Кошмо Штаттардын президенти Дональд Трамп New York Post басылмасына курган маегинде Орусиянын президенти Владимир Путин менен телефондон сүйлөшкөнүн билдирди. Бирок ал качан болгонун тактаган жок. Трамп Путин менен канча жолу сүйлөшкөнү тууралуу суроого дагы бир ыктай жооп берген эмес.
АКШнын президентинин ырасташынча, Путин ага "(кармаш жүрүп жаткан аймактарда) адамдардын набыт болушун токтотууну кааларын" айткан.
Трамп бул маегинде Украинадагы согушту токтотууга байланыштуу анын так планы бар экенин дагы бир жолу белгилеген жана ал чукул ишке ашарына үмүттөнгөн. Ошондой эле Орусия менен Украинанын президенттери экенин так атабастан "алар жолугушууну каалайт" деп билдирген.
Кремль бул тууралуу азырынча комментарий бере элек.
Буга чейин Трамп келерки аптада Украинанын президенти Владимир Зеленский менен жолугушуусу, Орусиянын президенти Владимир Путин менен сүйлөшүүсү мүмкүн экенин айткан.
АКШнын президенти Украинадагы согушту тез арада бүткөрүү үчүн Путин менен сүйлөшөрүн билдирип келет. Буга чейин Ак үй бул тема Орусия менен "абдан олуттуу" деңгээлде талкууланганын, жакын арада куралдуу кармашты токтотууга байланыштуу "орчундуу" кадамдар болушу мүмкүндүгүн кабарлаган.
Путин Трамптын сүйлөшүү тууралуу билдирүүлөрүн кубаттап, аны менен жолугушууга даяр экенин ырастаган. Ошол эле маалда Зеленский менен сүйлөшүүлөр болушу мүмкүндүгүн четке каккан.
Былтыркы жарандык жайларга жасалган чабуулдарда Украина менен Орусияда бери деген 2,6 миңдей жайкын тургундун өмүрү кыйылып, 14 миңден ашык киши жараат алды.
Бул тууралуу Conflict Intelligence Team (CIT) иликтөө тобу билдирди. Алардын баяндамасы ыктыярчылар чогулткан, күн сайын берилген маалыматтардын негизинде, расмий кабарлардан, билдирүүлөрдөн улам жазылган.
Набыт болгондордун басымдуу бөлүгү украиндер (1915 адам) болгон жана алардын 81и балдар. Орусия көзөмөлдөгөн Украинанын аймактарында кеминде 452 адамдын, анын ичинде 20 баланын өмүрү кыйылган. Ыктыярчылардын эсебине ылайык Орусияда чабуулдарда 233 киши, арасында 14 бала мерт болгон.
Украинада 12,5 миңден ашык, ал эми Орусия оккупациялап алган аймактарында 2,3 миңдей, ал эми Орусияда кеминде 1,6 миң адам жараат алган.
Мындай маалыматты топтоо 2023-жылдын аягында башталган, мындан улам согуш башталган алгачкы жылдарга салыштыруу мүмкүн болбой турат.
Өткөн айдын аягында Би-Би-Синин орус кызматы жана "Медиазона" басылмасынын журналисттери ыктыярчылар менен бирге ачык булактарга таянып, Украинада кеминде 90 миң орусиялык аскер набыт болгонун аныкташкан. Орусиянын бийлиги фронтто набыт болгон аскерлери тууралуу расмий эч качан маалымат бербейт.
Украинанын президенти Владимир Зеленский 2024-жылдын башында Киев согушта 31 миңдей аскеринен айрылганын билдирген. UALosses долбоору ачык булактарга таянып, Украинанын жоготуулары 40 миңден ашканын маалымдаган.
АКШнын президенти Дональд Трамп келерки аптада Украинанын президенти Владимир Зеленский менен жолугушуусу, Орусиянын президенти Владимир Путин менен сүйлөшүүсү мүмкүн экенин билдирди. Ал жума күнү Вашингтондогу маалымат жыйынында бул планы канчалык так экенине токтолгон жок. Трамп Украинага барбасын белгиледи.
Зеленскийдин Вашингтонго сапары тууралуу буга чейин кабарланган эмес.
Украин президенти Трамп менен жолугушуу мүмкүндүгү тууралуу комментарий берип жатып, келерки апта дипломатия үчүн “өтө жемиштүү болушу ыктымалдыгын” айтты. Ошондой эле буга болушунча аракетин, күчүн жумшарын белгиледи.
Москва бул тууралуу азырынча комментарий бере элек.
Трамп жума күнү басма сөз жыйынында Украинадагы согуш тууралуу комментарий берип жатып "адамзаттык көз караштан алып караганда өтө коркунучтуу" деп эсептерин айтты. Ошондой эле эки тараптан тең оор жоготуулар болгонун, жүз миңдеген аскерлерин жоготконун, жарадар болгонун белгиледи.
АКШнын президенти Украинадагы согушту тез арада бүткөрүү үчүн Путин менен сүйлөшөрүн билдирип келет. Буга чейин Ак үй бул тема Орусия менен "абдан олуттуу" деңгээлде талкууланганын, жакын арада куралдуу кармашты токтотууга байланыштуу "орчундуу" кадамдар болушу мүмкүндүгүн кабарлаган.
Путин Трамптын сүйлөшүү тууралуу билдирүүлөрүн кубаттап, аны менен жолугушууга даяр экенин ырастаган. Ошол эле маалда Зеленский менен сүйлөшүүлөр болушу мүмкүндүгүн четке каккан.
Украина ишембиге караган түнү Орусиянын армиясы 140тай дрон менен чабуул жасаганын билдирди. Өлкөнүн Аба күчтөрү анын теңине жакыны атып түшүрүлгөнүн, калганы максатына жетпей, жолдон жоголуп кеткенин, жалпысынан 14 облус бутага алынганын билдирди.
Маалыматка караганда, Сумы, Полтава, Днепропетровск жана Киев облустарында айрым турак жайлар, имараттар жабыркады, өрт чыккан учурлар катталды. Набыт болгондор, жараат алгандар жок.
Киев облусунда айгай салган система жети сааттан ашык убакыт иштеди.
Орусия өз кезегинде 8-февралга караган түнү үч аймагы украиналык дрондордун чабуулуна кабылганын, турак жайлар, ишканалардын имараты жабыркаганын маалымдады.
Ростов-на-Дону аймагынын башчысы Юрий Слюсарь 14 кабаттуу үйдүн терезелери сынып, 70тей киши эвакуацияланганын, дагы бир үйдүн газ түтүгү жарылганын кабарлады.
Соңку учурда Украина жооп кайтарып, Орусиянын инфратүзүмүнө (өзгөчө мунай базаларына) ракета, дрон менен чабуул коюп келет.