АКШ администрациясы Орусиянын соңку аракеттерине байланыштуу санкцияларды күчөтүү боюнча "бардык варианттарды" карап жатат. Бул тууралуу Fox News телеканалына берген маегинде АКШнын каржы министри Скотт Бессент билдирди.
Ал Орусиянын президенти Владимир Путинди сынга алды.
"Анкориждеги (Аляска) тарыхый жолугушуудан жана европалык лидерлер менен президент Зеленскийдин Ак үйдө болгон сүйлөшүүсүнөн бери ал (Путин) ишарат кылгандын тескерисин жасады. Тескерисинче, ал жийиркеничтүү түрдө бомбалоолорун күчөттү", – деди Бессент.
Ал Путиндин АКШ президенти Дональд Трамп менен Аляскада болгон жолугушуусун жана андан кийинки телефон сүйлөшүүлөрүн эске салды. Бирок Бессент Путин Аляскада так эмне убада бергенин айткан жок.
Министрдин айтымында, АКШнын болжолдуу жооп чаралары ушул жуманын ичинде каралат.
Шейшемби күнү Дональд Трамп америкалык радио алып баруучу Скотт Женнингске маек берип жатып, Владимир Путинден "абдан көңүлү калганын" айткан. Ошол эле күнү Ак үйдө өткөн брифингде ал Украинанын жаңжалы боюнча "өтө кызыктуу нерселерди" билгенин кошумчалады. "Муну бир нече күндө билесиздер деп ойлойм", - деди АКШ президенти.
Мунун алдында Трамп эки жуманын ичинде Орусияга карата мындан аркы кадамдар боюнча чечим кабыл алууну пландап жатканын билдирген. Бул мөөнөт 1-сентябрда аяктады. Ошондой эле ал Орусия, Украина жана АКШ лидерлеринин үч тараптуу жолугушуусун өткөрүү ниетин белгилеп, бирок “балким, Украина менен Орусия азырынча тынчтыкка даяр эмес” деген.
Трамп Орусиянын соода өнөктөштөрүнө (де-факто Индияга – анткени ал өлкөдө орус мунайын сатып алууга байланыштуу бажы төлөмдөрү иштеп жатат) каршы санкцияларды жана төлөмдөрдү киргизүү мүмкүнчүлүгүн, ошондой эле Украинага да басым көрсөтүү ыктымалдыгын четке каккан эмес.
Трамп согушту токтотууга кызыкдар экенин белгилеп, бул үчүн Орусия менен Украина айрым талаптарынан баш тартууга туура келерин айткан. Учурда эки тараптын ортосунда чоң пикир келишпестик – аймактарга жана согуштан кийинки коопсуздук кепилдигине байланыштуу маселелер турат.
АКШ администрациясы Орусияга каршы санкцияларды күчөтүүдөн баш тартканын Москва сүйлөшүүлөрдөн чыгып кетиши мүмкүн деген себеп менен түшүндүрүүдө. Бул согуштун белгисиз мөөнөткө узарып кетишине алып келери айтылууда.
3-сентябрга караган түнү орус армиясы Украинага жапырт сокку урду. Украинанын Аскердик аба күчтөрүнүн маалыматы боюнча, Орусия жалпысынан 502 дрон жана ар кандай типтеги 23 ракета учурду. Үч ракета жана 69 дронду атып түшүрүүгө же кармоого мүмкүн болгон жок.
Бутага өлкөнүн чыгышы менен батышындагы бир нече аймактар алынды. Чернигов облустук аскердик администрациясынын башчысы Вячеслав Чаус чабуулдан жарандык маанилүү инфраструктуралык объектиге зыян келтиригенин кабарлады. Нижинск районунда 30 миңден ашуун үй электр энергиясыз калды.
Кировоград облусунда темир жол объектилерине сокку урулду. Төрт темир жолчу жабыркап, 20дан ашык поезд каттамы кармалды. Кировоград облусунун Знаменка шаарында соккулардан беш киши жараат алып, турак жайлар зыян тартты.
Киев облусунун Вышгород шаарында дрон калдыгы түшкөн үйдө өрт чыкты, жабыркагандар тууралуу маалымат айтылган жок.
Львов, Хмельницкий жана Ивано-Франковск облустары, Волынск облусунун борбору Луцк шаары да аткыланды. Жергиликтүү бийлик калаада өнөр жай жана инфраструктуралык объектилер күйүп жатканын билдирди.
Украинанын президенти Владимир Зеленский Орусия кылганын моюну менен тартпай, жазасыз калып жаткандыктан, соккуларды күчөткөнүн айтып, өнөктөш өлкөлөрдү Москвага экономикалык кысым көрсөтүүгө үндөдү.
Түндүк Корея Орусияга кошумча 6000 аскер жиберүүнү пландап жатканын Түштүк Кореянын Yonhap маалымат агенттиги билдирди.
Маалымат өлкөнүн мыйзам чыгаруучулары үчун жабык брифингде Түштүк Кореянын чалгындоо кызматынын өкүлдөрүнүн отчет бергенде айтылган.
Бул Украинага каршы согушта орусиялык аскерлерди колдоо үчүн Орусияга жөнөтүлгөн Түндүк Корея аскерлеринин үчүнчү партиясы болот. Агенттик өткөн жылдан бери Түндүк Корея Орусияга жалпысынан 13 миңге жакын аскерин жибергени, алардын 2 миңдейи Орусиянын Курск аймагындагы салгылашууларда курман болгон деген чалгындын маалыматын эске салды.
Түндүк Кореянын лидери Ким Чен Ын 2-сентябрда Бээжинге барган. Ал жакта Кытайдын төрагасы Си Цзиньпин жана Орусиянын президенти Владимир Путин менен биргелешкен иш-чараларга катышары айтылган.
Си, Ким жана Путин 3-сентябрда Кытайдын Элдик боштондук армиясынын Экинчи дүйнөлүк согуштун аяктаганынын 80 жылдыгына арналган парадга катышты.
“Бир дүйнө-Кыргызстан” укук коргоо уюмунун жетекчиси Төлөкан Исмаилова Украинанын үчүнчү даражадагы “Княгина Ольга” ордени менен сыйланды. Бул тууралуу Украинанын Кыргызстандагы элчилигинен кабарлашты.
Маалыматка ылайык, укук коргоочуга бул орден Киевде Украинанын эгемендик күнүнө карата ыйгарылган. Элчилик Исмаилованы сыйлыгы менен куттуктап, “Украинанын досу” деп атады.
Төлөкан Исмаилова Кыргызстандагы тажрыйбалуу укук коргоочулардын бири. Ал “Жарандар коррупцияга каршы”, “Бир дүйнө-Кыргызстан” уюмдарын жетектеп, өлкөдөгү адам укугу жаатында иш алпарып келет.
Орусия Украинага кол салгандан бери бул согушту сындап, Украинага колдоосун билдирип келет.