздоо иши үзгүлтүккө учурап, айрым жерлерде өрт чыкты. Орел облусунун губернатору Андрей Клычков билдиргендей, шаардын Жылуулук электр борборунун аймагына дрондун сыныктары түштү, ошондуктан электр тармагынын иши үзгүлтүккө учурады.
Владимир облусунун башчысы Александр Авдеев Владимир шаарынан анча алыс эмес жерде инфраструктурага чабуул коюлганын гана айтты, андан башка маалымат берген жок.
Орусиянын Коргоо министрлиги кабарлагандай, 31-октябрга караган түнү өлкө аймагында украиндердин жалпысынан 130 учкучсуз учагы жок кылынды.
Кээ бир шаарларда аэропорттор убактылуу иштебей турду.