22-октябрдын түнүндө орусиялык аскерлер Украинага дрон жана ракета менен чабуул койду. Киевде соккулардан эки адам каза тапты. Дагы 19 адам жабыркаган, арасында беш бала бар. "Төрт бала жана беш киши ооруканага жеткирилди", - деп билдирди шаар мэри Виталий Кличко.
Украинанын Өзгөчө кырдаалдар боюнча мамлекеттик кызматы шаардагы үч райондогу үйлөргө бомба түшкөнүн аныктаган. Андан тышкары автомобиль жана адам жашабаган имарат күйүп кеткен.
Киев облусунда атышуулардан төрт адам каза тапкан, арасында эки бала бар. Облустук администрациянын башчысы Николай Калашник Пореба кыштагында 1987-жылы туулган аял каза таап, алты айлык бала, он эки жаштагы кыз чарчап калганын билдирди. Алардын жасаттары өрт чыккан үйдөн табылган. Бровары районунда 1989-жылы туулган аял катуу жараат алган.
Николай Калашниктин айтымында, орусиялык аскерлер энергетикалык инфраструктураны бутага алган. Аймакта жарык берүүнү токтотууга туура келди.
Өзгөчө кырдаалдар боюнча мамлекеттик кызматы издөө иштерин жүргүзүп, урандыларды тазалап жатат. Чабуулдан 83 жаштагы аял каза болуп, куткаруучулар анын сөөгүн Броварыдагы күйүп жаткан үйдөн алып чыгышкан.
Запорожьеде түнкү чабуулдан кийин медициналык жардам сурап, 13 адам кайрылган. Он беш кабаттуу үй, жеке турак жайлар жана шаардын ар кайсы райондорундагы бош турган имараттар жабыркаган.
Шаршембиде эртең менен Харьковдогу бала бакча да соккуга туш болду. Соңку маалыматка караганда, бир киши мерт кетти, алты киши жарадар болду, бирөө эс учун жоготкон абалда жандандыруу бөлүмүнө жеткирилди.
Шаар башчысы Игорь Терехов орус тарап пилотсуз учактар менен чабуул койгонун билдирди. Анын айтымында, жабыркагандар арасында балдар жок. Ага чейин бир нече наристе жарадар болгону кабарланган. Дүрмөт тийген жерде өрт тутанып, бала бакчадагылар эвакуацияланды.
Украин президенти Владимир Зеленский түнкү чабуулдардан кийин өнөктөштөрдү Орусияга салынган санкцияларды күчөтүүгө, Киевди узак аралыкка учуучу ракеталар менен камсыздоого чакырды.
"Дагы бир түн Орусияга согушту создуктурбасын деген жетиштүү кысым жасалбаганын далилдейт. Түн бою жана эртең менен абадан коргонуу күчтөрүбүз, дрондорду атып түшүрүүчү экипаждар иштеп жатты. Соккулар тынч жаткан шаарларга, негизинен энергетикага урулду, бирок турак жайларга да бир топ дүрмөттөр тийди".
Орусия соңку соккуларга байланыштуу комментарий жасай элек. Ушундай аткылоолорго карабай Москва адатта аскердик жайларды гана бутага алганын айтып келет.
АКШ президенти Дональд Трамптын орус президенти Владимир Путин менен “жакынкы мезгилде” жолугушуу планы жок.
Бул тууралуу Reuters агенттиги Ак үйдөгү булактарына таянып таратты. Мындай маалыматты CBS News жана CNN баштаган бир нече америкалык каналдар да билдирүүдө. NBC News каналынын булактары Будапештте өтөрү пландалган Трамп менен Путиндин жолугушуусуна даярдыктарга “пауза” берилгенин кабарлашкан.
Андагы маалыматка ылайык, АКШ президенти эки тарап азырынча сүйлөшүүлөргө даяр эмес деп эсептейт. Бирок Трамп бул боюнча комментарий бере элек. Будапешттеги жолугушуу кийинкиге калганын кабарлаган медиалар өз булактары Трамптын планы тууралуу кайдан таанышканын тактаган жок.
Буга чейин CNN АКШнын мамлекеттик катчысы Марко Рубио менен орус тышкы иштер министри Сергей Лавровдун үстүбүздөгү аптада болот деген жолугушуусу кийинкиге калганын билдирген эле.
Кездешүүнү которууга эмне себеп болгону белгисиз. Телеканал менен маектешкен булактардын бири айтып бергендей, башкы дипломаттардын Украинадагы согуш кандай аякташы керек деген көз карашы бири-биринен айырмаланат.
Ага чейин Орусиянын тышкы иштер министри Сергей Лавров АКШ президенти сунуштап жаткан фронттун азыркы абалында ок атууну токтотуу планы Москванын кызыкчылыгына каршы келерин жана андай болсо “Украинанын бир топ аймагы нацисттердин карамагында калат” деп билдирген.
Өткөн аптада орус мамлекет башчысы менен телефондон сүйлөшкөндө Трамп “эмки жумада кеңешчилердин жогорку деңгээлдеги жолугушуусу өтөт деп макулдашылганын” айткан. Андан соң эки апта ичинде Путин менен Трамп Будапештте жолугушу мүмкүн экени белгилүү болгон.
АКШ президенти Дональд Трамп Владимир Зеленский менен ок атышууну токтотуу талабын аткаруу үчүн Орусияга Донецк облусун берүүнү талкуулабаганын билдирди. Трамп президенттик Air Force One учагынан Украина жана Орусия фронттун азыркы сызыгында токтошу керектигин айтты.
Буга чейин The Washington Post жогорку кызматтагы эки булакка шилтеме кылып жазгандай, Путин 16-октябрда Дональд Трамп менен телефондон сүйлөшкөндө Украина Донецк облусун толук өткөрүп бериши керектигин айткан. Путин буга жооп катары Запорожье жана Херсон облустарындагы Орусия басып алган аймактарды Украинанын өзүнө кайтарууну сунуштаган.
Ак үйдөгү айрым өкүлдөр муну прогресс катары баалаган, ага чейин Путин Аляскадагы сүйлөшүүдө көбүрөөк талап койгон. Европанын мартабасы жогору дипломаты басылмага украиндер бул сунушка макул болору күмөн экенин айткан.
Трамп журналисттерге Путиндин бул талабы тууралуу айткан жок, ошол эле маалда муну Украинанын президенти менен талкуулабаганын да белгиледи. Трамп мындай маселени "Силер муну аласыңар, бизге тигини бересиңер" деген принцип менен талкуулоо кыйын экенин кошумчалады.
"Донбассты эмне кылуу керек?" деген суроого Трамп мурда кандай болсо ошондой калтыруу керек деп жооп берген.
"Кийин алар ич ара тил табышып алар. Азыр эки тарап тең үйүнө кайтып, согуштук аракеттерди, адамдарды өлтүрүүнү токтотушу керек", - деди Трамп. Буга чейин ал ушундай эле сөздү Truth Social социалдык тармагынан айткан.
Трамп Владимир Зеленский менен 17-октябрда Путин менен сүйлөшкөндөн бир күн өткөндөн кийин жолуккан. Украинанын президенти АКШ президенти менен жолугушуусун ийгиликтүү атап, америкалык тарапка бул үчүн ыраазычылык билдирген. Ал алыска атуучу курал тууралуу кеп болбогонун да айткан. "АКШ эскалацияны каалабайт" деген ал. Алар абадан коргонууга керектүү жабдыктар жана ок атышууну токтотууну сүйлөшкөнүн гана айткан.
Зеленский Украина азыркы фронттун сызыгында ок атышууну токтотууга даяр экенин ырастаган, мындай болгондо Орусиянын карамагында ал басып алган Луганск облусунун баары, Донецк, Херсон жана Запорожьенин ири бөлүктөрү, андан тышкары Сумы, Харьков жана Днепропетровск облустарынын анча чоң эмес аймактары калышы ыктымал. Зеленский орусиялык баскынчылыкты тааныбай турганын айтып келет.
Зеленский Трамп менен жолуккандан кийин согуш бүтөрүнө аз калганын ишенимдүү айта аларын белгилеген. Анын белгилешинче АКШ президентинин жана дүйнөнүн Орусиянын Украинага каршы согушун токтотуу ниети бар.
Орусиянын президенти Владимир Путин АКШ мамлекет башчысы Дональд Трамп менен телефондон сүйлөшкөндө ок атышууну токтотуу үчүн Донецк облусун өз көзөмөлүнө алуу шартын койгон.
Бул тууралуу The Washington Post басылмасы жогорку кызматтагы эки булагына таянып жазды.
Гезиттин маектеши белгилегендей, Путин анын ордуна Запорожье жана Херсон облусунан баш тартууга даяр экенин билдирген.
The Washington Post Москванын аймактарды өзүнө каратуу талаптары августта Аляскадагы жолугушууда айтылгандан бир аз өзгөргөнүнө көңүл бурган. Булактардын айтымында, Ак үйдүн айрым жооптуу кызмат адамдары муну оң жылыш катары карап, бирок буга Украина макул болушу арсар экенин белгилеген.
Гезиттин бир булагы жума күндөгү жолугушууда АКШ президентинин чабарманы Стиф Уиткофф украин делегаттарына Донецк облусун Орусиянын көзөмөлүнө өткөрүп берүүгө “басым кылганын” айткан.
Трамп орус лидери Путин менен 16-октябрда телефондон сүйлөшүп, эртеси күнү украин президенти Владимир Зеленскийди Ак үйдө кабыл алган. Кошмо Штаттардын мамлекет башчысы алдыдагы эки апта ичинде Будапештте Орусия менен АКШ саммити өтөрүн билдирген.
The Washington Post'тун кабарчылары бул боюнча Ак үйдөн да, Кремлден да комментарий ала алган эмес.