Эмгек жана социалдык өнүктүрүү министрлиги 1-октябрда Кыргызстандын калкынын сегиз процентин улгайган адамдар түзөрүн кабарлады.
Мекеменин Улгайган адамдардын эл аралык күнүнө карата жарыялаган маалыматына караганда, өлкөдө эмгекке жарамдуу курактан улуу жаштагылардын жалпы саны 513 миң адам. Бул сан үч жыл мурдагыга салыштырганда 66 миңге көп.
Карылардын жашоосуна коомчулуктун көңүлүн бурдуруу максатында бул күндү жыл сайын белгилеп туруу жөнүндөгү чечим 1990-жылы Бириккен Улуттар Уюмунун Башкы Ассамблеясында кабыл алынган.
