АКШнын президенти Жо Байден Орусиянын камакка алынган активдеринен алынган үстөк пайызынын эсебинен Украинага 20 миллиард долларлык насыя бөлүнөрүн билдирди. "Чоң жети" Орусия Украинага карата агрессиясын токтотуп, алып келген зыяндын ордун толтурганга чейин активдер камакта болоруна кепилдик берүүдө.
"Орусия бул жаңжалда жеңбейт. Украинанын эли жеңишке жетет. Бул Владимир Путинге дүйнө Украинанын айланасында чогулганын жана АКШ менен биздин G7 өнөктөштөрүбүз аны ар бир кадам сайын колдоону уланта берерин дагы бир жолу эскертет", - деп жазылган президенттин билдирүүсүндө.
Шейшембиде АКШнын каржы министри Жанет Йеллен "Чоң жетиге" кирген кубаттуу мамлекеттер Украинага камактагы орусиялык активдердин эсебинен 50 миллиард доллар насыя берүү боюнча "аз убакытта" бир чечимге келерин билдирген.
Ушул эле күнү G7 жана Европарламент Украинанын коргонуусуна жана кайра куруу иштерине 35 миллиард евро (38 млрд доллар) кредит берүүнү жактырды. Карыз Москва кошуна өлкөсүнө кол салгандан кийин Батышта тоңдурулган орусиялык активдердин эсебинен кайтарылмакчы.
Шаршемби күнү Ак үйдүн Улуттук коопсуздук кеңеши Байдендин администрациясы Украинага 10 млрд долларлык аскердик жардам бөлүүгө аракет кылып жатканын билдирген.
АКШ декабрь айына чейин 10 миллиард долларлык экономикалык жардам берүүнү пландаштырууда, бирок дагы 10 миллиард долларлык аскерий жардам үчүн мыйзам чыгаруучулардын макулдугу керек экенин Улуттук коопсуздук кеңеши билдирүүдө.
Маалыматта АКШ өз үлүшүндөгү 20 млрд доллар насыяны декабрда Дүйнөлүк банктын Трасттык фондуна которушу мүмкүн экенин, Ак үй жакынкы жумада Конгресс менен сүйлөшүүлөрдү уланта турганы айтылган.
Орусия 300 млрд долларга тете активдерин колдонуу мыйзамсыз болорун айтып, өч аларын эскертип жатат.
Орусия Крымда украиндердин дрондору жана кайыктары жок кылынганын билдирди
Орусиянын абадан коргонуу системалары украин тараптан учурулган 14 согуштук дрон атып түшүрүлгөнүн бүгүн 23-октябрда орус Коргоо министрлиги билдирди. Мекеменин маалыматына караганда, учкучсуз учактардын 10у аннексияланган Крымдын аймагында жок кылынды.
Мындан тышкары "Кара деңиз флотунун авиациясы Крым жарым аралын көздөй Кара деңиз акваториясы аркылуу бараткан украиналык төрт учкучсуз моторлуу кайыкты жок кылды", — деп айтылды министрликтин Telegram каналындагы маалыматта.
Ал эми Ростов облусунда, аймактын бышчысы Василий Голубев билдиргендей, Украинанын төрт дрону жок кылынды.
Бир күн мурда Орусиянын аймагында үч спиртзавод бутага алынганын Украинанын Куралдуу күчтөрү маалымдаган.
Улуу Британия 200 украиналык учкучту F-16 учагын башкарууга үйрөттү
“Азаттыктын” украин кызматынын жазганына караганда, Улуу Британиянын коргоо министринин орун басары Люк Поллард өлкөсү 200 украиналык учкучту F-16 учагын башкарууга үйрөткөнүн билдирди.
"Бүгүн мен Королдук Аба күчтөрүнүн даярдоо программасынын акыркы учкучтарынын бүтүрүү аземине катыштым. Бул учкучтар жакында украиналык F-16 учактарында учушат", - деп жазган ал X тармагына.
Поллард өз өлкөсү Украинаны "канча керек болсо, ошончо" колдоону улантарын баса белгиледи.
Британиялык чиновник келтирген сандар АКШ жана башка өлкөлөр билдирген сандардан бир топ жогору. Бул маалыматтар азырынча башка булактар тарабынан тастыкталган эмес.
Мурда АКШнын президенти Жо Байден Украинанын Аба Күчтөрүнүн дараметин жогорулатуу алкагында АКШнын коргоо министрлиги дагы 18 украиналык учкучту F-16 учагын башкарууга үйрөтөөрүн билдирген.
Украин аба күчтөрү Орусиянын 57 дронун атып түшүрүшкөнүн билдирди
23-октябрга оогон түнү орус аскерлери Украинага 81 “Шахид” үлгүсүндөгү чабуулчу учкучсуз учак жана белгисиз типтеги дрондор менен сокку урду деп билдирди Украин аба күчтөрү.
"Ошондой эле душман Кара деңиз акваториясынан Х-31П башкарылуучу авиациялык ракетасы менен Одесса облусуна чабуул жасады", - деп айтылат эртең мененки маалыматта.
Украин аскерлеринин маалыматы боюнча, саат 9:00гө карата Одесса, Николаев, Винница, Сумы, Черкассы, Хмельницкий, Тернополь, Кировоград, Киев, Полтава, Чернигов жана Харьков облустарында душмандын 57 дрону атып түшүрүлгөнү тастыкталган.
"Мындан тышкары, учурда орус дрондорунун 15и локациядан жоголду. Украинанын аба мейкиндигинде тогузга чейин душман дрону байкалууда", - деп кошумчалайт аба күчтөрү.
Орус аскерлери ар кандай куралдар - чабуулчу дрондор, ракеталар, КАБдар, РСЗОлор менен үзгүлтүксүз украин аймактарына чабуул жасап келе жатат.