Азербайжан жикчил Тоолуу Карабак аймагындагы чабуулда бир жоокери окко учканын, экинчиси жарадар болгонун билдирди. Коргоо министрлиги 28-декабрда маалымдагандай, мурунку күнү «армениялык мыйзамсыз куралчан топ» Агдам айылында азербайжандык аскердик бөлүккө кол салган. Министрлик чабуул койгондордун бардыгы жок кылынганын кошумчалап, келечекте мындай аракеттерге каршы катуу чара көрүлөрүн эскертти.
Тоолуу Карабактагы армяндардын армиясы бул кабарды «чагымчыл үгүт» деп четке какты жана ноябрда жетишилген тынчтык келишимин сактап келатышканын билдирди.
Армениянын Коргоо министрлиги буга чейин аймакта кармаш болду деген маалыматты төгүнгө чыгарган.
12-декабрда Тоолуу Карабактын түштүгүндө кармаш тутанганы кабарланып, тараптар бири-бирин тынчтык келишимин бузгандыгы үчүн айыпташкан.
Москванын арачылыгы менен кол коюлган келишим 10-ноябрда күчүнө кирип, алты жумага созулган салгылашууларга чекит койгон. Документке ылайык, азери армиясы кайтарып алган жерлер Бакунун карамагында калат.
Эл аралык коомчулук Тоолуу Карабакты Азербайжандын бөлүгү деп тааныйт, бирок аймакты армяндар Еревандын колдоосу менен башкарып келатышат.
Аймак үчүн уруш 1994-жылы токтогону менен, ортодогу кагылышуулар маал-маалы менен уланып жатат.
