Украинанын президенти Владимир Зеленский АКШнын президенти Дональд Трамптын атайын өкүлү Кит Келлог согушка барып, орус армиясына туруштук берип жаткан украин аскерлери менен сүйлөшүп көрүшү керек деген пикирде. Ал мындай сунушун 19-февралдагы маалымат жыйында айтты. Трамптын Украина жана Орусия боюнча атайын чабарманы Келлог Киевге шаршембиде барган. Бул анын кызматка дайындалган январь айынан бери Украинага алгачкы сапары.
Зеленский Келлогду майданга коштоп барууга даяр экенин да айтты.
"Биз дагы барабыз. Ал жактагы аскерлер менен сүйлөшүп көрсүн. "Мунун баарын орустарга бере салып, коопсуздук кепилдиктери жок эле үйгө тезирээк кетүү үчүн добуш берүүгө даярсыңарбы?" деп алардан сурап көрсүн. Мен үчүн Келлог мырза бул маалыматты өзү алганы маанилүү", - деди Зеленский.
Ал Келлог ошондой эле Украинанын чалгын кызматынын жана Коопсуздук кызматынын өкүлдөрү менен жолугарын кошумчалады.
Келлог буга чейин тынчтыкка жетүү үчүн Киев да, Москва дагы эпке келиши керек экенин бир нече жолу айткан. Киев аймактык жана саясий жактан Орусиянын талаптарына көнүү мүмкүн эмес экенин белгилейт.
Соңку жумада Келлог Украинага колдоо көрсөткөн Евробиримдикке мүчө мамлекеттердин өкүлдөрү менен жолуккан.
Украинадагы согушту токтотуу маселеси АКШ президенти Дональд Трамп кызматка киришкени күч алды. 18-февралда Сауд Арабиясында Америка менен Орусиянын делегацияларынын биринчи жолугушуусу өттү. Ушул эле күнү Трамп журналисттердин суроолоруна жооп берип жатып, Украинадагы "согушту токтотуу келишимине жетишерине терең ишеничте" экенин билдирди.
АКШ президенти Дональд Трамп Украинанын мамлекет башчысы Владимир Зеленскийдин сөздөрүнө нааразы экенин билдирди. Буга чейин Зеленский Украинаны Сауд Арабияда өткөн АКШ-Орусия сүйлөшүүсүнө чакырбай коюшканын бир нече жолу белгилеген.
"Бүгүн мен алар чакырылбай калганына нааразы экенин уктум. Бирок аларда үч жыл, андан да көп убакыт бар болчу. Мунун баарын оңой эле чечип койсо болор эле. Макулдашып алсаңар болмок", - деди Трамп.
Америка президенти муну менен эмне айткысы келгенин тактаган жок. Ал буга чейин бир нече ирет Украинанын НАТОго кирүү мүдөөсү согушка себеп болгонун айткан. Эксперттер согуш Путиндин империялык амбицияларынан улам башталганын белгилеп жүрүшөт.
Флоридадагы Мар-а-Лагодогу үйүндө 18-февралда журналисттердин суроолоруна жооп берип жатып Трамп Украинадагы "согушту токтотуу келишимине жетерине ишенерин" ырастады.
"Менимче, бул согушту токтотууга толук ыйгарым укугум бар",-деди Трамп.
18-февралда Эр-Риядда АКШ менен Орусия делегацияларынын алгачкы сүйлөшүүсү өткөн. Трамп ошондой эле ушул ай соңуна чейин Орусиянын президенти Владимир Путин менен жолугушуусу мүмкүн экенин айтып, Евробиримдикке мүчө мамлекеттердин Украинага бейпилдик күчтөрүн жиберүүсүнө каршы эместигин кошумчалады.
Трамп Украинада президенттик шайлоо өткөрүү зарылдыгын да баса белгиледи.
Украинанын президенти Владимир Зеленскийдин беш жылдык мөөнөтү расмий 2024-жылы май айында аяктамак. Бирок Украинанын Конституциясына ылайык, өлкөдө аскердик абал жарыяланып турган маалда шайлоо өткөрүүгө тыюу салынат. Зеленский согуштун активдүү фазасы аяктары менен шайлоо өткөрүлүшү мүмкүн экенин айткан.
Орусиянын армиясы 19-февралга караган түнү Украинанын Одесса калаасына "Шахед" дрондору менен сокку урду. Шаарда бир топ жардыруунун добушу угулуп, социалдык тармактарга айрым жерлерде өрт тутанганы тууралуу маалымат чыкты.
Одессанын мэри Геннадий Трухановдун айтымында, орус күчтөрү шаардын калк жыш жайгашкан райондоруна жапырт сокку урду. Жыйынтыгында 14 мектеп жана 13 бала бакча электр жарыксыз жана жылуулуксуз калды.
Андан тышкары 500дөй көп кабаттуу үй жайгашкан кичи райондо жарык толук өчтү.
Труханов кошумчалагандай, балдар бейтапканасы жана бала бакчанын имаратына зыян келтирилди. Одесса мэри бир киши жараат алганын билдирди.
Калаада адамдар жылына турган жайлар ачылды.
Украин армиясынын Аба күчтөрү билдиргендей, орус аскерлери 19-февралга караган түнү жалпы 167 дрон жана "Искандер" баллистикалык ракеталары менен сокку урду. Дрондордун 100дөн көбү атып түшүрүлдү.
Орусиянын армиясы бир гана аскердик жайларды бутага алганын билдирип, карапайым тургундар жашаган аймактарга сокку урганын четке кагып келет. Ал эми жайкын тургундардын жабыркашын Украинанын абадан коргонуу системасынан көрөт.
Орусия 17-февралга караган түнү Украинанын аймактарына дрон жана ракеталар менен чабуул койду. Сегиз адам жабыркап, бир нече райондо электр энергиясы өчүрүлдү. Бул тууралуу жергиликтүү бийлик жана "Укрэнерго" маалымдады.
Түнкү аткылоо маалында Днепропетров облусунун Марганец шаарында төрт адам жараат алганы кабарланды.
Аймак башчысы Сергей Лысак билдиргендей, орус армиясынын аткылоосунан сегиз кабаттуу үй, төрт жеке турак жай, ошондой эле өнөр жай жана коммуналдык ишканалар, окуу жайдын имараты, бир катар дүкөндөр, кафе талкаланып, электр зымдары үзүлгөн.
Мындан тышкары эки айыл да аткылоого кабылган. Жабыркагандар тууралуу маалымат таратылган жок.
Орус армиясынын аба чабуулунун жыйынтыгында Херсон облусунда эки район электр жарыксыз калган. Бул тууралуу губернатор Роман Мрочко билдирди.
Украин армиясынын Аба күчтөрүнүн маалыматына караганда, 17-февралга караган түнү орус күчтөрү Украинанын аймагына жалпы 147 дрон менен кол салды. Алардын 83ү атып түшүрүлдү.
Киев облусунда дрон чабуулунан бир адам жараат алып, үч жеке турак жай жана эки автоунаа зыян тартты.
Запорожье облусунда дрон соккусунан 15 көп кабаттуу үйдүн жана алты жеке турак жайдын терезелери күбүлүп түшүп, чатырлары жабыркады. Полтава облусунда жеке үйдүн жана анын жанындагы чарба курулушунун чатырлары талкаланганы кабарланды.
Орусиянын Коргоо министрлиги Украинанын аймактарына урулган соккулар боюнча комментарий бере элек.
Орусия 2022-жылдын 24-февралында Украинага кеңири масштабдагы согуш ачкан. Бириккен Улуттар Уюмунун (БУУ) маалыматына ылайык, 2024-жылдын ноябрына чейин Украинада 12 миңден ашуун адам өлүп, 27 миңге жакыны жаракат алган.
Ошондой эле БУУ орусиялык аскерлер адамдарды өлтүрүп, уурдап, кыйнап, сексуалдык зомбулук, адамгерчиликсиз мамиле көрсөтүп, карапайым адамдарды негизсиз камаган фактыларды документтештирген.