АКШнын президенти Дональд Трамп Орусия менен Украинанын ортосундагы согушту токтотуу боюнча сүйлөшүүлөр ийгиликтүү жүрүп жатканын, бирок "сөздөн ишке өтчү убак келгенин" билдирди. Бул тууралуу Reuters агенттиги кабарлады.
"Менимче, Украина менен Орусиянын ортосунда баары жайында болушу керек жана сиздер муну жакында билесиздер. Бир учур келет сен же иш кылышың керек, же унчукпай калышың керек. Эмне болорун көрөбүз, бирок азырынча баары жакшы кетип жатат", - деди Трамп журналисттерге өз учагында сүйлөп жатып.
Буга чейин Трамптын Жакынкы Чыгыш боюнча атайын өкүлү Стивен Уиткофф ок атышууну токтотуунун эң тез жолу – 2022-жылы Москва аннексиялап алган төрт украин аймагын Орусияга өткөрүп берүү экенин билдирген.
Бирок Уиткоффтун мындай сунушу менен АКШ президентинин Украина боюнча атайын өкүлү Кит Келлог макул болгон эмес. Ал мындай ыкма Украинага карата адилетсиз жана кооптуу прецедент түзүп коёру мүмкүн экенин белгилеген.
Стивен Уиткофф ушул аптада Орусияга барган. Бул анын акыркы айлардагы үчүнчү сапары болуп, анда Санкт-Петербургда президент Владимир Путин менен жолугушуу өткөргөн.
Кремлдин маалыматына караганда, тараптар жолугушууда негизинен Украинадагы жаңжалды жөнгө салуу маселесин талкуулашкан.
Бул байланыштардын алкагында, Дональд Трамп Москваны согушту токтотуу үчүн аракет кылууга ачык чакырды. Axios басылмасынын маалыматы боюнча, эгер апрель айынын аягына чейин тынчтык келишимине жетишилбесе, АКШнын администрациясы Орусияга каршы жаңы санкцияларды киргизиши мүмкүн.
Орусиянын армиясы жекшембиде Украинанын Сумы шаарынын борборун баллистикалык ракета менен аткылады. Украин тараптын баштапкы маалыматына караганда, 21 киши каза таап, 80ден ашууну ар кандай жараат алды. Арасында 7 бала бар.
Ракеталык аткылоо күндүз эл көчөдө, машинелерде жана коомдук транспортто жүргөндө болгон.
Орусиялык аскерлер Украинанын Сумы шаарына ракета менен сокку урганын калаа башчысынын милдетин аткаруучу Артём Кобзарь билдирди.
"Ракеталык чабуулдун кесепетинен көптөгөн адамдар набыт болду", - деди Кобзарь. Бирок курмандыктар тууралуу так маалымат берген жок.
Украинанын президентинин администрациясынын жетекчиси Андрей Ермак да жоготуулар болгонун ырастады. Ал Сумы бир нече жолу чабуулга кабылганын белгилеп, Кобзарь сыяктуу эле ал да набыт болгондор жана жараат алгандар боюнча так маалымат берген жок.
"Суспильне" телеканалы шаарда эки жарылуу болгонун кабарлады. Журналисттердин маалыматына ылайык, жараат алгандардын арасында бир бала да бар.
Украиналык Телеграм-каналдар чабуул болгон жерден тартылган сүрөттөрдү жана видеолорду жарыялашты. Кадрларда Сумыдагы бир райондо катуу өрт чыгып жатканын көрүүгө болот.
Орусиялык дрондор 12-апрелге караган түнү Киевге чабуул коюп, эки райондо өрт чыкты. Шаар мэри Виталий Кличко үч адам жабыркаганын билдирди.
"Бирөөнү ооруканага жаткырып, экөөнө жеринде жардам көрсөтүлдү", - деди Кличко.
Облустук администрациянын билдиришинче, бир сааттан ашуун абадан эскертүү берилген. Святошино районунда үч имараттын кампасында өрт чыгып, атып түшүрүлгөн дрон сыныгы балдар аянтчасына түшкөн.
Дрондор чабуулуна кабылган Днепропетровск облусунда бир түн ичинде 17 дрон атып түшүрүлгөн.
Украинанын Аскер аба күчтөрүнүн маалыматында, бир түндө Украинанын жалпы аймагына 88 орусиялык учкучсуз учак сокку урган. 56 дрон атып түшүрүлүп, көз жазгыра турган учкучсуз учактын 24ү максатына жеткен эмес.