Парламенттик шайлоонун жыйынтыгын тааныбоого чакырган «Ата Мекен», «Бир Бол», «Республика» жана «Замандаш» саясий партияларынын лидерлери жана тарапкерлери Бишкекте Опера жана балет театрынын алдында баштаган митингин Ала-Тоо аянтында улантмай болушту.
Ушу тапта алар «Кайра шайлоо!» деген ураан менен аянтты көздөй баратышат.
Аянтта бүгүн эртең менен «Социал-демократтар», «Мекен Ынтымагы», «Чоң Казат» жана «Реформа» партиялары митинг өткөрө башташкан. Алар да шайлоо ыплас өткөнүн белгилеп, бийликты сындап жатышат.
Борбордук шайлоо комиссиясынын (БШК) баштапкы маалыматына караганда 4-октябрдагы шайлоодо төрт партия: «Биримдик», «Мекеним Кыргызстан», «Кыргызстан» жана «Бүтүн Кыргызстан» партиялары 7% босогодон өтүштү. Шайлоого жалпысынан 16 партия катышкан.
БШК жараянды таза өткөрүүгө бардык шарттар түзүлгөнүн билдирген. (RK)
