13-мартка караган түнү Орусиянын чабуулунан Украинанын Донецк облусунда кеминде үч киши набыт болуп, 14 адам жараат алды. Бул тууралуу аскер администрациясынын башчысы Вадим Филашкин билдирди. Анын айтымында, эки адам Мирноградда, дагы бири Покровскиде каза болду. Турак үйлөр жана башка имараттар жабыркады.
Херсон облусундагы Берислав шаарында дрон чабуулунан кеминде бир адам каза болуп, 85 жаштагы жаран жарадар болгонун жергиликтүү полиция башкармалыгы билдирди.
Өткөн түнү Украинанын Днепропетров облусу аба соккусуна кабылды. Облус губернатору Сергей Лысак тургундар арасында жабыркагандар бар экенин билдирди.
Маалыматка караганда, Днепр шаарына болгон чабуулда үч аял жабыркап, бир нече көп кабаттуу турак жай кыйрады.
Никопол районунда дрон чабуулунун кесепетинен жергиликтүү аял тургун жабыркады. Губернатордун маалыматына караганда, Самаров районунда турак үй, административдик бир нече имарат жана автоунаалар кыйрады.
Украин маалымат каражаттары Орусиянын бутасына Днепропетров облусунун темир жолу да туш болгонун жазышты.
Өткөн түнү Запорожье облусу да дрон чабуулу жана аткылоого кабылганы маалымдалды. Васильев районунда жергиликтүү тургун жабыркады. Облустун администрациясы бутага инфраструктуралык имараттар жана турак жайлар илингенин билдирди.
Орусиянын Коргоо министрлиги Днепропетровдогу жана Запорожьедеги соккулар боюнча комментарий бере элек.
Москва далилдерге карабастан үч жылдан ашкан согуш башталгандан бери эле жарандык жайларды бутага алганын танып келет.
АКШнын президенти Дональд Трамп эгер Москва Киев менен келишимге барбаса, Америка бийлиги "Орусия үчүн кыйраткыч" аракеттерге барарын эскертти.
12-мартта Киев Украинадагы согушту токтотуу боюнча АКШнын планын колдогондон кийин Трамп Орусияга карата эң катаал билдирүү жасады.
"Биз каржылык жактан көргөн чаранын кесепети Орусия үчүн жаман, кыйратуучу болот", - деген Трамп мындай кадамдарга барууну каалабасын белгиледи.
Трамптын бул эскертүүсү АКШ президенти Ирландиянын премьер-министри Михол Мартин менен жолугушуу учурунда айтылды.
Ал "Украина менен тынчтык келишимин түзүүгө макулдатуу үчүн Владимир Путинге басым жасоого даярсызбы?" деген суроого жооп берип жатып "Ооба, колубуздан келет. Бирок мен буга зарылчылык болбойт деп ишенем", деди.
Тынчтык келишими шейшембиде Сауд Арабиясында америкалык жана украин делегацияларынын сүйлөшүүлөрүндө жетишилген. Ак үй маалымдагандай, президент Трамптын атайын өкүлү Стив Уиткофф ушул аптада бул сунушту талкуулоо үчүн Москвага барат. Мамлекеттик катчы Марко Рубионун сөзүнө караганда, АКШ Кремлдин америка-украин келишимине мамилесин талдайт.
"Эгер алар макул болсо, биз прогресске жетиштик жана тынчтыкка жетишүү үчүн чыныгы мүмкүнчүлүк бар экенин билебиз. Эгер жок дешсе, алардын дымагы белгилүү болот", - деди Рубио.
Сауд Арабиясында 11-мартта өткөн тогуз сааттык сүйлөшүүлөрдөн кийин Украина АКШнын ок атышууну 30 күнгө токтотуу сунушуна макул болгон. Эми чечим кабыл алуу кезеги Москвада.
Украина ок атышууну 30 күнгө токтотуу боюнча АКШнын сунушуна макул болду. Ал эми Кошмо Штаттар Украинага аскердик жардам көрсөтүүнү улантып, чалгын маалыматтар менен бөлүшүүнү жандандырат.
Бул тууралуу Сауд Арабиясында өткөн АКШ-Украина делегацияларынын тогуз сааттык сүйлөшүүсүнөн кийин эки тарап тараткан расмий билдирүүдө белгиленет.
Жолугушуудан кийинки маалымат жыйында Вашингтондун делегациясын жетектеп барган мамлекеттик катчы Марко Рубио Украина позитивдүү кадамга барганын, эми кезек Орусия тарапта экенин баса белгиледи.
Рубио кошумчалагандай, Кошмо Штаттар Орусия да ок атышууну 30 күнгө токтотууга макул болоруна үмүттөнөт. Бирок эгерде "жок" деген жооп болсо "анда, тилекке каршы, биз тынчтыкка ким тоскоолдук жаратып жатканын билебиз" деди мамкатчы.
Ал Жиддадагы сүйлөшүүдө кабыл алынган макулдашуулар Москвага жакын арада жеткирилерин белгиледи.
Андан тышкары делегациялар Киев менен Москва ортосундагы туткундарды айырбаштоо, Орусияга күчтөп чыгарылып кеткен украин балдарын кайтаруу маселелерин талкуулашканын украин президентинин администрация башчысы Андрей Ермак билдирди.
Анын айтуусуна караганда, Вашингтон бул сунуштарды Орусиянын өкүлдөрү менен талкуулоону убада кылды.
Ошондой эле Киев менен Вашингтон болушунча Украинанын сейрек кездешүүчү кен байлыктары тууралуу келишимге кол коюуну тездетүүнү макулдашкан. Буга чейин 28-февралда Ак үйдө Украинанын президенти Владимир Зеленский менен АКШ лидери Дональд Трамп күтүүсүздөн кайым айтыша кеткенине байланыштуу бул келишимге кол коюлбай калган. Көп өтпөй АКШ Украинага аскердик жардам көрсөтүүнү убактылуу токтотуп, андан соң чалгын маалыматтары менен бөлүшүүнү да чектеген.
Ошол окуядан кийин АКШ менен Украинанын делегациялары алгач ирет жолугушту.
Жиддадагы кездешүүгө украин президентинин администрациясынын башчысы Андрей Ермак, тышкы иштер министри Андрей Сибига, коргоо министри Рустем Умеров жана президенттик кеңсесинин жетекчи орун басары Павел Палиса катышты.
АКШ делегациясынын курамына мамлекеттик катчы Марко Рубио, улуттук коопсуздук боюнча кеңешчиси Майк Уолц жана Жакынкы Чыгыш боюнча атайын чабарман Стив Уиткофф кирди.
Бул жолугушууну утурлай Орусиянын бир катар аймактары жапырт дрон чабуулуна дуушар болуп, үч киши набыт болгону кабарланган. Ал эми Украинанын аймактары да ракеталык аткылоого туш болду.
Орусиянын Коргоо министрлиги жекшембинин кечинде украин аскерлери Курскидеги бир нече айылдан сүрүп чыгарылганын билдирди. Буга чейин 8-марттан тарта мекеме дагы төрт айылдын орус армиясынын көзөмөлүнө өткөнүн маалымдап келген. Мындан тышкары министрлик дрондор украин күчтөрүнүн автокербенине чабуул коюуда деген видеону жарыялап, алар Суджа шаарынан чегинүүдө деп жазган.
Украиналык DeepState долбоору орус армиясы Курск облусундагы эки кыштакты кайтарып алганын бышыктады. Бирок украин куралдуу күчтөрүнүн командачылыгы бул маалыматты тастыктай элек.
Былтыр августта украин аскерлери Курск облусунун айрым райондорун ээлеп алып, операцияны өз аймагын коргоо максатында жүргүзгөнүн билдирген.
Ал арада 10-мартта Орусиянын аскерлери Запорожье облусун артиллериядан аткылаганын аймактын губернатору Иван Федоров маалымдады. Анын айтымында, жер там жана чарбалык курулуштар жарым-жартылай талкаланды, 79 жаштагы аял жабыркады.
Украин күчтөрүнүн башкы командачылыгы дүйшөмбүгө караган түнү каршы тарап 176 "Шахед" жана башка дрондор менен сокку урганын билдирди.
Маалыматта 130 учкучсуз учак атып түшүрүлгөнү, бутага Харьков, Полтава жана Киев облустары алынганы айтылат. Натыйжада айыл-чарба ишканасында өрт тутанды, техника жабыркады, турак жайлар, машинелер зыян тартты. Жарадар болгондор тууралуу кабарланган жок.
Орусия кошуна өлкөсүнүн жарандык жайларын жана карапайым адамдарды аткылаганын танып келатат.