Орусиянын Брянск облусунда жарылуулар болгону кабарланды
Орусиянын Брянск аймагында жарылуулардын үнү угулду. Бул тууралуу 10-декабрдын кечинде жана 11-декабрдын таңында жергиликтүү Телеграмм-каналдар билдиришти.
Baza каналы жергиликтүү тургундарга таянып, Брянск облусундагы бир катар жарылуулар жана «чоң өрт» тууралуу маалымдады. Башка аймактык каналдар жарылуулар Брянск шаарында болгонун билдиришти.
Брянск облусунун губернатору Александр Богомаз аймактын үстүнөн 10 дрон жок кылынганын маалымдады. Анын айтымында, жабыркагандар жок, окуя болгон жерде тез аракеттенүүчү жана өзгөчө кырдаалдар кызматтары иштеп жатат. Бирок губернатор зыяндын так жайгашкан жерин жана анын өлчөмүн тактаган жок.
Белгилей кетсек, Брянск шаарында мунай базасы жайгашкан.
Украинанын командачылыгы бул окуя боюнча азырынча комментарий бере элек.
10-декабрда кечинде губернатор Богомаз регионго дрон менен кол салуу аракети болгонун, бирок аны Орусиянын Коргоо министрлигинин абадан коргонуу күчтөрү жок кылганын билдирген.
2024-жылдын башынан тарта украиналык дрондор Орусиядагы мунай иштетүүчү заводдорго (НПЗ) жана мунай инфраструктурасына бир нече жолу чабуул жасашкан. Бул чабуулдардын айынан айрым ишканалардын мунайды баштапкы иштетүүчү жабдуулары бузулган. Бирок, апрелде Орусия негизги мунай иштетүүчү заводдордун өндүрүштүк кубаттуулугун жарым-жартылай калыбына келтирген.
2024-жылдын башынан бери украиналык күчтөр Орусиянын мунай иштетүүчү заводдоруна жана инфраструктурасына кеминде 64 жолу чабуул жасашканы маалымдалган.
Запорожьеге жасалган чабуулдун курмандыктары өстү
Украинанын Запорожье шаарына жасалган орусиялык ракеталык чабуулдун курмандыктарынын саны алты адамга жетти. Бул тууралуу Өзгөчө кырдаалдар боюнча мамлекеттик кызмат өзүнүн Telegram каналында билдирди.
Буга чейин төрт адам каза болуп, 21 адам жаракат алганы маалымдалган.
«Учурда Запорожьеге жасалган чабуулдун натыйжасында алты адам каза болгондугу, 22 адам жаракат алганы белгилүү. Куткаруу жана авариялык иштер уланууда», – деп айтылат билдирүүдө.
Ошондой эле тез жардам кызматкерлери эки аялды кароодон өткөрүп, медициналык бөлүмгө жеткиришти.
10-декабрда орусиялык күчтөр Запорожьеге сокку урган.
Орусиялык аскерлер украиналык аймактарды үзгүлтүксүз түрдө ар кандай куралдар менен — чабуул коюучу дрондор, ракеталар, КАБдар жана РСЗО системалары менен аткылоону улантууда.
Орусиянын жетекчилиги согуш учурунда армия украиналык шаарлардын жана айылдардын жарандык инфраструктурасына атайын сокку уруп, жайкын тургундарды өлтүрүп, оорукана, мектеп, бала бакча, энергетикалык жана суу камсыздоо объекттерин талкалап жатат деген айыптоолорду четке кагууда.
Украин бийлиги жана эл аралык уюмдар бул чабуулдарды Орусиянын согуштук кылмыштары катары мүнөздөшүп, алардын атайын мүнөзгө ээ экендигин баса белгилешет.
АКШ Украинага Орусиянын активдеринен 20 миллиард доллар кредит бөлдү
АКШнын Каржы министрлиги Украинага 20 миллиард долларлык кредит бөлүнгөнүн жарыялады. Бул каражат тоңдурулган орусиялык активдердин кирешеси аркылуу жабылат.
АКШнын каржы министри Жанет Йеллен бул каражаттар Украинанын Орусиянын агрессиясына каршы коргонуусуна маанилүү колдоо көрсөтөрүн баса белгиледи.
Бул кредит июнь айында "Чоң жетилик" өлкөлөрүнүн саммитинде макулдашылган 50 миллиард долларлык жалпы сумманын бир бөлүгү болуп саналат. Буга чейин Еврокеңеш Орусиянын тоңдурулган активдеринин кирешесинен каржыланган 35 миллиард евролук кредитти бекиткен.
Орусия Украинага каршы согуш баштагандан кийин Батыш өлкөлөрү Орусиянын суверендүү активдеринен 300 миллиард доллардан ашуун сумманы тоңдурган. Анын көбү Европа өлкөлөрүндө сакталууда.
Өткөн жылы Европада тоңдурулган орусиялык активдерди пайдалануунун натыйжасында 3 миллиард доллар киреше алынган. 2024-жылдын башында Евробиримдик бул кирешени Украинага бөлүп берүү процессин баштаган.
Кремлдин өкүлү Дмитрий Песков Орусиянын активдерин Украинага каржылык жардам катары пайдаланууга катуу каршы экенин бир нече жолу билдирген. Ошондой эле бул процесске катышкан тараптарга каршы мыйзамдуу доо арыздарын даярдоо пландары бар экенин эскерткен.
Зеленский жаңы ракета ийгиликтүү сыноодон өткөнүн билдирди
Украинада "Рута" деп аталган жаңы ракета ийгиликтүү сыноодон өттү. Бул тууралуу Украина президенти Владимир Зеленский Киевде өткөн Борис Патон атындагы улуттук сыйлыктын тапшыруу аземинде айтты.
Президент ракетанын техникалык өзгөчөлүктөрү тууралуу кененирээк маалымат берген жок.
"Украинская правда" басылмасынын маалыматына ылайык, Зеленский 2024-жылдын августунда согуш талаасында биринчи жолу колдонулган алыскы аралыктагы "Паляница" ракета-дрону сериялык өндүрүшкө киргизилгенин да маалымдады.
Ал ошондой эле жакында украиналык коргоо күчтөрүнө "Пекло" ракета-дронунун алгачкы партиясы берилгенин белгиледи. Президенттин айтымында, бул ракета-дрондун биринчи согуштук колдонулушу ийгиликтүү өткөн.
Зеленский "Нептун" аттуу алыскы аралыктагы ракетаны "оккупанттар үчүн үрөй учурган чындык" деп атап, жакын арада ал аскердик күчтөргө тапшырылары күтүлүп жатканын кошумчалады.
Ал белгилегендей, Орусия менен болгон согушта Украинада иштелип чыккан жана өндүрүлгөн ар кандай дрондор активдүү колдонулуп жатат. Алар фронтто гана эмес, "душмандын тылында" да натыйжалуу пайдаланылууда деп билдирген Зеленский.