Үч шаардагы кайра шайлоого кечки саат сегизге чейин 188 396 адам катышып, көрсөткүч 30,51% түздү. Бул тууралуу Борбордук шайлоо комиссиясы автоматтык добуш саноонун жыйынтыгына таянып билдирди.
11-июлда Бишкек, Ош, Токмок шаардык кеңештерине шайлоо өтүп, 26 партиядан 2200дөн көп талапкер ат салышты. Баштапкы эсепке ылайык, Бишкекте 18 партиядан алтоо, Ошто сегиз партиядан төртөө, Токмокто алты партиядан бешөө утту. Бул эсеп добуш саноонун акырына чейин өзгөрүшү мүмкүн.
Бишкек менен Ошто 45, Токмокто 31 мандат бар.
Саясий өнөктүк добуш сатып алуу өңдүү мыйзам бузуулар менен коштолуп, милицияга бир катар арыз түштү.
Токмок шаардык кеңешине шайлоодо "Бирге-Вместе" партиясы башкаларга караганда көбүрөөк добуш алды.
Борбордук шайлоо комиссиясынын баштапкы эсебине ылайык, бул шаарда ат салышкан алты партиянын ичинен бийликчил "Ата-Журт - Кыргызстан" партиясынан башкаларынын баары жети пайыздык чектен ашты.
Саат 21:00гө карата жыйынтык төмөнкүчө:
"Бирге-Вместе" - 28,27%,
-"Эмгек" партиясы - 24,82%,
-"Асыл мурас - жаштар" партиясы - 16,66%,
-"Патриот ынтымагы" - 13,69%,
-"Эл биримдиги" - 12,13%,
-"Ата-Журт - Кыргызстан" - 1,65%.
Утуп чыгуу үчүн партиялардын добушу жети пайыздык чектен ашышы керек.
Токмокто 38 миңден ашуун шайлоочу бар. Саат 18:00гө карата алардын 35 пайыздан көбү катышты.