Украинанын армиясы 18-сентябрга караган түнү жана эртең менен Орусиянын алыскы аймактарындагы мунайды кайра иштеткен заводдорго сокку урду.
Дрондор негизинен Башкырстандагы мунайхимиялык комплексти бутага алган.
Салават шаарындагы "Газпром нефтехим Салават" ишканасына сокку урулганын украиналык Exilenova+ Телеграм-каналы билдирип, калаанын үстүндө көтөрүлгөн коюу түтүндүн сүрөт, видеолорун жарыялады.
Аталган каналдын маалыматына караганда, бул шаар согуш аймагынан 1400 чакырым алыстыкта жайгашкан, соккуда мунайды кайра иштетүүдө колдонулган жабдык иштен чыккан.
Башкырстандын башчысы Радий Хабиров заводго сокку урулганын ырастады. Каза тапкандар, жараат алгандар жок экенин айтты.
Украинанын Атайын операциялар күчтөрү бейшембиге караган түнү Орусиянын Волгограддагы мунай заводуна ("Лукойл-Волгограднефтепереработка") сокку урулганын билдирди.
Маалыматта бул ишкана жылына 15,7 млн тонна мунайды кайра иштетерин, бул Орусиядагы мунайды кайра иштетүүнүн 5,6% түзөрүн, чабуулдун натыйжасында заводдун иши токтоп калганын кошумчалады.
Волгоград облусунун губернатору Андрей Бочаров абадан коргонуу күчтөрү түндө учкучсуз аппараттардын жапырт чабуулунун мизин кайтарганын, Красноармейск районунда дрондун сыныгы кулаганда эки жеке турак жайдын терезелери күбүлүп, чатырларына зыян келтирилгенин кабарлады. Ал мунай заводуна сокку тууралуу маалымат берген жок.
Украина 18-сентябрга караган түнү Орусиянын кезектеги согуштук дрон чабуулуна кабылганын билдирди. Киев облустук администрациясы Николай Калашниктин айтымында, облус аймагындагы Бориспол шаарында "Шахед" учкучсуз учактарынын бир нече кампада өрт чыкты.
Буча районунда турак үй өрттөнгөнү маалымдалды.
Борбор калаа Киевдин мэри Виталий Кличко шаардын түндүк тарабындагы Оболон аймагында абадан коргонуу системасы иштегенин Телеграм каналына жазды. Суспiльне басылмасы Киевде жарылуу болгону угулганын кабарлады, мониторинг жүргүзүүчү топтор "Шахед" дрондору Киевди көздөй чыгыштан, батыштан жана түштүктөн учурулганын жазышты.
Полтава облусунун Миргород районунда Орусиянын кезектеги соккусунан темир жолдун иши убактылуу үзгүлтүккө учураганын, адамдар арасында жабыркагандар бар экенин "Азаттыктын" украин кызматы жазды.
Дрон чабуулуна кабылганын 18-сентябрда орусия да билдирди. Росавиация мекемеси Волгоград шаарындагы аэропортту убактылуу жапканы маалымдалды.
Жергиликтүү басылмалар Волгоград облусунун аймагында украиналык учкучсуз учактар кармалганын, мунайды кайра иштетүүчү заводдордун биринде "өзгөчө абал" жарыяланганын жазышты. Бул ишкана жана жанындагы мунай базасы буга чейин да бир нече жолу бутага алынган.
Европа Биримдигинин Орусияга каршы санкцияларынын 19-топтому банктарды, энергетика тармагын жана криптовалютаны камтыйт.
Бул тууралуу Еврокомиссиянын төрайымы Урсула фон дер Ляйен АКШ президенти Дональд Трамп менен телефондон сүйлөшкөндөн кийин X соцтармагындагы баракчасына жазды.
Анын айтымында, Еврокомиссия жакын арада жаңкы санкциялар пакетин тааныштырат. Мунай, көмүр, газдан түшкөн кирешеден туйтунган орус армиясы Украинада кан төгүп жатат.
"Буга чекит коюу үчүн Еврокомиссия орус газынан баскыч-баскычы менен баш тартууну тездетүүнү сунуштайт", – деди фон дер Ляйен.
Ал Трамп менен сүйлөшүү "жемиштүү болду" деди. Аны менен Орусияга экономикалык басымды күчөтүүдөгү биргелешкен аракеттер талкууланганын айтты.
Трамп буга чейин Батыш мамлекеттерин орус мунайын алуудан толук баш тартууга чакырган. НАТОнун бардык өлкөлөрү мунай алууну токтотуп, Кытай товарларына 100% бажы төлөмүн киргизилсе, Орусияга каршы олуттуу санкцияларды салууга даяр экенин жар салган.
CREA иликтөө борборунун маалыматына караганда, Орусиянын мунайын алармандардын сап башында Кытай (47%) менен Индия (38%) турат. Мындан тышкары Евробиримдиктеги өлкөлөр (6%) жана Түркия (6%) бар.
НАТОго мүчө мамлекеттердин арасында орус мунайын алгандардын эң ириси Түркия, ага Европадагы сатып алуулардын 26% туура келет. Трамп буга чейин орус мунайын сатып алууда деген негизде Индияга карата бажы төлөмүн көтөргөн, Кытайга карата чара колдонула элек.
Еврошаркет Орусиядан деңиз аркылуу чийки мунайдын импортуна мурдараак тыюу салган, анын баррели 47,6 доллардан ашпайт деген чек киргизген. 2025-жылдын жай мезгилине чейин орус мунайынын баррели 60 доллардан бааланып турган.
Буга чейин иштелип чыккан планга ылайык, шаркет Орусиянын мунайы менен газынан 2028-жылдын 1-январына чейин баш тартууну көздөп жаткан.
Европа Биримдиги украиналык качкындарга убактылуу жардам программасын бара-бара кыскартууну көздөөдө. Орусиянын 2022-жылдын февралындагы жапырт кол салуусунан кийин тутанган согуштан улам үй-жайын таштап качууга аргасыз болгон украин жарандарына колдоо көрсөтүү программасы боюнча жаңы сунуштар алардын мекенине кайтуусун камсыздоого же Евробиримдик аймагында жашоонун башка да мыйзамдуу макамдарына өтүүгө багытталат.
"Евробиримдиктин украин эли менен тилектештиги ошол эле бойдон. Бирок украин элинин өз мекенин калыбына келтирүүгө жардам берүү үчүн үйүнө кайтуусуна шарт түзүлө турган күнгө даярдык көрүүсү да туура болот", - деди Даниянын чет элдиктер жана интеграция министри Кааре Дювбад Бек.
Ал Украинага кайтуу "акырындык менен жана туруктуу реинтеграцияга өзгөчө көңүл буруу аркылуу" ишке ашуусу зарыл экенин белгилеп, мисалы, качкындар адегенде үйүнө бир азга барып келсе болорун айтты.
Ошол эле учурда ЕБ Кеңеши европалык өлкөлөрдү эгер украин качкындары ошол жакта иштөөгө, окууга же үй-бүлөлүк шартына байланыштуу уруксат сураса аларга тийиштүү документ берүүгө үндөдү.
Еврошаркеттин украин качкындарына колдоо көрсөтүү боюнча 2022-жылдын март айында ачылган программасынын мөөнөтү 2027-жылдын мартында аяктайт. Анын алкагында 4 миллионго жакын украин жараны Европа аймагына барып, ошол жакта жардам алууда.