Орусия Украинадагы согушту (Москва аны "атайын аскердик операция" деп атайт) токтотпой турганын 30-августта орус Куралдуу күчтөрүнүн Башкы штабынын башчысы Валерий Герасимов билдирди. Анын айтымында, орус армиясы чабуул коюуну улантат.
Герасимовдун мындай билдирүүсүн Коргоо министрлиги жарыялады.
Маалыматта генерал 2025-жылдагы жазгы-жайкы кампанинын жыйынтыгын чыгарып, мындан аркы кадамдар тууралуу тапшырмаларды аныктаганы жазылган. Герасимов анда күз мезгилине тапшырма, милдеттер аныкталарын айткан. Ал стратегиялык демилге азыр толук орус армиясында экенин белгилеп, жайындагы чабуулдарда ийгилик болбогонун украин армиясы көп жоготууларга карабай каршы турганы менен түшүндүрдү. Ошол эле кезде Орусиянын жоготуулары тууралуу маалымат берген жок.
Валерий Герасимовдун айтымында, орус армиясы азыр Украинанын Луганск облусунун 99,7%, Донецкинин 79%, Запорожьенин 74%, Херсон облусунун 76% көзөмөлдөйт.
Бул маалыматтар негизинен көз карандысыз баалоолорго жакын, бирок Герасимовдун Донецк боюнча берген эсеби көбүрөөк. Башкы штабдын башчысы мындан тышкары Орусия Украинанын Сумы жана Днепропетров облустарындагы бир нече калктуу пункттарга көзөмөл орнотконун кошумчалады. Ушул аптада "Медуза" жана "Медиазона" 2025-жылдын августуна карата Украинадагы согуштагы Орусиянын жоготуулары 219 миңге жакындаганын иликтеп чыккан.
"Би-би-си", "Медиазона" жана ыктыярчылардын ачык булактардын негизиндеги тизмесинде августтун аягына карата бул сан 125 681 кишини түзгөн болчу.
Бирок бул көрсөткүч бардык жоготууну камтыбашы мүмкүн, анткени өлгөндөрдүн баарынын эле тизмеси ачык жарыяланбайт. 2023-жылы согушта Орусиянын 50 миңдей аскери каза тапса, 2024-жылы 93 миңге жеткен.
АКШнын президенти Украина, Орусиянын президенттери жана өзүнүн катышуусундагы үч тараптуу жолугушуу болот деген ишеничте.
Бул тууралуу ал 30-августта Daily Caller басылмасына курган маегинде айтты.
Трамп Зеленский менен Путиндин эки тараптуу жолугушуусу болорунан күмөн санай турганын кошумчалап: "Эки тараптуу жолугушууну билбейм, бирок үч тараптуу кездешүү болот", - деп айтты.
Ал кайсы күнү жана кай жерде өтөрүн тактаган жок. Өзүнүн Путин менен жакшы ымаласын эске алып, согуш тезирээк токтойт деп ойлогонун кайталады. Бирок тараптар тынчтыкка даяр эмес болушу ыктымалдыгын кошумчалап, Украина менен Орусияны жаңжалын токтоо тууралуу чакырыктарга кулак салбаган балдардын урушуна салыштырды. Алар эртеби-кечпи өздөрү токторун белгиледи. Согушту улантуу "акылсыздык" болот деди.
Трамп Украина үчүн коопсуздук кепилдиктери тууралуу айтып жатып, америкалык жоокерлер украин жергесине жиберилбей турганын, кепилдикти Европа өлкөлөрү камсыздарын, Америка зарыл учурда гана жардам берүүгө даяр болорун кошумчалады.
Өзү бийлик чылбырын кармап турган кезде Кошмо Штаттар Украинага түз курал-жарак жөнөтпөй турганын, аны НАТО өлкөлөрүнө сатарын, алар өз кезегинде Украинага жеткирерин да айтты.
15-августта Трамп Путин менен Аляскада жолугушкан, бирок азырынча тынчтык келишимдери түзүлө электигин айткан.
Трамп Зеленскийдин Путин менен көзмө-көз жолугушуу демилгесин колдогон. Кремль Путин менен Зеленскийдин жолугушуусу белгилүү бир шарттар аткарылганда гана мүмкүн болорун айткан. Украин президенти Москваны эки тараптуу жолугушууну болтурбоо үчүн болгон күчүн жумшап жатат деп айыптаган.
Трамптын үч тараптуу жолугушуу тууралуу билдирүүсүнө Кремль азырынча комментарий бере элек.
Украинанын Жогорку Радасынын мурдагы спикери Андрей Парубийди Львовдо атып кетишкенин "Азаттыктын" украин кызматы жазды.
Полиция киши колдуу болгон адамдын ысымын атаган жок, бирок түшкө маал Сихов районунда ок атуу болгонун ырастады.
Мурдагы спикерге кол салган киши из жашырып кеткен, аны издөө уланууда.
"РБК-Украина" өз булактыран таянып кол салган кылмышкер курьер катары кийинип, кылмышты ишке ашырганын билдирди. Окуя болгон жерде жети ок табылган.
Парубийдин өлүмүн Украинанын президенти Владимир Зеленский жана Львов облустук аскердик администрациясынын башчысы Максим Козицкий ырастап, кылмышкер изделип жатканын айтышты.
Андрей Парубий 2016-2019-жылдары Жогорку Радада спикер болгон. Ал 1971-жылы Червоноградда туулган, Украинанын Европага багыт алышын колдоп келген.
Евромайдан мезгилинде ал чатыр лагеринин коменданты болуп, Майдандын коргонуу тармагын жетектеген. 2014-жылдын февралынан августуна чейин Украинанын Улуттук коопсуздук жана коргонуу кеңешинин катчысы кызматын аркалаган.
Украинанын Башкы штабы 30-августка караган түнү Орусиянын Краснодар жана Сызрандагы эки мунай заводуна дрондор менен сокку урганын жарыялады.
Маалыматта сокку "душмандын чабуул коюу потенциалын азайтуу, күйүүчү май жеткирүүгө бөгөт коюу" максатын көздөй турганы айтылат. Бутага алынган ишканаларда жарылуу жана өрт болгону жазылган.
Украин тараптын маалыматына караганда, Краснодардагы мунайды кайра иштетүүчү заводу жылына үч миллион тоннага чейин мунай өндүрөт, орус армиясын күйүүчү май менен камсыздоодо колдонулат.
Сызрандагы заводдун кубаттуулугу жылына 8 жарым миллионго жакын тоннаны түзөт.
Краснодар крайынын башчысы мунай заводуна дрон сыныктары тийип, өрт чыкканын ырастады. Расмий маалыматка караганда, технологиялык жабдыкка зыян келтирилип, 300 чарчы метр аянтты өрт чалды. Жабыркагандар тууралуу маалымат жок.